આજે બે નવી ટીમો આવશે આમને-સામને, હાર્દિક અને રાહુલની ટીમ પહેલી જીત માટે ઉતરશે મેદાને

IPLમાં આજે બે નવી ટીમો સામસામે ટકરાશે. ગુજરાત ટાઇટન્સ સામે લખનૌ સુપર જાયન્ટ્સનો પડકાર રહેશે. બંને ટીમો પહેલીવાર IPLમાં પ્રવેશી રહી છે. પહેલા IPLમાં 8 ટીમો રમતી હતી, પરંતુ આ વખતે બે નવી ટીમો ઉમેરાયા બાદ ટીમોની સંખ્યા વધીને 10 થઈ ગઈ છે. 

વર્ષ 2011 બાદ હવે IPLમાં 10 ટીમો રમી રહી છે. મેચ મુંબઈના વાનખેડે સ્ટેડિયમમાં સાંજે 7.30 કલાકે શરૂ થશે. હાર્દિક પંડ્યા ગુજરાત ટાઇટન્સનો કેપ્ટન છે, જ્યારે લખનૌ સુપરજાયન્ટ્સની કમાન કેએલ રાહુલના હાથમાં છે. બંને ટીમો IPLમાં પોતાની પ્રથમ મેચમાં જીતની શરૂઆત સાથે ટૂર્નામેન્ટમાં આગળ વધવાનો પ્રયત્ન કરશે. ગુજરાતની ઇનિંગ્સની શરૂઆત શુભમન ગિલ અને અફઘાનિસ્તાનના વિકેટ કીપર બેટ્સમેન રહેમાનુલ્લાહ ગુરબાઝ કરી શકે છે. બંને જ્યારે ફોર્મમાં હોય ત્યારે કોઈપણ બોલિંગ આક્રમણની સામે કાઉન્ટ્રર એટેક કરવા માટે જાણીતા છે. જોકે, વાનખેડે સ્ટેડિયમમાં બોલરોને બાઉન્સ મળી શકે છે, જેના કારણે તેમને સાવચેત રહેવું પડશે. ગુજરાત ટાઇટન્સના સારા પ્રદર્શનની જવાબદારી તેના કેપ્ટન હાર્દિક પંડ્યા પર રહેશે જેને વાનખેડેના સ્ટેડિયમમાં મુંબઈ ઈન્ડિયન્સ તરફથી રમવાનો ઘણો અનુભવ છે. સિક્સર ફટકારવામાં ઉસ્તાદ હાર્દિકે બેટિંગ ક્રમમાં ઉપર આવવું પડશે.  

આ મેચમાં ઓલરાઉન્ડર વિજય શંકરની ચાર ઓવર પણ નિર્ણાયક રહેશે. આ ત્રણેયમાં પોતાના દમ પર મેચ જીતવાની ક્ષમતા છે. નોંધનીય છે કે, ગુજરાત ટીમનો કેપ્ટન હાર્દિક IPLમાં પોતાની કેપ્ટનશિપની શરૂઆત કરશે. વળી, કેએલ રાહુલ પણ પ્રથમ વખત નવી ટીમ લખનૌની કમાન સંભાળી રહ્યો છે. પરંતુ કેએલ રાહુલ પાસે IPLમાં કેપ્ટનશિપનો અનુભવ છે. આ પહેલા તે પંજાબનો કેપ્ટન રહી ચૂક્યો છે. એક તરફ કેએલ રાહુલ ક્લાસિકલ બેટ્સમેન છે તો બીજી તરફ હાર્દિક પંડ્યા મોટો હિટર છે. ગુજરાતના કેપ્ટન હાર્દિક પંડ્યાનો ભાઈ કૃણાલ પંડ્યા લખનૌ સુપર જાયન્ટ્સની ટીમમાં છે. બંને પહેલીવાર આમને-સામને જોવા મળશે. અગાઉ, પંડ્યા બ્રધર્સ મુંબઈ ઈન્ડિયન્સ માટે સાથે રમતા હતા. પરંતુ આ વખતે નવી ટીમો સાથે તેઓ એકબીજાને પડકાર આપતા જોવા મળશે. આ નજારો અદભૂત બનવાની પૂરી સંભાવના છે.