Jamnagar Accident: જાયવા ગામ પાસે કાળમુખો અકસ્માત, કાર ચાલક યુવાનનું કરુણ મોત
- Jamnagar Accident: રાજકોટ–જામનગર ધોરી માર્ગ પર ગમખ્વાર અકસ્માત
- ટ્રક અને કાર વચ્ચેના અકસ્માતમાં કારચાલકનું મોત
- અકસ્માત બાદ કારના બોનેટમાં આગ લાગતા અફરાતફરી
Jamnagar Accident: રાજકોટ-જામનગર ધોરીમાર્ગ પર આજે એક અત્યંત કરુણ અને ગમખ્વાર અકસ્માતની ઘટના સામે આવી છે. જાયવા ગામ (Jayava village) પાસે એક પૂરઝડપે આવતી ટ્રક (Truck) અને કાર (Car) વચ્ચે થયેલી જોરદાર ટક્કરમાં એક યુવાનનું ઘટનાસ્થળે જ કમકમાટીભર્યું મોત નીપજ્યું છે. આ અકસ્માત એટલો ભયાનક હતો કે ટક્કર બાદ તુરંત જ કારના બોનેટના ભાગમાં ભીષણ આગ ફાટી નીકળી હતી, જેને કારણે હાઈવે પર ભારે અફરાતફરીનો માહોલ સર્જાયો હતો.
Jamnagar Accident: કારનો કચ્ચરઘાણ નીકળી ગયો
મળતી વિગતો અનુસાર, રાજકોટ-જામનગર હાઈવે પર જાયવા ગામ નજીકથી પસાર થઈ રહેલી કાર અને ટ્રક વચ્ચે સામસામે ધડાકાભેર અકસ્માત થયો હતો. આ ટક્કરમાં કારનો કચ્ચરઘાણ નીકળી ગયો હતો. કાર ચલાવી રહેલા અરબાઝ સુમરા (Arbaz Sumra) નામના યુવાનને ગંભીર ઈજાઓ પહોંચતા તેનું પ્રાણપંખેરું ઊડી ગયું હતું. અકસ્માત બાદ તરત જ કારના એન્જિનના ભાગમાં આગ લાગી હતી. જોતજોતામાં ધુમાડાના ગોટેગોટા હવામાં ઉડવા લાગ્યા હતા, જેને જોઈને આસપાસથી પસાર થતા વાહનચાલકો થંભી ગયા હતા.
આ પણ વાંચોઃ Junagadh Crime: રીક્ષા રિવર્સ લેવા જેવી વાતમાં લોહિયાળ ખેલ! CCTV આવ્યા સામે
Jamnagar Accident: કાર ચાલકનો જીવ ના બચ્યો
ઘટના સમયે હાજર સ્થાનિક લોકો અને અન્ય વાહનચાલકોએ માનવતા દાખવી તુરંત બચાવ કામગીરી શરૂ કરી હતી. લોકોએ સમયસૂચકતા વાપરીને પાણી અને અન્ય સાધનોની મદદથી કારમાં લાગેલી આગ પર કાબૂ મેળવ્યો હતો, જેના કારણે આગ વધુ પ્રસરે તે પહેલા જ અટકાવી શકાઈ હતી. જોકે, કમનસીબે કાર ચાલક અરબાઝને બચાવી શકાયો ન હતો.
પોલીસ ઘટનાસ્થળે દોડી આવી
અકસ્માતની જાણ થતા જ સ્થાનિક પોલીસનો કાફલો ઘટનાસ્થળે દોડી આવ્યો હતો. પોલીસે મૃતક યુવાનના મૃતદેહને પોસ્ટમોર્ટમ માટે ખસેડવાની તજવીજ હાથ ધરી હતી અને અકસ્માતને પગલે હાઈવે પર જામ થયેલા ટ્રાફિકને હળવો કરાવ્યો હતો. પોલીસે ટ્રક ચાલક વિરુદ્ધ ગુનો નોંધવાની કાર્યવાહી હાથ ધરી છે અને અકસ્માત પાછળના ચોક્કસ કારણો જાણવા તપાસ શરૂ કરી છે. આ ઘટનાને પગલે મૃતક યુવાનના પરિવારમાં શોકનું મોજું ફરી વળ્યું છે.
આ પણ વાંચોઃ Jamnagar: તપાસમાં કોઈ પુરાવા ના મળ્યા, પોલીસે 3 મહિલા સહિત 5 બાંગ્લાદેશી ઘૂસણખોરોને પકડ્યા