Jamnagar News: જામનગરમાં 14 વર્ષની બાળકીનું રમતા રમતા અચાનક હાર્ટ એટેક આવવાથી અવસાન થયું છે. બાળકી જમીન પર ઢળી પડી અને બાદમાં ઊભી ન થઈ શકી, જે ઘટનાના લાઈવ સીસીટીવી ફૂટેજ સામે આવ્યા છે. હોસ્પિટલમાં તબીબોએ તેને મૃત જાહેર કરતાં હસતા-રમતા પરિવારમાં ભારે શોક વ્યાપી ગયો છે.
Jamnagar News: ગુજરાતમાં છેલ્લા કેટલાક સમયથી નાની ઉંમરે હાર્ટ એટેક આવવાના કિસ્સાઓમાં ચિંતાજનક વધારો થઈ રહ્યો છે, ત્યારે જામનગર શહેરમાંથી એક અત્યંત આઘાતજનક અને કાળજું કંપાવી દેનારી ઘટના સામે આવી છે. અહીં એક માત્ર 14 વર્ષની બાળકીનું હાર્ટ એટેકના કારણે કરુણ મોત નીપજ્યું છે. આ સમગ્ર ઘટનાના લાઈવ સીસીટીવી (CCTV) ફૂટેજ હવે સામે આવ્યા છે, જેને જોઈને સમગ્ર પંથકમાં ભારે અરેરાટી વ્યાપી ગઈ છે અને લોકોની આંખો ભીની થઈ ગઈ છે.
હોસ્પિટલ ખસેડાઈ પણ જીવ ના બચ્યો
મળતી માહિતી મુજબ આ માસૂમ બાળકી અન્ય બાળકો સાથે સામાન્ય રીતે રમી રહી હતી. સીસીટીવી ફૂટેજમાં જોઈ શકાય છે કે બાળકી રમતા રમતા અચાનક જ અસ્વસ્થ થઈ જાય છે અને ક્ષણભરમાં જ જમીન પર ઢળી પડે છે. બાળકી નીચે પડ્યા બાદ સહેજ પણ ઊભી થઈ શકી ન હતી. આસપાસના લોકો અને પરિવારજનો તાત્કાલિક ઘટનાસ્થળે દોડી આવ્યા હતા અને બેભાન અવસ્થામાં બાળકીને સારવાર અર્થે નજીકની હોસ્પિટલ (દવાખાને) લઈ ગયા હતા. જોકે, હોસ્પિટલ પહોંચતા જ ફરજ પરના તબીબોએ બાળકીને તપાસીને મૃત જાહેર કરી હતી. ડૉક્ટરોના પ્રાથમિક અંદાજ મુજબ બાળકીનું મોત કાર્ડિયાક અરેસ્ટ એટલે કે હાર્ટ એટેકના કારણે થયું છે.
પરિવારમાં ભારે આક્રંદ
આ ઘટનાને પગલે હસતા-રમતા પરિવારે પોતાની વ્હાલસોયી દીકરી ગુમાવતા સમગ્ર પરિવારમાં ઘેરા શોકનો માહોલ છવાઈ ગયો છે. સગા-સંબંધીઓ અને પડોશીઓ પણ આ આઘાત સહન કરી શકતા નથી. 14 વર્ષની કુમળી વયે આ રીતે હાર્ટ એટેક આવવો તે એક ચિંતાનો મોટો વિષય બન્યો છે.
આ પણ વાંચો: Jamnagar News: જામનગરમાં ગ્રીન કવર વધારવા તંત્ર સજ્જ, 5 લાખ રોપાઓ વાવવાનો લક્ષ્યાંક
