Jamnagar માં GST ની આડેધડ નોટિસોથી બ્રાસ ઉદ્યોગકારોમાં ભારે રોષ, કલેક્ટરને આપ્યું આવેદનપત્ર

3,391 નોટિસો અને રૂ.2,150 કરોડની માગણી સામે આક્રોશ

ઉદ્યોગકારોના જણાવ્યા મુજબ, GST સંબંધિત મામલામાં 3,391 જેટલી નોટિસો આપવામાં આવી છે અને રૂ. 2,150 કરોડથી વધુની માગણી સામે વેપારીઓમાં ભારે આક્રોશ છે. ઉદ્યોગકારોનું કહેવું છે કે કાયદાની જટિલ પ્રક્રિયા અને નોટિસોને કારણે પ્રામાણિક રીતે વેપાર કરતા કરદાતાઓ માટે મુશ્કેલીઓ ઊભી થઈ રહી છે.

ત્રણ સંગઠનોના નેજા હેઠળ મૌન બાઇક રેલી

વિરોધના ભાગરૂપે જામનગરમાં ત્રણ મુખ્ય ઉદ્યોગ સંગઠનોના સંયુક્ત ઉપક્રમે વિશાળ મૌન બાઇક રેલી યોજવામાં આવી. ફેક્ટરી ઓનર્સ એસોસિએશન, GIDC પ્લોટ એન્ડ શેડ હોલ્ડર અને ચેમ્બર ઓફ કોમર્સના સંયુક્ત નેજા હેઠળ યોજાયેલી રેલીમાં મોટી સંખ્યામાં ઉદ્યોગકારો જોડાયા હતા. રેલી કલેક્ટર કચેરી સુધી પહોંચી હતી.

જિલ્લા કલેક્ટરને આવેદનપત્ર પાઠવ્યું

ઉદ્યોગકારોએ એકત્ર થઈને જીલ્લા કલેક્ટકરને આવેદનપત્ર પાઠવી પોતાની વિવિધ રજૂઆતો કરી હતી. ઉદ્યોગકારોએ બોનાફાઇડ એટલે કે સાચા ખરીદદારોને યોગ્ય કાનૂની રક્ષણ આપવા તેમજ પ્રામાણિક કરદાતાઓને રાહત આપવાની માગ કરી છે. સાથે જ GSTની પ્રક્રિયાને સરળ અને વ્યવહારુ બનાવવાની પણ રજૂઆત કરવામાં આવી છે.

‘માત્ર કરચોરી કરનારાઓ સામે કાર્યવાહી કરો’

ઉદ્યોગકારોએ સ્પષ્ટ માગ કરી છે કે કરચોરી કરતા લોકો સામે કડક કાર્યવાહી થવી જોઈએ, પરંતુ પ્રામાણિક કરદાતાઓને જટિલ પ્રક્રિયા અને નોટિસોના કારણે મુશ્કેલી ન પડે.

ઉકેલ નહીં આવે તો વધુ ઉગ્ર વિરોધના એંધાણ

જામનગરના બ્રાસ ઉદ્યોગકારોનું કહેવું છે કે તેઓ લાંબા સમયથી GST સંબંધિત પ્રશ્નો સરકાર સમક્ષ રજૂ કરી રહ્યા છે, પરંતુ હજુ સુધી અપેક્ષિત નિરાકરણ મળ્યું નથી. હાલના બંધ અને રેલી બાદ પણ જો પ્રશ્નોનો ઉકેલ નહીં આવે તો આગામી દિવસોમાં વધુ આક્રમક લડત આપવાના એંધાણ ઉદ્યોગકારોએ આપ્યા છે.

 આ પણ વાંચોઃ Jamnagar: સોડા પીતા પહેલા સાવધાન! સોડાની બોટલમાંથી મકોડો નીકળ્યો, વીડિયો જોઈ હચમચી જશો

આ પણ વાંચોઃ Chaitar Vasava ની સજા પર આજે મોટો ફેંસલો થશે! સજા સામે હાઈકોર્ટમાં અરજી