Jamnagar: બેડી ગેઈટ વિસ્તારમાંથી લાખોનું ડ્રગ્સ ઝડપાયું, MDMA અને કોકેઈન સાથે 22 વર્ષિય શખ્સની ધરપકડ

19 ગ્રામ કોકેઈન અને 123 ગ્રામ MDMA નો જથ્થો જપ્ત

પોલીસની પ્રાથમિક તપાસમાં જાણવા મળ્યું છે કે, આ દરોડામાં કુલ 19 ગ્રામ કોકેઈન અને 123 ગ્રામ MDMA પાવડરનો જથ્થો કબજે કરવામાં આવ્યો છે. આ ડ્રગ્સ સાથે પોલીસે 22 વર્ષીય નરશિરામ રબારી નામના શખ્સને ઝડપી પાડ્યો છે. આરોપી પાસેથી ડ્રગ્સ ઉપરાંત વજન કાંટો અને ઝીપલોક પાઉચ પણ મળી આવ્યા છે, જે સૂચવે છે કે ડ્રગ્સના નાના પેકેટ બનાવીને વેચાણ કરવામાં આવતું હતું.

મુખ્ય સપ્લાયર ફરાર, પોલીસની તપાસ તેજ

તપાસ દરમિયાન સામે આવ્યું છે કે, આ ડ્રગ્સનો જથ્થો રાજસ્થાનના સાંચોર (Sanchore) ખાતેથી લાવવામાં આવ્યો હતો. આ સમગ્ર રેકેટનો મુખ્ય માસ્ટરમાઇન્ડ પારસરામ રબારી હોવાનું બહાર આવ્યું છે. હાલ મુખ્ય સપ્લાયર પારસરામ રબારી ફરાર છે. જામનગર સીટી-બી ડિવિઝન (City-B Division) પોલીસ દ્વારા આરોપીની શોધખોળ કરવા માટે વિવિધ ટીમો બનાવી કવાયત તેજ કરવામાં આવી છે.

કુલ 21.95 લાખનો મુદ્દામાલ જપ્ત

પોલીસે ડ્રગ્સ અને અન્ય સાધનો મળીને કુલ 21.95 લાખ રૂપિયાનો મુદ્દામાલ કબજે કર્યો છે. આ મામલે સીટી-બી ડિવિઝન પોલીસ સ્ટેશનમાં એન.ડી.પી.એસ. એક્ટ હેઠળ ગુનો દાખલ કરી કાયદેસરની કાર્યવાહી હાથ ધરવામાં આવી છે. આ અંગે વધુ માહિતી આપતા DYSP પિયુસ વાંદાએ જણાવ્યું હતું કે, ડ્રગ્સના નેટવર્કને તોડવા માટે પોલીસ સતર્ક છે અને ફરાર આરોપીને ગણતરીના દિવસોમાં પકડી પાડવામાં આવશે.

આ પણ વાંચોઃ Banaskantha: ધાનેરામાં મેઘમહેર, રેલ નદીમાં નવા નીરની આવકથી ખેડૂતોમાં આનંદ

આ પણ વાંચોઃ Jamnagar News: શાળામાં વિદ્યાર્થીને માર મારવાનો મામલો, શિક્ષક વિરુદ્ધ પોલીસ ફરિયાદ