Jamnagar:બેડીના ધરારનગરમાં ગેસ ગળતર જેવી સ્થિતિ, પોલીસ અને ફાયર વિભાગ દોડતું થયું
- જામનગરમાં (Jamnagar) કેમિકલયુક્ત ગેસથી સ્થાનિકોને હાલાકી
- ખાનગી કંપની દ્વારા છોડાતા કેમિકલયુક્ત ગેસથી હાલાકી
- બેડી નજીક ધરારનગર વિસ્તારના સ્થાનિકોએ તંત્રને કરી ફરિયાદ
- કારખાનામાંથી છોડવામાં આવે છે કેમિકલયુક્ત ગેસ
- સ્થાનિકોના આરોગ્ય સાથે ચેડા થતા હોવાનો આક્ષેપ
- પોલીસ, ફાયર વિભાગને જાણ કરી નિરાકરણ લાવવા કરી ફરિયાદ
Jamnagar: જામનગર શહેરના વોર્ડ નંબર 1 માં આવેલા બેડી નજીકના ધરારનગર વિસ્તારમાં ખાનગી કંપની દ્વારા કારખાનામાંથી છોડાતા કેમિકલ યુક્ત ગેસને કારણે સ્થાનિક રહેવાસીઓને ભારે હાલાકી ભોગવવી પડી રહી છે. આ ગેસના કારણે લોકોને શ્વાસ લેવામાં તકલીફ, આંખોમાં બળતરા, માથાનો દુખાવો તેમજ અન્ય આરોગ્ય સમસ્યાઓનો સામનો કરવો પડી રહ્યો છે.
જામનગરમાં કેમિકલ યુક્ત ગેસથી સ્થાનિકોને હાલાકી
સ્થાનિકોના આરોપ છે કે આ કારખાનામાંથી નિયમિતપણે કેમિકલ યુક્ત ગેસ છોડવામાં આવે છે, જેના કારણે તેમના આરોગ્ય સાથે ચેડા થઈ રહ્યા છે. આ મુદ્દે ધરારનગર વિસ્તારના રહેવાસીઓએ તંત્રને ફરિયાદ કરી છે. તેમણે પોલીસ તેમજ ફાયર વિભાગને જાણ કરીને સમસ્યાનું તાત્કાલિક નિરાકરણ લાવવાની માંગ કરી છે. રહેવાસીઓનું કહેવું છે કે આ ગેસની દુર્ગંધ અને પ્રદૂષણને કારણે તેમના રોજિંદા જીવન પર ભારે અસર પડી રહી છે. ખાસ કરીને બાળકો અને વૃદ્ધોને વધુ તકલીફ થઈ રહી છે.
ફાયર વિભાગને જાણ કરી સમસ્યાનું નિરાકરણ લાવવા ઉઠાવી ફરિયાદ
આ વિસ્તારમાં રહેતા ઘણા લોકોએ જણાવ્યું કે રાત્રે અને વહેલી સવારે ગેસની તીવ્રતા વધુ વધી જાય છે, જેના કારણે ઊંઘ અને રોજિંદા કાર્યોમાં અડચણ આવે છે.સ્થાનિકોની ફરિયાદ બાદ તંત્રે આ મામલે ધ્યાન દોર્યું છે. પોલીસ અને ફાયર વિભાગના અધિકારીઓએ ઘટનાસ્થળે પહોંચીને તપાસ શરૂ કરી છે. ગુજરાત પ્રદૂષણ નિયંત્રણ બોર્ડ (GPCB)ને પણ આ બાબતે જાણ કરવામાં આવી છે, જેથી કારખાનાના પ્રદૂષણ નિયંત્રણની વ્યવસ્થાની તપાસ થઈ શકે. રહેવાસીઓએ માંગ કરી છે કે કંપની વિરુદ્ધ કડક કાર્યવાહી કરવામાં આવે અને ગેસ છોડવાનું તાત્કાલિક બંધ કરાવવામાં આવે.આ ઘટના જામનગર શહેરમાં પ્રદૂષણના મુદ્દાને ફરી એક વખત ચર્ચામાં લાવી છે.
સ્થાનિકોનું કહેવું છે કે આવા પ્રદૂષણને કારણે તેમના આરોગ્ય અને પર્યાવરણને લાંબા ગાળાનું નુકસાન થઈ રહ્યું છે. તંત્ર પાસેથી ઝડપી અને અસરકારક કાર્યવાહીની અપેક્ષા વ્યક્ત કરવામાં આવી રહી છે, જેથી આ વિસ્તારના લોકોને રાહત મળી શકે.
આ પણ વાંચો: Gujarat Police Recruitment: ગુજરાતમાં પોલીસ ભરતીની શારીરિક કસોટીનો આજથી શંખનાદ, જાણો સંપૂર્ણ વિગત