Jamnagar: ઓનલાઈન ફૂડ ડિલિવરીમાં મોટી બેદરકારી, વેજ પાસ્તામાંથી નીકળ્યા નોનવેજના ટુકડા

ઉપવાસમાં જ માંસાહારી ભોજન નિકળ્યું

આ ઘટનાની વિગત એવી છે કે ન્યૂ જામનગર વિસ્તારમાં રહેતા ગ્રાહક પરેશભાઈ ચુડાસમાએ ઝોમેટો એપ્લિકેશન દ્વારા એક જાણીતી હોટેલમાંથી વેજ પાસ્તા (Veg Pasta) મંગાવ્યા હતા. સંજોગોવશાત, જે દિવસે આ ઓર્ડર આપવામાં આવ્યો તે દિવસે પવિત્ર નિર્જળ એકાદશી (Nirjala Ekadashi) નો તહેવાર હતો. હિન્દુ ધર્મમાં આ દિવસનું ખૂબ જ ધાર્મિક મહત્વ છે અને અનેક લોકો આ દિવસે કડક ઉપવાસ રાખતા હોય છે. પરેશભાઈના ઘરે પણ આ પવિત્ર દિવસે ઉપવાસ હોવાથી તેમણે શુદ્ધ શાકાહારી ભોજનનો આગ્રહ રાખ્યો હતો. જો કે, ડિલિવર થયેલા પાસ્તામાંથી માંસના ટુકડા નીકળતા જ પરિવારના સભ્યો સ્તબ્ધ થઈ ગયા હતા. પવિત્ર વ્રતના દિવસે જ આવું અપવિત્ર ભોજન પીરસવામાં આવતા ગ્રાહકનો વ્રતભંગ (Breaching of Fast) થયો હતો, જેને કારણે સમગ્ર પરિવાર અને સ્થાનિક લોકોમાં હોટેલ સામે ભારે આક્રોશ જોવા મળ્યો હતો.

હોટેલ સંચાલકે ભૂલ સ્વીકારી

આ ગંભીર બેદરકારી બદલ ગ્રાહક પરેશભાઈ ચુડાસમાએ તાત્કાલિક જે-તે હોટેલના સંચાલકોનો સંપર્ક કર્યો હતો અને આ મામલે લેખિત તેમજ મૌખિક ફરિયાદ નોંધાવી હતી. શરૂઆતમાં હોટેલ સ્ટાફ દ્વારા ગલ્લાતલ્લા કરવામાં આવ્યા હોવાની ચર્ચા હતી, પરંતુ મામલો ગંભીર બનતા આખરે હોટેલ સંચાલકે પોતાની મોટી ભૂલ સ્વીકારી લીધી હતી. હોટેલ દ્વારા ગ્રાહકની માફી માંગવામાં આવી હતી અને ઓર્ડરના પૈસાનું રિફંડ પણ ચૂકવી દેવામાં આવ્યું હતું. જો કે, ધાર્મિક લાગણી દુભાવાનો મામલો હોવાથી ગ્રાહક માત્ર રિફંડથી સંતુષ્ટ થયા નહોતા.

 

View this post on Instagram

 

A post shared by Gujarat First (@gujaratfirst)

જામનગર મહાનગરપાલિકા પણ એક્શનમાં

આ સમગ્ર વિવાદ સોશિયલ મીડિયા અને સ્થાનિક સ્તરે વાયરલ થતાં જામનગર મહાનગરપાલિકા પણ એક્શનમાં આવી છે. જામનગર મનપાના ફૂડ વિભાગની (Food Department) ટીમે તાત્કાલિક આ ઘટનાની નોંધ લીધી છે.  ફૂડ વિભાગ દ્વારા હોટેલના રસોડાની સ્વચ્છતા, વેજ અને નોનવેજ ભોજન બનાવવા માટે અલગ વ્યવસ્થા છે કે નહીં તેની ચકાસણી કરવામાં આવશે. તેમજ ભોજનના સેમ્પલ (Food Samples) લઈને તેને લેબોરેટરી પરીક્ષણ માટે મોકલવાની તજવીજ શરૂ કરવામાં આવી છે.

આ પણ વાંચોઃ Junagadh: કુખ્યાત 'બંગલા ગેંગ' ના 3 ફરાર આરોપીઓ રાજકોટ નજીકથી ઝડપાયા, ક્રાઈમ કુંડળી ચોંકાવનારી!