Jamnagar: નર્સિંગનો અભ્યાસ કરતી 19 વર્ષિય વિદ્યાર્થિનીનો આપઘાત, પરિવારમાં શોકનો માહોલ

પરિવારમાં શોકનું મોજું

મળતી માહિતી મુજબ મૃતક વિદ્યાર્થિનીનું નામ પ્રજ્ઞાબેન બાબુભાઈ પરમાર હોવાનું સામે આવ્યું છે. પ્રજ્ઞાબેન નર્સિંગના બીજા વર્ષમાં અભ્યાસ કરી રહી હતી. તે કેવી રીતે અને કયા સંજોગોમાં આટલું મોટું પગલું ભરવા મજબૂર થઈ, તે અંગે પરિવારજનો પણ સ્તબ્ધ છે. વિદ્યાર્થિનીના અચાનક નિધનના સમાચાર મળતા જ તેના પરિવારજનો પર આભ તૂટી પડ્યું છે.

પોલીસ તપાસનો ધમધમાટ

ઘટનાની જાણ થતાં જ ધ્રોલ પોલીસ સ્ટેશનના પી.આઈ. એચ.વી. રાઠોડ સહિતનો પોલીસ કાફલો તાત્કાલિક ઘટનાસ્થળે દોડી ગયો હતો. પોલીસે મૃતદેહનો કબજો મેળવીને પોસ્ટમોર્ટમ માટે હોસ્પિટલ મોકલી આપ્યો છે. હાલ પોલીસ દ્વારા આ મામલે સઘન તપાસ શરૂ કરવામાં આવી છે. આત્મહત્યા પાછળનું ચોક્કસ કારણ જાણવા માટે પોલીસે તેના સહપાઠીઓ અને પરિવારના નિવેદનો નોંધવાની કાર્યવાહી હાથ ધરી છે.

આ દુઃખદ ઘટનાને પગલે સમગ્ર શૈક્ષણિક સંકુલ અને ધ્રોલ પંથકમાં ભારે ચકચાર મચી ગઈ છે. યુવતીએ અભ્યાસના દબાણ હેઠળ કે અન્ય કોઈ અંગત કારણોસર આ પગલું ભર્યું છે, તે તો પોલીસની તપાસ બાદ જ સ્પષ્ટ થશે.

 આ પણ વાંચોઃ Jamnagar માં કાળજું કંપાવતી ઘટના: રમતાં રમતાં 14 વર્ષની બાળકી ઢળી પડી, CCTV ફૂટેજ આવ્યા સામે