Jamnagar News: જામનગરમાં ગ્રીન કવર વધારવા તંત્ર સજ્જ, 5 લાખ રોપાઓ વાવવાનો લક્ષ્યાંક

અમૃત 2.0 યોજના અને સંસ્થાઓનો સહયોગ

જામનગરને હરિયાળું બનાવવા માટે તંત્ર દ્વારા લાંબાગાળાનું આયોજન કરવામાં આવ્યું છે. 'ગ્રીન જામનગર' અભિયાન અંતર્ગત કેન્દ્ર સરકારની મહત્વકાંક્ષી અમૃત 2.0 (AMRUT 2.0) યોજના હેઠળ વ્યાપક સ્તરે કામગીરી ચાલી રહી છે. આ અભિયાનમાં માત્ર સરકારી તંત્ર જ નહીં, પરંતુ શહેરની વિવિધ સામાજિક, શૈક્ષણિક અને સ્વયંસેવી સંસ્થાઓ પણ ખભેખભા મિલાવીને સહયોગ આપી રહી છે. આ સામૂહિક પ્રયાસોના પરિણામે જ અત્યાર સુધીમાં જામનગરના જુદા જુદા વિસ્તારોમાં હજારો વૃક્ષોનું સફળતાપૂર્વક વાવેતર કરી દેવામાં આવ્યું છે, જે આગામી સમયમાં શહેરના ફેફસાં સમાન સાબિત થશે.

 5 લાખ વૃક્ષો વાવવાનો મેગા પ્લાન

પર્યાવરણની આ સફરને વધુ વેગ આપવા માટે જામનગર મહાનગરપાલિકા અને વન વિભાગે એક ખૂબ જ મોટો લક્ષ્યાંક નિર્ધારિત કર્યો છે. ચાલુ વર્ષે જૂન 2026 થી શરૂ કરીને સપ્ટેમ્બર 2026 સુધીના ચોમાસાના ચાર મહિનાના ગાળામાં જામનગરમાં કુલ 5 લાખ રોપાઓ વાવવાનું ભવ્ય આયોજન કરવામાં આવ્યું છે. ચોમાસાની ઋતુમાં છોડના વિકાસની સંભાવના સૌથી વધુ હોવાથી આ સમયગાળાની પસંદગી કરવામાં આવી છે. આ મેગા પ્લેન્ટેશન ડ્રાઈવ અંતર્ગત શહેરના જાહેર માર્ગો, સોસાયટીઓ, સરકારી પડતર જમીનો અને બગીચાઓમાં મોટા પાયે વૃક્ષારોપણ કરાશે.

નાગરિકોને વિનામૂલ્યે રોપાઓનું વિતરણ

આ અભિયાનમાં લોકભાગીદારી વધારવા માટે વિશ્વ પર્યાવરણ દિવસના આ વિશેષ કાર્યક્રમ દરમિયાન એક અનોખી પહેલ કરાઈ છે. તંત્ર દ્વારા જામનગરના નાગરિકોને વિનામૂલ્યે એટલે કે તદ્દન મફત રોપાઓનું વિતરણ કરવામાં આવી રહ્યું છે.  વૃક્ષોના ટ્રીમીંગ (છાંટણી) દરમિયાન એકત્ર થતા લાકડાનો સદઉપયોગ કરીને તેને સ્મશાનગૃહો અને વિવિધ ધાર્મિક સંસ્થાઓને અંતિમ સંસ્કાર તેમજ અન્ય ધાર્મિક વિધિઓ માટે વિનામૂલ્યે પૂરા પાડવામાં આવી રહ્યા છે. તંત્રની આ પર્યાવરણલક્ષી અને સામાજિક અભિગમની પ્રશંસા થઈ રહી છે.

આ પણ વાંચોઃ Jamnagar News: આજે જામનગરના અનેક વિસ્તારોમાં પાણીનો કાપ, જાણો તમારા ઘરે ક્યારે આવશે પાણી!