Junagadh: કરોડોની સરકારી જમીન પર તંત્રનું બુલડોઝર, ગેરકાયદેસર દબાણોનો સફાયો!

• Junagadh  ની સરકારી જમીન પર ગેરકાયદેસર દબાણો પર તંત્રનુ બુલડોઝર
• સરદાર બાગમાં વિસ્તારમાં 6 માસ પહેલા અપાઈ હતી નોટીસ!
• આજે સવાર થી દબાણ દૂર કરવાની કાર્યવાહી શરૂ કરવામાં આવી

Junagadh Demolition: જૂનાગઢ શહેરમાં સરકારી જમીન પર થતા ગેરકાયદેસર દબાણો સામે તંત્રએ લાલ આંખ કરી છે. શહેરના પ્રખ્યાત સરદાર બાગ (Sardar Baag) વિસ્તારમાં વર્ષોથી જામી પડેલા ગેરકાયદેસર દબાણો પર આજે વહેલી સવારથી જ વહીવટી તંત્રનું બુલડોઝર ફરી વળ્યું છે. મ્યુનિસિપલ કોર્પોરેશન, પોલીસ અને વહીવટી તંત્રના સંયુક્ત ઓપરેશન દ્વારા અંદાજે 1.27 કરોડની બજાર કિંમત ધરાવતી જમીનને ખુલ્લી કરાવવામાં આવી હોવાનું કહ્યું છે.

6 મહિના અગાઉ નોટીસ આપી હતી!

પ્રાપ્ત માહિતી અનુસાર જૂનાગઢ (Junagadh) ના સરદાર બાગ વિસ્તારમાં આવેલી સરકારી કિંમતી જમીન પર છેલ્લા ઘણા સમયથી 16 જેટલા દબાણકારોએ કાચા-પાકા મકાનો બનાવીને ગેરકાયદેસર કબજો જમાવ્યો હતો. આ અંગે તંત્રને જાણ થતા કાયદેસરની કાર્યવાહી હાથ ધરવામાં આવી હતી.  તંત્ર દ્વારા છ માસ અગાઉ જ તમામ 16 આસામીઓને કાયદેસરની નોટિસ ફટકારવામાં આવી હતી. નોટિસમાં સૂચના આપવામાં આવી હતી કે તેઓ પોતાની રીતે જ આ દબાણો દૂર કરી લે, પરંતુ સમયમર્યાદા પૂર્ણ થયા બાદ પણ દબાણો યથાવત રહેતા આજે કડક કાર્યવાહીનો નિર્ણય લેવામાં આવ્યો.

આ પણ વાંચોઃ Junagadh: ગીરમાં સફારી બુકિંગ કૌભાંડનો પર્દાફાશ, જાણો

Junagadh માં સવારથી જ કાફલો ખડેપગે

આજ રોજ વહેલી સવારથી જ સરદાર બાગ વિસ્તારમાં કોઈ અનિચ્છનીય ઘટના ન બને તે માટે પોલીસનો ચુસ્ત બંદોબસ્ત ગોઠવવામાં આવ્યો છે.  આ ઓપરેશનમાં જૂનાગઢ મનપાના અધિકારીઓ, PGVCLની ટીમ અને મહેસૂલ વિભાગના ઉચ્ચ અધિકારીઓ હાજર રહ્યા છે.

કરોડોની જમીન થઈ ખુલ્લી

તંત્રના જણાવ્યા અનુસાર આ ડિમોલિશન ડ્રાઈવ અંતર્ગત કુલ 630 ચોરસ મીટર જગ્યા પરથી દબાણો દૂર કરવામાં આવી રહ્યા છે. આ જમીનની વર્તમાન બજાર કિંમત અંદાજે 1 કરોડ 27 લાખ રૂપિયા જેટલી આંકવામાં આવી રહી છે. આ કામગીરીને પગલે અન્ય દબાણકારોમાં પણ ફફડાટ વ્યાપી ગયો છે.

આ પણ વાંચો: Junagadh: 'મારો દિકરો ગળે ફાંસો ખાઈ ગયો' યુવાનને મરવા કોણે મજબૂર કર્યો?