Girnar News: ગિરનાર યાત્રીઓ માટે મોટા સમાચાર, સિંહના હુમલા બાદ બંધ કરાયેલી ગિરનારની સીડી ફરી શરૂ

સિંહના જીવલેણ હુમલા બાદ પ્રવાસીઓમાં ફેલાયો હતો ભય

શનિવારના રોજ ગિરનારની સીડી પરથી પસાર થઈ રહેલા એક માસૂમ બાળક પર સિંહે અચાનક હુમલો (Lion Attack) કર્યો હતો, જેમાં બાળકનું કરુણ મોત નીપજ્યું હતું. આ ઘટનાને પગલે ગિરનાર પર આવેલા અનેક યાત્રીકોમાં ભારે ભય અને ફફડાટ ફેલાઈ ગયો હતો. યાત્રીકોની સુરક્ષાને ધ્યાનમાં રાખીને જિલ્લા પ્રશાસન અને વન વિભાગ દ્વારા તાત્કાલિક ધોરણે સીડી પરથી યાત્રીકોની અવરજવર પર સંપૂર્ણ રોક (Ban) લગાવી દેવામાં આવી હતી.

વન વિભાગે સિંહોને રેસ્કયૂ કરી સક્કરબાગ ઝૂ મોકલ્યા

ઘટનાની ગંભીરતાને પગલે વન વિભાગની ટીમો તુરંત એક્શનમાં આવી હતી. વન કર્મચારીઓ દ્વારા ગિરનાર સીડી અને તેની આસપાસના જંગલ વિસ્તારમાં મોડી રાત સુધી સઘન સર્ચ ઓપરેશન (Search Operation) હાથ ધરવામાં આવ્યું હતું. ગઈકાલે હુમલો કરનાર સિંહ સહિત અન્ય એક શંકાસ્પદ સિંહ અને એક સિંહણ મળી કુલ 3 વન્યજીવોને વન વિભાગે સફળતાપૂર્વક રેસ્કયૂ (Rescue) કર્યા હતા. આ તમામ હિંસક પ્રાણીઓને તબીબી પરીક્ષણ અને નિરીક્ષણ માટે જૂનાગઢના પ્રખ્યાત સક્કરબાગ ઝૂ (Sakkarbaug Zoo) ખાતે મોકલી આપવામાં આવ્યા છે.

દર્શનથી વંચિત રહેલા શ્રદ્ધાળુઓમાં આજે આનંદનો માહોલ

વન વિભાગ દ્વારા આજે વહેલી સવારે ફરી એકવાર ગિરનાર સીડી તેમજ આજુબાજુના વિસ્તારોમાં તપાસ કરવામાં આવી હતી. આ તપાસ દરમિયાન કોઈ અન્ય વન્ય પ્રાણી નજરે ન પડતાં આખરે યાત્રીકો માટે ગિરનારના દ્વાર ખોલી દેવાયા હતા. ઉલ્લેખનીય છે કે, ગઈકાલે અચાનક ગિરનાર સીડી બંધ થવાના કારણે બહારગામથી આવેલા અનેક યાત્રીકો અંબાજી માતાજી (Ambe Mataji) તેમજ ગુરુ દત્ત ભગવાન (Datt Bhagwan) ના દર્શન કર્યા વિના જ વંચિત રહી ગયા હતા. જોકે, આજે વહેલી સવારથી જ યાત્રા પુનઃ શરૂ કરાતા પ્રવાસીઓ અને શ્રદ્ધાળુઓમાં ભારે આનંદ અને ઉત્સાહનો માહોલ જોવા મળી રહ્યો છે.

આ પણ વાંચો: Junagadh Girnar Lion Attack : માતા-પિતાની નજર સામે સિંહ બાળકને ઉપાડી ગયો, વન વિભાગ દ્વારા બોરદેવી વિસ્તારમાં પાંજરા ગોઠવવામાં આવ્યા