Junagadh Leopard Attack:જૂનાગઢ જિલ્લાના વિસાવદર તાલુકામાં આવેલા કનકાઈ મંદિર વિસ્તારમાં દીપડાનો આતંક જોવા મળ્યો છે. ગત મોડી રાત્રિએ એક દીપડાએ મંદિરની અગાસી પર સૂઈ રહેલી માસૂમ બાળકી પર જીવલેણ હુમલો કરતા સમગ્ર પંથકમાં ભયનો માહોલ છવાઈ ગયો છે.
શું છે સમગ્ર ઘટના?
મળતી માહિતી મુજબ, એક પરિવાર કનકાઈ મંદિર પરિસરમાં રોકાયો હતો. પરિવારના સભ્યો નીચે રસોઈ કામમાં વ્યસ્ત હતા, ત્યારે મંદિરની અગાસી પર એક બાળકી શાંતિથી સૂઈ રહી હતી. આ દરમિયાન દીપડો અચાનક અગાસી પર ચડી આવ્યો હતો અને નિદ્રાધીન બાળકીને ગળાના ભાગેથી પકડીને ઉઠાવી જવાનો પ્રયાસ કર્યો હતો. બાળકીની ચીસ સાંભળીને તુરંત જ તેની માતા રતનબેન દોડી આવ્યા હતા. માતાએ જરા પણ ડર્યા વિના હિંમત દાખવી દીપડાના મોઢામાંથી દીકરીને ખેંચી લીધી હતી. માતાના બૂમાબૂમ કરવાથી અન્ય લોકો પણ તાત્કાલિક અગાસી પર દોડી આવતા દીપડો ત્યાંથી ભાગીને નીચે ઉતરી ગયો હતો.
બાળકીની હાલત ગંભીર
દીપડાના આ હુમલામાં બાળકીને માથા અને ગળાના ભાગે ગંભીર ઈજાઓ પહોંચી છે. પરિવારજનો દ્વારા તેને તાત્કાલિક સારવાર માટે જૂનાગઢની સરકારી હોસ્પિટલ ખાતે ખસેડવામાં આવી છે, જ્યાં તેણીની હાલત સ્થિર હોવાનું જાણવા મળ્યું છે. આ ઘટના બાદ વનવિભાગ દ્વારા વિસ્તારમાં દીપડાને પકડવા માટે કાર્યવાહી હાથ ધરવામાં આવે તેવી માંગ ઉઠી છે.
આ પણ વાંચો: કેશોદમાં વ્યાજખોરોનો આતંક: સરકારી કર્મચારીએ સ્યુસાઇડ નોટ લખી ઝેરી ટીકડા ખાધા
