સોમનાથના 100 વર્ષ જૂના રોડના વિવાદનો કેસ: કોઈ રોડ બંધ ન હોવાનો સરકારનો HC માં દાવો

સુરક્ષાના કારણોસર માત્ર નવી દીવાલ જ બનાવાઈ છે: સરકાર

ગુજરાત હાઈકોર્ટમાં ચાલી રહેલી આ મહત્વની સુનાવણી દરમિયાન રાજ્ય સરકાર વતી હાજર રહેલા સરકારી વકીલે મજબૂત દાવો કર્યો છે કે સોમનાથમાં સામાન્ય જનતા માટે કોઈ પણ રોડ બંધ કરવામાં આવ્યો નથી. સોમનાથ મંદિર (Somnath Temple) તરફ જતો મુખ્ય રોડ સંપૂર્ણપણે ખુલ્લો છે અને ત્યાં યાત્રિકોની અવરજવર ચાલુ છે. સરકારે સ્પષ્ટતા કરી હતી કે સંવેદનશીલતા અને સુરક્ષાના કારણોસર માત્ર એક નવી સુરક્ષા દીવાલનું નિર્માણ કરવામાં આવ્યું છે. આ દાવાના સમર્થનમાં સરકારે ગઈકાલના જ તાજા ફોટોગ્રાફ્સ પણ માનનીય કોર્ટ સમક્ષ પુરાવા તરીકે રજૂ કર્યા હતા.

જાહેર માર્ગ અંગે એકતરફી નિર્ણય ન લઈ શકાય: હાઈકોર્ટની ટકોર

સરકારની આ દલીલો સામે અરજદારે વળતો આક્ષેપ કરતા જણાવ્યું હતું કે, સુરક્ષા દીવાલના બહાને વાસ્તવમાં સાગરદર્શન તરફ જતો મહત્વનો માર્ગ બંધ કરી દેવામાં આવ્યો છે. બંને પક્ષોની દલીલો સાંભળ્યા બાદ હાઈકોર્ટે સ્થાનિક તંત્રની કામગીરી સામે નારાજગી વ્યક્ત કરી હતી. હાઈકોર્ટે ગંભીર સવાલ ઉઠાવતા પૂછ્યું કે, "આ મામલે ગીર સોમનાથના કલેક્ટરે છેલ્લા 4 મહિના સુધી કોઈ સત્તાવાર જવાબ કેમ રજૂ ન કર્યો?" કોર્ટે કડક શબ્દોમાં ટકોર કરી હતી કે કોઈ પણ જાહેર માર્ગ અંગે વહીવટી તંત્ર દ્વારા આ પ્રકારે એકતરફી નિર્ણય ન લઈ શકાય.

આગામી સુનાવણી 22 જૂને, નવો નકશો રજૂ કરવા આદેશ

આ કેસની ગંભીરતા અને ભૌગોલિક સ્થિતિને વધુ સ્પષ્ટતાથી સમજવા માટે હાઈકોર્ટે રાજ્ય સરકારને એક મહત્વનો આદેશ આપ્યો છે. કોર્ટે જણાવ્યું છે કે સરકાર દ્વારા આગામી સુનાવણીમાં સોમનાથ મંદિર અને તેની આસપાસના રસ્તાઓનો પ્રવર્તમાન સ્થિતિ દર્શાવતો નવો સત્તાવાર નકશો કોર્ટ સમક્ષ રજૂ કરવાનો રહેશે. હાઈકોર્ટે તમામ દસ્તાવેજો અને નકશાની ચકાસણી કર્યા બાદ જ આખરી નિર્ણય લેવાનું નક્કી કર્યું છે. આ ચકચારી કેસની આગામી સુનાવણી હવે આગામી 22 જૂનના રોજ હાથ ધરવામાં આવશે. ત્યાં સુધી સોમનાથના આ માર્ગના વિવાદ પર સૌ કોઈની નજર ટકેલી રહેશે.

આ પણ વાંચો: અમદાવાદમાં આતંકી ધમકીનો ફિયાસ્કો: લશ્કરે તોયબાના નામે ધમકી આપનાર સુરતનો 12 વર્ષનો બાળક નીકળ્યો