Junagadh: કુખ્યાત 'બંગલા ગેંગ' ના 3 ફરાર આરોપીઓ રાજકોટ નજીકથી ઝડપાયા, ક્રાઈમ કુંડળી ચોંકાવનારી!

લોકોમાં ભયનો માહોલ ઉભો કર્યો હતો

એક વર્ષ પહેલાં આ સંગઠિત ટોળકી બનાવીને મારામારી, ખંડણી (extortion), જીવલેણ હુમલાઓ, હત્યાની કોશિશ અને ગેરકાયદેસર રીતે મિલકત પચાવી પાડવી જેવા અનેક ગુનાઓ આચરી લોકોમાં ભય ફેલાવવામાં આવતો હતો. આ પ્રવૃત્તિઓને ડામવા માટે બંગલા ગેંગના આઠ આરોપીઓ સામે ગુજસીટોક (GUJCTOK) હેઠળ ગુનો દાખલ કરવામાં આવ્યો હતો. આ કેસમાં કરશન ગલા મોરી અને દીલો ભગા છેલાણા હાલ જેલમાં (jail) છે, જ્યારે ગેંગના 3 આરોપીઓ ભાવિન ખોડા બટ્ટ, નિલેષ ખોડા બટ્ટ અને જાદવ ઉર્ફે લાખો પોલીસ પકડથી દૂર હતા.

ગુપ્ત બાતમીના આધારે ઓપરેશન

ફરાર આરોપીઓને ઝડપી લેવા માટે જૂનાગઢ પોલીસે અલગ-અલગ ટીમો (police teams) કામે લગાડી હતી. આ દરમિયાન પોલીસને ચોક્કસ અને ગુપ્ત બાતમી મળી હતી કે ગુજસીટોકના ગુનામાં નાસતા ફરતા આ ત્રણેય આરોપીઓ રાજકોટ નજીક ખીરસરા પાસે છુપાયેલા છે. બાતમી મળતા જ પોલીસે તાત્કાલિક તે વિસ્તારમાં દરોડો પાડીને ત્રણેય આરોપીઓને દબોચી લીધા હતા.

આરોપીઓનો ગુનાહિત ઈતિહાસ

આરોપીઓની ક્રાઈમ કુંડળી ખૂબ જ ચોંકાવનારી છે. બંગલા ગેંગ સામે મારામારી, આર્મ્સ એક્ટ, અપહરણ  અને મિલકત પચાવી પાડવા સહિતના અનેક ગુનાઓ અલગ-અલગ પોલીસ સ્ટેશનમાં નોંધાયેલા છે. જેમાં મુખ્ય આરોપી ભાવિન ખોડા બટ્ટ સામે 14 ગુનાઓ, જ્યારે નિલેષ અને લાખા સામે 9-9 ગુનાઓ નોંધાયેલા છે.

કોર્ટે મંજૂર કર્યા રિમાન્ડ

હાલમાં પોલીસે આ ત્રણેય આરોપીઓની ધરપકડ કરીને તેમને કોર્ટ (court) સમક્ષ રજૂ કર્યા હતા, જ્યાં કોર્ટે આરોપીઓના પાંચ દિવસના રિમાન્ડ મંજૂર કર્યા છે. આ સાથે જ પોલીસે સામાન્ય જનતાને નમ્ર અપીલ કરી છે કે જો આ ગેંગ દ્વારા ભૂતકાળમાં કોઈને પણ હેરાનગતિ કરવામાં આવી હોય અથવા ડરાવવામાં આવ્યા હોય, તો તેઓ નિઃસંકોચ પોલીસનો સંપર્ક કરે. માહિતી આપનાર નાગરિકની ઓળખ બિલકુલ ગુપ્ત  રાખવામાં આવશે.

આ પણ વાંચોઃ Junagadh: સિંહબાળ મોત કેસમાં મોટી કાર્યવાહી, વન વિભાગે ફરાર આરોપી બાવન ચાવડાને પોરબંદરથી ઝડપ્યો