Jay-Veeru Lions: ગીરના પ્રસિદ્ધ જય-વીરુ સિંહ બેલડીને ભાવનાત્મક અંજલિ, સાંસદ દ્વારા અનોખું સ્મૃતિ સન્માન

અતૂટ મિત્રતાનું પ્રતીક

પરિમલભાઈ નથવાણી માટે આ સિંહ જોડી તેમના હૃદયમાં એક ખાસ સ્થાન ધરાવે છે. આ પહેલ વિશે વાત કરતા તેમણે જણાવ્યું હતું કે, ગીરની મુલાકાતે આવતા પ્રવાસીઓ અને વન્યજીવ પ્રેમીઓ આ બંને સિંહોના ભવ્ય વારસાથી પરિચિત થાય તેવો અમારો ઉદ્દેશ્ય છે. જય અને વીરુ માત્ર જંગલના રાજા નહોતા, પરંતુ તેઓ ગીરના સૌથી નીડર (Fearless), ભવ્ય (Grand) અને અતૂટ બંધન (Inseparable bond) ધરાવતા સિંહો હતા. નથવાણીએ યાદ કર્યું હતું કે, આ સિંહોના નામકરણ પ્રક્રિયામાં તેઓ વન વિભાગના અધિકારીઓ સાથે સક્રિય રીતે જોડાયેલા હતા, જે આ શ્રદ્ધાંજલિને વધુ ભાવનાત્મક બનાવે છે.

સમૃદ્ધ વારસો અને સંઘર્ષની ગાથા

ગયા વર્ષે, પોતાના સીમાડા માટે થયેલી અન્ય સિંહો સાથેની હિંસક અથડામણ બાદ આ સિંહ બેલડીનું દુઃખદ અવસાન થયું હતું. ગત 7 ઓગસ્ટ, 2025 ના રોજ બંને સિંહોએ વિદાય લીધી હતી. તેમના મૃત્યુ બાદ પરિમલભાઈ નથવાણીએ તેમને અંજલિ આપતા 'જય-વીરુની જોડી' નામનું એક ભાવનાત્મક લોક-શૈલીનું ગીત અને 'જય-વીરુની અમર ગાથા' નામની દસ્તાવેજી ફિલ્મ રજૂ કરી હતી, જેમાં તેમના અતૂટ સંબંધોની સફર આલેખવામાં આવી હતી.

બોલિવૂડના પાત્રોથી પણ વધુ ચર્ચિત

જેમ બોલિવૂડની ફિલ્મ 'શોલે'માં જય-વીરુની મિત્રતા જગવિખ્યાત છે, તેમ ગીરના જંગલમાં આ બંને સિંહોની મિત્રતા પ્રખ્યાત હતી. સ્થાનિક અનુભવી ટ્રેકર્સ અને વન્યજીવ નિષ્ણાતો આજે પણ તેમની બહાદુરીના કિસ્સાઓ વાગોળે છે.

આ બંને સિંહોએ સંયુક્ત રીતે માલણકા, કેનેડીપુર, નતાડિયા, ઇટાડી અને લિમદ્રા જેવા વિશાળ ક્ષેત્રો પર લાંબા સમય સુધી પોતાનું શાસન જમાવ્યું હતું. તેમના જીવનના નાના-મોટા સંઘર્ષો અને પડકારો છતાં, તેમની મિત્રતા ક્યારેય તૂટી નહીં. આ બેકલાઇટ બોર્ડ દ્વારા, હવે આવનારી પેઢી અને પ્રવાસીઓ ગીરના આ અમર સિંહોની ગાથાને કાયમ માટે નિહાળી શકશે.

આ પણ વાંચોઃ એશિયાઈ સિંહોમાં ચેપી રોગોનાં વહેલા નિદાન માટે MP Parimanbhai Nathwani ની અપીલ