નર્મદા જિલ્લામાં સૌથી વધુ વરસાદ: ગરૂડેશ્વર અને સાગબારામાં આકાશી આફત
વરસાદના સત્તાવાર આંકડા અનુસાર, નર્મદા (Narmada) જિલ્લામાં સૌથી વધુ વરસાદી માહોલ જોવા મળ્યો છે. નર્મદા (Narmada) ના ગરૂડેશ્વર (Garudeshwar) તાલુકામાં સૌથી વધુ 6 ઇંચ વરસાદ નોંધાયો છે. આ સિવાય સાગબારા (Sagbara) તાલુકામાં પણ સાડા 5 ઇંચ જેટલો ભારે વરસાદ ખાબક્યો છે. નર્મદા (Narmada) જિલ્લાના જ નાંદોદ (Nandod) અને તિલકવાડા (Tilakwada) તાલુકામાં પણ 4 ઇંચ વરસાદ વરસતાં સ્થાનિક નદી-નાળાઓમાં નવા નીરની આવક થઈ છે.
ખેડા અને આણંદ જિલ્લામાં જળબંબાકાર: વસોમાં 2 કલાકમાં 5 ઇંચ વરસાદ
ચરોતર પંથકમાં પણ મેઘરાજાએ આક્રમક બેટિંગ કરી છે. ખેડા (Kheda) જિલ્લાના વસો (Vaso) તાલુકામાં માત્ર 2 કલાકના ટૂંકા ગાળામાં 5 ઇંચ જેટલો મૂશળધાર વરસાદ ખાબક્યો છે. અચાનક આવેલા આ વરસાદને કારણે રસ્તાઓ પર પાણી ફરી વળ્યા હતા.
આ ઉપરાંત નડિયાદ (Nadiad) શહેરમાં 4 ઇંચથી વધુ વરસાદ વરસ્યો છે, જેના કારણે વાહનવ્યવહાર પર માઠી અસર પડી હતી. મહુધા (Mahudha) માં પણ 4 ઇંચ વરસાદ નોંધાયો છે. આણંદ જિલ્લાની વાત કરીએ તો આણંદ (Anand) શહેર, બોરસદ (Borsad) અને પેટલાદ (Petlad) તાલુકામાં પણ 4 ઇંચ જેટલો ધોધમાર વરસાદ ખાબક્યો છે.
દક્ષિણ ગુજરાતમાં પણ મેઘમહેર: ઉમરપાડામાં 4 ઇંચ વરસાદ
દક્ષિણ ગુજરાત (South Gujarat) માં પણ વરસાદનું જોર યથાવત રહ્યું છે. સુરત (Surat) જિલ્લાના ઉમરપાડા (Umarpada) તાલુકામાં 4 ઇંચ વરસાદ નોંધાયો છે. રાજ્યના અન્ય ભાગોની વાત કરીએ તો 5 તાલુકામાં 3 ઇંચથી વધુ વરસાદ વરસ્યો છે, જ્યારે 10 તાલુકામાં 2 ઇંચથી વધુ વરસાદ ખાબક્યો છે. આ સિવાયના અન્ય તાલુકાઓમાં અડધા ઇંચથી લઈને 1 ઇંચ સુધીનો વરસાદ નોંધાયો છે.
વહીવટી તંત્ર એલર્ટ પર
ટૂંકા સમયમાં પડેલા ભારે વરસાદને પગલે જે-તે જિલ્લાના વહીવટી તંત્રને એલર્ટ મોડ પર મૂકવામાં આવ્યું છે. નીચાણવાળા વિસ્તારોમાં ભરાયેલા પાણીના નિકાલ માટે કામગીરી શરૂ કરી દેવામાં આવી છે. ખેડૂતો માટે આ વરસાદ પાક માટે ફાયદાકારક સાબિત થશે, પરંતુ અતિભારે વરસાદથી પાકને નુકસાન થવાની પણ ભીતિ સેવાઈ રહી છે.
આ પણ વાંચો: Jayprakash Madhak Forecast: ગુજરાતમાં આગામી 5 દિવસ ભારે, આ વિસ્તારોમાં પડશે 15 ઇંચ સુધી વરસાદ!
