Kheda: ખેડા જિલ્લામાં મેઘરાજાની ધમાકેદાર બેટિંગ, નડિયાદ, કપડવંજ અને ગળતેશ્વરમાં ધોધમાર વરસાદ

કપડવંજ પંથકમાં સાર્વત્રિક વરસાદ

નડિયાદ ઉપરાંત કપડવંજ અને તેની આસપાસના ગ્રામ્ય વિસ્તારોમાં પણ મેઘરાજાએ ધબદાટી બોલાવી છે. કપડવંજ સહિત અંકલઈ, આંબલીયારા અને ગરોડા જેવા ગ્રામીણ વિસ્તારોમાં ધોધમાર વરસાદ નોંધાયો છે. લાંબા સમયની રાહ જોયા બાદ આ વિસ્તારમાં સારો વરસાદ પડતાં ખેતી (Agriculture) માટે આશીર્વાદરૂપ સાબિત થયો છે, જેના કારણે સ્થાનિક ખેડૂતોમાં ભારે ખુશીની લાગણી જોવા મળી રહી છે. જો કે, ટૂંકા સમયમાં વધારે વરસાદ ખાબકતા ગ્રામ્ય રસ્તાઓ અને નીચાણવાળા વિસ્તારોમાં પાણી ભરાઈ ગયા છે.

ગળતેશ્વરમાં વિઝિબિલિટી ઘટી

ગળતેશ્વર તાલુકામાં પણ મેઘરાજાનું જોરદાર આગમન થયું છે. અહીં પડેલા ભારે વરસાદના કારણે સમગ્ર પંથકના વાતાવરણમાં અચાનક ઠંડક  પ્રસરી ગઈ છે, જેથી લોકોને અસહ્ય ગરમીમાંથી મોટી રાહત મળી છે. પરંતુ, વરસાદનું જોર એટલું વધારે હતું કે રસ્તાઓ પર વિઝિબિલિટી ખૂબ જ ઘટી ગઈ હતી. વાહનચાલકોને ભારે હાલાકી ભોગવવી પડી હતી અને વાહનોની લાઈટો ચાલુ રાખીને ધીમેથી પસાર થવાની ફરજ પડી હતી.

સમગ્ર પંથકમાં આનંદનો માહોલ

ખેડા જિલ્લામાં એકતરફ શહેરી વિસ્તારોમાં પાણી ભરાવા અને વીજળી જવાના કારણે લોકોને થોડી તકલીફ પડી હતી, તો બીજી તરફ કૃષિ પાક માટે આ વરસાદ અમૃત સમાન હોવાથી સમગ્ર પંથકના ખેડૂતો અને નાગરિકોમાં આનંદનો માહોલ જોવા મળી રહ્યો છે.

આ પણ વાંચોઃ Jamnagar Rain : જામજોધપુરમાં 7 ઇંચ વરસાદથી પૂરની સ્થિતિ, 2 બાળક તણાયાના CCTV આવ્યા સામે