Kapadvanj Factory Blast: ફેક્ટરી માલિક સામે ગુનો દાખલ, LCB અને SOG તપાસમાં જોડાઈ

ફટાકડાની દીવેટ બનાવવાનું કામકાજ ચાલતું

આ ચકચારી વિસ્ફોટ મામલે ડીવાયએસપી (DySP) દ્વારા સત્તાવાર પ્રતિક્રિયા આપવામાં આવી છે. પોલીસના જણાવ્યા અનુસાર આ ફેક્ટરીમાં ફટાકડાની દીવેટ બનાવવાનું કામકાજ ચાલતું હતું. જ્યારે આ દુર્ઘટના ઘટી ત્યારે ફેક્ટરી પરિસરમાં અંદાજે 13 થી 14 જેટલા માણસો હાજર હતા. સદનસીબે મોટી જાનહાનિ ટળી છે. બે લોકો ઈજાગ્રસ્ત થયા છે.  હાલમાં બંને ઈજાગ્રસ્તોની તબિયત સ્થિર હોવાનું જાણવા મળ્યું છે.  બીજી તરફ  સૂત્રો પાસેથી માહિતી મળી રહી છે કે આ ઘટનામાં 6 જેટલાં લોકો ઈજાઓનો ભોગ બન્યા છે.

ગેરકાયદેસર ચાલતી હતી ફેક્ટરી

પોલીસ તપાસમાં ચોંકાવનારા ખુલાસાઓ સામે આવ્યા છે. આ ફેક્ટરી કોઈપણ પ્રકારના સત્તાવાર પરવાના કે મંજૂરી વિના ધમધમતી હતી. ફેક્ટરીમાં અત્યંત જોખમી વિસ્ફોટક જ્વલનશીલ પદાર્થો રાખવામાં આવ્યા હતા. આટલું જ નહીં, સુરક્ષા માટે અનિવાર્ય એવા ફાયર સેફ્ટીના (Fire Safety) સાધનો વિના જ નિર્દોષ માનવ જીવન જોખમાય તે રીતે બેદરકારીપૂર્વક કામ કરવામાં આવતું હતું.

ઘટના અંગે ફરિયાદ દાખલ

કપડવંજ મામલતદારની ફરિયાદના આધારે પોલીસે કાયદાનો સિંકોજો કસ્યો છે. ફેક્ટરીના સંચાલકો સામે બીએનએસ (BNS) કલમ 110, 287, 288 તેમજ સ્ફોટક અધિનિયમ 1984 ની કલમ 9 (B) મુજબ ગુનો રજીસ્ટર્ડ (FIR) કરવામાં આવ્યો છે. આ હાઈપ્રોફાઈલ કેસની આગળની તપાસ એસઓજી (SOG) પીઆઈને સોંપવામાં આવી છે. પોલીસની પ્રાથમિક તપાસમાં બહાર આવ્યું છે કે, આ ગેરકાયદેસર ફેક્ટરીનો માલિક મિતુલ કુમાર પટેલ છે, જે મૂળ અમદાવાદના ઈસનપુર વિસ્તારનો રહેવાસી છે. તેણે કપડવંજમાં આ જગ્યા ભાડે (Rented) રાખીને આ જોખમી કામકાજ શરૂ કર્યું હતું. હાલમાં એફએસએલ સહિતની વિવિધ તપાસ એજન્સીઓને સાથે રાખીને પોલીસ આ કૌભાંડના મૂળ સુધી પહોંચવા ચક્રો ગતિમાન કર્યા છે.

આ પણ વાંચોઃKapadvanj Factory Blast: 'ગેરકાયદેસર હશે તો માલિકને છોડવામાં નહીં આવે', MLA રાજેશ ઝાલાનું નિવેદન

આ પણ વાંચોઃ Kapadvanj factory blast: Kheda ના કપડવંજમાં ફટાકડાની ફેક્ટરીમાં પ્રચંડ વિસ્ફોટ,10 કિલોમીટર સુધી ધરા ધ્રુજી, 5 થી 6 લોકો ઈજાગ્રસ્ત