Kheda Police Mega Drive : ખેડા (Kheda) જિલ્લામાં દેશી દારૂના ગેરકાયદેસર વેચાણ અને બુટલેગરો સામે ખેડા જિલ્લા પોલીસે મોટી કાર્યવાહી હાથ ધરી છે. ગુતાલ ગામમાં વહેલી સવારે પોલીસની અનેક ટીમોએ એકસાથે મેગા સર્ચ ઓપરેશન હાથ ધરતા સમગ્ર વિસ્તારમાં ચકચાર મચી હતી. દેશી દારૂના અડ્ડાઓ અને બુટલેગરોને નિશાન બનાવી પોલીસે ગામને કોર્ડન કરીને સઘન ચેકિંગ કર્યું હતું.
Kheda ના ગુતાલમાં વહેલી સવારે પોલીસની મેગા રેડ!
મળતી માહિતી મુજબ, ગુતાલ ગામમાં દારૂ વેચાણની બાતમીને લઈને બે દિવસ પહેલાં પથ્થરમારાની ઘટના બની હતી. આ મામલે વડતાલ પોલીસ સ્ટેશનમાં બંને પક્ષે સામસામે પોલીસ ફરિયાદ નોંધાવવામાં આવી હતી. ત્યારબાદ હવે ખેડા જિલ્લા પોલીસે દેશી દારૂના અડ્ડાઓ અને બુટલેગરો સામે મેગા સર્ચ ઓપરેશન શરૂ કર્યું છે.
સવારે 5:30 વાગ્યે ગુતાલમાં પોલીસ ત્રાટકી!
DySP બાજપાઈના નેતૃત્વ હેઠળ વહેલી સવારે આશરે 5:30 વાગ્યાથી પોલીસની 10 જેટલી ટીમોએ કાર્યવાહી શરૂ કરી હતી. ઓપરેશનમાં LCB, સાયબર સેલ, નડિયાદ ટાઉન, નડિયાદ પશ્ચિમ, નડિયાદ રૂરલ અને વડતાલ પોલીસ મથકના અધિકારીઓ તથા કર્મચારીઓ જોડાયા હતા. પોલીસની ટીમોએ ગુતાલ ગામમાં અલગ-અલગ સ્થળોએ એકસાથે તપાસ શરૂ કરી હતી. આ દરમિયાન શંકાસ્પદ સ્થળો અને બુટલેગરોના રહેણાંક વિસ્તારોમાં સઘન ચેકિંગ કરવામાં આવ્યું હતું.
100 જેટલા પોલીસકર્મીઓએ ગામને કોર્ડન કર્યું
આ મેગા સર્ચ ઓપરેશનમાં આશરે 100 જેટલા પોલીસ અધિકારીઓ અને કર્મચારીઓ જોડાયા હતા. પોલીસ દ્વારા 6 સરકારી અને 15 ખાનગી વાહનો સહિતના કાફલા સાથે ગામમાં પ્રવેશ કરી વિવિધ સ્થળોએ તપાસ હાથ ધરવામાં આવી હતી. મોટી સંખ્યામાં પોલીસની ટીમો એકસાથે ગામમાં પહોંચતા સ્થાનિક સ્તરે પણ ભારે હલચલ જોવા મળી હતી. દેશી દારૂના ગેરકાયદેસર ધંધા સાથે સંકળાયેલા લોકો સામે કાર્યવાહી કરવા માટે પોલીસે વ્યાપક સર્ચ હાથ ધર્યું હતું.
દેશી દારૂ અને વોશનો જથ્થો મળ્યાની માહિતી
પ્રાથમિક અને ખાનગી સૂત્રો પાસેથી મળતી માહિતી પ્રમાણે, કેટલાક બુટલેગરોના રહેણાંક સ્થળેથી દેશી દારૂ તેમજ દારૂ બનાવવા માટે વપરાતો વોશ મળી આવ્યો હોવાનું સામે આવ્યું છે. પ્રાથમિક માહિતી મુજબ, સમગ્ર કાર્યવાહી દરમિયાન આશરે 12 જેટલા કેસ નોંધાયા હોવાની શક્યતા છે. પોલીસને હજારો લિટર દેશી દારૂનો વોશ પણ હાથ લાગ્યો હોવાની માહિતી છે. જોકે, જપ્ત કરાયેલા જથ્થા અને નોંધાયેલા ગુનાઓની અંતિમ સત્તાવાર વિગતો પોલીસ તરફથી જાહેર થયા બાદ જ સ્પષ્ટ થશે.
નંબર પ્લેટ વગરના વાહનો પણ ડિટેઇન
દારૂના અડ્ડાઓ સામેની કાર્યવાહી દરમિયાન પોલીસને કેટલાક નંબર પ્લેટ વગરના શંકાસ્પદ વાહનો પણ મળી આવ્યા હતા. પોલીસે આવા વાહનોને ડિટેઇન કરીને વધુ તપાસ શરૂ કરી છે. ગુતાલમાં અગાઉ થયેલા પથ્થરમારાની ઘટના અને ત્યારબાદ પોલીસની મેગા ડ્રાઈવને પગલે સમગ્ર મામલો ચર્ચામાં આવ્યો છે. દેશી દારૂના દુષણને ડામવા માટે ખેડા જિલ્લા પોલીસની આ કાર્યવાહી આગળ પણ ચાલુ રહે તેવી શક્યતા છે.
આ પણ વાંચો : MLA Jignesh Mevani News : "મેં મદદ કરી એના પછી જીગ્નેશભાઈ મારી પાછળ પડી ગયા કે પૂછો મત" ધારાસભ્ય જિગ્નેશ મેવાણી સામે મહિલાના ગંભીર આક્ષેપ
