વેપારી અને તેના પાર્ટનરને પોલીસ સ્ટેશન લઈ જવાયા
મળતી જાણકારી અનુસાર મહુધા પોલીસ સ્ટેશનના ASI સહિત બે વ્યક્તિ સામે લાંચ લેવાના આક્ષેપમાં ACBએ ટ્રેપ ગોઠવી હતી. ફરિયાદીના પુત્ર અને તેના પાર્ટનરને વેપારીઓ સાથે છેતરપિંડીના આક્ષેપમાં પોલીસ સ્ટેશન ખાતે બેસાડવામાં આવ્યા હોવાનો મામલો સામે આવ્યો હતો. ACB ના જણાવ્યા મુજબ, ફરિયાદી અને તેમનો પુત્ર વિવિધ કંપનીના ડિટર્જન્ટ પાઉડર તથા સંબંધિત વસ્તુઓનો વેપાર કરે છે. 1 ઓક્ટોબરના રોજ ફરિયાદીના પુત્ર અને તેમના પાર્ટનરને મહુધાના વેપારીઓ સાથે છેતરપિંડી કરી હોવાનો આક્ષેપ કરી માલના ટેમ્પા સાથે મહુધા પોલીસ સ્ટેશન ખાતે બેસાડવામાં આવ્યા હતા.
ગુનો ન દાખલ કરવા ₹5 લાખની માંગણીનો આક્ષેપ
ફરિયાદી 2 ઓક્ટોબરે મહુધા પોલીસ સ્ટેશન ખાતે આ મામલે મળવા ગયા હતા. ACB માં નોંધાયેલી ફરિયાદ અનુસાર, આરોપી ASI નરેન્દ્રસિંહ જીલુભા ચાવડાએ વકીલ જસ્ટીસ કાલીદાસ રોહિતની હાજરીમાં સમાધાન કરાવવા અને ગુનો દાખલ ન કરવા માટે શરૂઆતમાં ₹5 લાખની લાંચની માંગણી કરી હતી. રકઝક બાદ આ રકમ ઘટાડીને ₹2.50 લાખ નક્કી કરવામાં આવી હતી.
ACB ના સંપર્ક બાદ છટકું ગોઠવાયું
લાંચની રકમ ચૂકવવા ઈચ્છતા ન હોવાથી ફરિયાદીએ ACB નો સંપર્ક કર્યો હતો. ફરિયાદના આધારે ACB દ્વારા 3 ઓક્ટોબરે મહુધા ચોકડી ખાતે નાયરા પેટ્રોલ પંપની સામે આવેલા શ્યામ આર્કેડની ઓફિસ નંબર 24 માં લાંચનું છટકું ગોઠવવામાં આવ્યું હતું.
₹2.50 લાખ સ્વીકારતા વકીલ ઝડપાયો
ACB ના જણાવ્યા મુજબ, ટ્રેપ દરમિયાન આરોપી જસ્ટીસ કાલીદાસ રોહિતે ફરિયાદી સાથે લાંચની માંગણી કરી અને ₹2.50 લાખની રકમ સ્વીકારી હતી. ત્યારબાદ ACB ની ટીમે તેને ઝડપી લીધો હતો. તેની પાસેથી માગેલી અને સ્વીકારેલી સંપૂર્ણ ₹2.50 લાખની લાંચની રકમ પણ રિકવર કરવામાં આવી છે.
ASI સ્થળ પર હાજર ન મળ્યો
આ કાર્યવાહી દરમિયાન આરોપી ASI નરેન્દ્રસિંહ જીલુભા ચાવડા સ્થળ પર હાજર મળ્યો નહોતો. ACBના જણાવ્યા અનુસાર, બંને આરોપીઓએ એકબીજાની મદદગારીથી આ કૃત્ય કર્યું હોવાની વિગતો સામે આવી છે. સમગ્ર મામલે ACB દ્વારા કાયદેસરની કાર્યવાહી હાથ ધરવામાં આવી છે.
આ પણ વાંચોઃ Kheda: મહુધાનું આ ગામ આઝાદી બાદ પણ પાયાની સુવિધાથી વંચિત, બિસ્માર રસ્તે કાઢવી પડી અંતિમયાત્રા
આ પણ વાંચોઃ Kheda: અમદાવાદ-ઇન્દોર હાઇવે પર ખાડારાજ, ભાથીજી મહારાજના દર્શને જતાં ભક્તોને ભારે મુશ્કેલી
