Kheda News: નડિયાદમાં SMC ની મોટી કાર્યવાહી, હોટલના પાર્કિંગમાં પડેલી ટ્રકમાંથી દારૂ ઝડપ્યો

ટ્રકમાં તપાસ હાથ ધરતાં ભાંડો ફૂટ્યો

ઘટનાની વિગત મુજબ, સ્ટેટ મોનિટરિંગ સેલની ટીમને ચોક્કસ માહિતી મળી હતી કે નડિયાદના સહયોગ હોટલના પાર્કિંગ વિસ્તારમાં એક શંકાસ્પદ ટ્રક ઉભી છે, જેમાં ગેરકાયદેસર રીતે દારૂની હેરાફેરી કરવામાં આવી રહી છે. આ માહિતીને પગલે SMC ની ટીમે તાત્કાલિક સ્થળ પર પહોંચીને તપાસ હાથ ધરી હતી. તપાસ દરમિયાન, ટ્રકમાં પ્લાસ્ટિકની બોરીઓની પાછળ અત્યંત ચતુરાઈથી છુપાવેલો ભારતીય બનાવટનો વિદેશી દારૂનો મોટો જથ્થો મળી આવ્યો હતો.

દારૂ સહિતનો મુદ્દામાલ જપ્ત

પોલીસે ટ્રકની સઘન તપાસ કરતા તેમાંથી કુલ 5940 દારૂની બોટલો જપ્ત કરી હતી. આ ઓપરેશનમાં પોલીસે દારૂ ઉપરાંત ટ્રક (ગાડી નંબર GJ-25-U-9898) ને પણ કબ્જે કરી હતી. જપ્ત કરાયેલ દારૂ અને ટ્રકની કુલ અંદાજિત કિંમત ₹ 56,48,396 જેટલી થવા જાય છે.

ટ્રક માલિક અને દારૂનો જથ્થો મોકલનાર સામે કાર્યવાહી

આ મામલે સ્ટેટ મોનિટરિંગ સેલ દ્વારા ટ્રકના માલિક અને દારૂનો આ જથ્થો મોકલનાર આરોપીઓ સામે કાયદેસરની કાર્યવાહી હાથ ધરીને ગુનો નોંધવામાં આવ્યો છે. આટલી મોટી માત્રામાં વિદેશી દારૂનો જથ્થો કેવી રીતે અને કોના માટે લાવવામાં આવ્યો હતો, તે દિશામાં પોલીસ હવે ઊંડાણપૂર્વકની તપાસ કરી રહી છે. આ કાર્યવાહીથી બુટલેગરોમાં ફફડાટ વ્યાપી ગયો છે.

આ પણ વાંચોઃ Kheda News: મહીજમાં જમીન વેચાણના વિવાદે જોર પકડ્યું, શું અન્ય જમીનના ફોટા રજૂ કરી દસ્તાવેજ કરાવી લીધો?