આ ઘટનાની જાણ થતાં જ ભુજના સમસ્ત હિન્દુ સમાજ (Samast Hindu Samaj) ના સંગઠનો અને અગ્રણીઓ તાત્કાલિક ઘટનાસ્થળે દોડી આવ્યા હતા અને મેકડોનાલ્ડ્સ પ્રશાસન સામે ઉગ્ર વિરોધ નોંધાવ્યો હતો. સ્થાનિક લોકો અને સંગઠનોએ આક્ષેપ કર્યો છે કે, આ પ્રકારની ગંભીર બેદરકારીના કારણે સનાતન ધર્મના અનુયાયીઓની ધાર્મિક લાગણી દુભાઈ છે. ભુજ જેવા પવિત્ર અને સાંસ્કૃતિક નગરમાં આ પ્રકારનું કૃત્ય સાંખી લેવામાં નહીં આવે તેવી ચીમકી પણ ઉચ્ચારવામાં આવી છે.
મેકડોનાલ્ડ્સનું નોનવેજ કાઉન્ટર કાયમી ધોરણે બંધ કરવાની પ્રબળ માગ
સ્થાનિક હિન્દુ સંગઠનો દ્વારા મેકડોનાલ્ડ્સ (McDonald's) આઉટલેટની બહાર એકત્રિત થઈને સૂત્રોચ્ચાર કરવામાં આવ્યા હતા. પ્રદર્શનકારીઓએ માગ કરી છે કે આ આઉટલેટ પર ચાલતું નોનવેજ કાઉન્ટર કાયમી ધોરણે બંધ કરવામાં આવે. વિરોધ કરી રહેલા લોકોનું કહેવું છે કે, વેજ અને નોનવેજ ખોરાક એક જ રસોડામાં કે નજીકના કાઉન્ટર પર તૈયાર થતો હોવાથી વારંવાર આવી ભૂલો થાય છે, જે શાકાહારી લોકોના ધર્મને ભ્રષ્ટ કરવાનું વ્યવસ્થિત ષડયંત્ર હોઈ શકે છે. આ વિવાદને પગલે ભુજ શહેરમાં ભારેલા અગ્નિ જેવી સ્થિતિ સર્જાઈ છે અને લોકોમાં આ બ્રાન્ડ પ્રત્યે ભારે રોષ જોવા મળી રહ્યો છે.
ઘટના સમયે આઉટલેટના મેનેજર નશાની હાલતમાં હોવાનો ગંભીર આક્ષેપ
આ સમગ્ર વિવાદમાં ત્યારે નવો વળાંક આવ્યો જ્યારે વિરોધ કરવા પહોંચેલા અગ્રણીઓએ આઉટલેટના જવાબદાર મેનેજર (Manager) પર ગંભીર આરોપો લગાવ્યા. પ્રત્યક્ષદર્શીઓ અને હિન્દુ સમાજના હોદ્દેદારોના જણાવ્યા અનુસાર, ગઈકાલે રાત્રે જ્યારે આ ઘટના બની ત્યારે ત્યાં હાજર સ્ટોર મેનેજર નશા યુક્ત હાલતમાં (Under the influence of alcohol) હોવાનો આક્ષેપ કરાયો હતો.
ગ્રાહકો સાથે યોગ્ય વર્તન કરવાના બદલે મેનેજર ઉદ્ધત જવાબો આપી રહ્યો હતો. આ બાબતને સ્થાનિકોએ અત્યંત ગંભીર ગણાવી છે અને નશાખોર કર્મચારીઓ તેમજ ગ્રાહકોના સ્વાસ્થ્ય અને ધર્મ સાથે ચેડાં કરનારા જવાબદારો સામે કડક કાનૂની કાર્યવાહી (Strict Legal Action) કરવાની માગણી કરી છે.
ફૂડ એન્ડ ડ્રગ્સ વિભાગમાં સત્તાવાર ફરિયાદ નોંધાવવાની તજવીજ
આ મામલે માત્ર મૌખિક વિરોધ જ નહીં, પરંતુ કાયદાકીય લડત લડવાની પણ જાહેરાત કરવામાં આવી છે. હિન્દુ સમાજના અગ્રણીઓએ મીડિયા સમક્ષ જણાવ્યું હતું કે, તેઓ આ સમગ્ર ઘટના અંગે ગુજરાત સરકારના ફૂડ એન્ડ ડ્રગ્સ વિભાગ (Food and Drugs Department) માં સત્તાવાર લેખિત ફરિયાદ નોંધાવવા જઈ રહ્યા છે.
હલકી ગુણવત્તા, સેનિટાઈઝેશનના અભાવ અને ગ્રાહકોને ગેરમાર્ગે દોરીને નોનવેજ પીરસવા બદલ મેકડોનાલ્ડ્સનું લાયસન્સ રદ કરવાની માગ પણ કરવામાં આવશે. આગામી દિવસોમાં જો વહીવટી તંત્ર દ્વારા આ મામલે ત્વરિત પગલાં લેવામાં નહીં આવે તો આંદોલનને વધુ ઉગ્ર બનાવવાની ચેતવણી આપવામાં આવી છે.
આ પણ વાંચો: Viksit Bharat Rojgar Yojana: યુવાનોની દિવાળી, પીએમ મોદીએ વહેંચ્યા ₹2,400 કરોડ, સીધા ખાતામાં જમા!
