ઘરકામના બહાને વિશ્વાસ જીત્યો
પૂર્વ કચ્છમાં મિલકત સંબંધિત ગુનાઓને શોધી કાઢવા માટે પોલીસ મહાનિરીક્ષક ચીરાગ કોરડીયા (બોર્ડર રેન્જ) અને પોલીસ અધિક્ષક સાગર બાગમાર દ્વારા આદિપુર પોલીસને ખાસ સૂચનાઓ આપવામાં આવી હતી. તેના અનુસંધાને આદિપુર પોલીસ સ્ટેશન વિસ્તારમાં આવેલા વોર્ડ નં. 6/સીના એક મકાનમાં કામ કરતી નેપાળી મહિલાએ ઘરમાલિકનો વિશ્વાસ જીતી લીધો હતો.
પોલીસના જણાવ્યા મુજબ, જ્યારે મકાનમાલિક પરિવાર સાથે બહાર ગયો હતો ત્યારે મહિલાએ પોતાના અન્ય સાથીઓને બોલાવી મકાનમાં ઘરફોડ ચોરી આચરી હતી. આ મામલે આદિપુર પોલીસ સ્ટેશનમાં ભારતીય ન્યાય સંહિતા 2023ની કલમ 306, 305(એ), 331(3) અને 54 હેઠળ ગુનો નોંધાયો હતો.
ટેકનિકલ સર્વેલન્સથી મળી સફળતા
પોલીસ ઇન્સ્પેક્ટર એમ.સી. વાળાના માર્ગદર્શન હેઠળ પીએસઆઇ આર.એમ. ડુવા અને આદિપુર પોલીસ સ્ટાફે હ્યુમન ઇન્ટેલિજન્સ તથા સાઇબર ક્રાઇમ પોલીસ સ્ટેશન ગાંધીધામ અને લોકલ ક્રાઇમ બ્રાન્ચ ગાંધીધામની ટેકનિકલ ટીમની મદદથી તપાસ શરૂ કરી હતી. તપાસ દરમિયાન બાતમી મળી હતી કે ગુનામાં સંડોવાયેલી નેપાળી મહિલાઓ આદિપુર શહેરની વિવિધ સોસાયટીઓમાં ઘરકામ માટે મકાન શોધતી ફરી રહી હતી. આ માહિતીના આધારે પોલીસે અલગ-અલગ ટીમો બનાવી કાર્યવાહી હાથ ધરી અને આરોપીઓને વધુ કોઈ ગુનો કરે તે પહેલાં જ ઝડપી લીધા.
પુણે અને બેંગ્લુરુમાં પણ ચોરીઓ કબૂલ
સઘન પૂછપરછ દરમિયાન મહિલા આરોપીઓએ મહારાષ્ટ્રના પુણે શહેરમાં અલગ-અલગ ત્રણ મકાનોમાં તથા કર્ણાટકના બેંગ્લુરુમાં એક મકાનમાં ઘરકામ માટે રહી ઘરમાલિકોનો વિશ્વાસ જીતી ઘરફોડ ચોરીઓ આચરેલી હોવાની કબૂલાત કરી હતી. ચોરી કરાયેલ સોના-ચાંદીના દાગીના, કિંમતી વસ્તુઓ અને રોકડ રકમ નેપાળ લઈ જઈ વેચી નાખવામાં આવી હોવાનું આરોપીઓએ જણાવ્યું હતું. વેચાણમાંથી મળેલી રકમ ખાવા-પીવા, ફરવા, ફ્લાઇટ ટિકિટ અને ખાનગી વાહનના ખર્ચમાં વાપરવામાં આવતી હતી.
મોડસ ઓપરેન્ડી ચોંકાવનારી
પોલીસ તપાસમાં સામે આવ્યું છે કે આ ટોળકી ભારતના વિવિધ શહેરોમાં જઈ પોશ વિસ્તારોમાં આવેલા સમૃદ્ધ મકાનો પસંદ કરતી હતી. ત્યારબાદ તેઓ ઘરકામ કરનાર નોકર તરીકે કામ મેળવી ધીમે ધીમે પરિવારનો વિશ્વાસ જીતતા હતા. પરિવારના સભ્યોની હિલચાલ પર નજર રાખી, તેઓ લાંબા સમય માટે બહાર જાય ત્યારે પોતાના સાથીઓને જાણ કરતા અને પૂર્વ આયોજન મુજબ મકાનમાં પ્રવેશ કરી કિંમતી માલમત્તાની ચોરી કરી ફરાર થઈ જતા હતા. હાલ આદિપુર પોલીસે પકડાયેલી મહિલાઓ પાસેથી મુદ્દામાલ જપ્ત કરી વધુ કાર્યવાહી હાથ ધરી છે.
આ પણ વાંચોઃ Vadodara ની સયાજી હોસ્પિટલ ફરી વિવાદમાં, દાઝેલા બાળક સાથે હેરાનગતિનો વીડિયો વાયરલ, હોસ્પિટલના RMO એ શું આપ્યો જવાબ?
