Kutch News: ભચાઉમાં કાળજું કંપાવતો અકસ્માત, બ્રેક વાગતા દરવાજા બહાર પટકાયેલા ST બસ ડ્રાઈવરને ટ્રેલરે કચડ્યો

 Kutch ના ભચાઉમાં કાળજું કંપાવતો અકસ્માત

પ્રાપ્ત વિગતો અનુસાર, ભુજ ડેપોના 43 વર્ષીય ડ્રાઈવર પ્રવિણ ચેતનભાઈ રાઠોડ (રહે. સુમરાસર શેખ) બાડમેર-ભુજ રૂટની એસ.ટી. બસ ચલાવી રહ્યા હતા. ભચાઉના ચિરઈ પાસે પહોંચતી વખતે બસમાં અચાનક બ્રેક મારવામાં આવી હતી, તે સમયે પ્રવિણભાઈ દરવાજા પાસે ઊભા હોવાથી બ્રેકનો ઝટકો લાગતા તેઓ સીધા દરવાજાની બહાર ફંગોળાઈ ગયા હતા. તે જ દરમિયાન પાછળથી પૂરપાટ ઝડપે આવી રહેલા એક ટ્રેલરે તેમને પોતાની અડફેટે લઈ લીધા હતા. ટ્રેલરની ભયાનક અડફેટે આવવાથી પ્રવિણભાઈનું ઘટનાસ્થળે જ કમકમાટીભર્યું મોત નીપજ્યું હતું.

મામાના અવસાન બાદ રજા પૂરી કરી પરત ફરતા નડ્યો અકસ્માત

આ કરુણ દુર્ઘટના પાછળ પરિવાર પર વધુ એક આભ તૂટી પડ્યાનું સામે આવ્યું છે. મૃતક પ્રવિણભાઈના મામાનું ગયા સપ્તાહે જ થરાદ ખાતે હૃદયરોગના હુમલાથી અવસાન થયું હતું. પરિવાર તે શોકમાંથી બહાર આવી રહ્યો હતો અને રજા પૂરી કરી પરિવાર સાથે થરાદથી પરત ફરી રહ્યા હતા, તે દરમિયાન રસ્તામાં જ આ ગોઝારી ઘટના સર્જાતા પરિવાર પર દુઃખોનો પહાડ તૂટી પડ્યો છે. આ અકસ્માતને પગલે આસપાસના વિસ્તારમાં ભારે અરેરાટી વ્યાપી ગઈ છે.

આ પણ વાંચો: Jamnagar News: "તમને જોઈ લઈશું" કહી પોલીસકર્મીને ઝાપટ મારનાર બે શખ્સો પોલીસના સકંજામાં, પોલીસે કાઢ્યું સરઘસ