મુખ્યમંત્રી ભૂપેન્દ્ર પટેલની મોટી ભેટ, મુન્દ્રા પોર્ટ અને ગ્રામીણ કનેક્ટિવિટી વધુ મજબૂત બનશે
કચ્છ જિલ્લાના ગ્રામીણ અને દરિયાકાંઠાના વિસ્તારોને હાઈટેક રોડ કનેક્ટિવિટી પૂરી પાડવાના જનહિતકારી હેતુ સાથે આ ભંડોળ ફાળવવામાં આવ્યું છે. આ પ્રોજેક્ટ હેઠળ મુન્દ્રા, લુણી અને વડાલા રોડના 4.1 કિલોમીટર તેમજ દેશલપર-સીરચા રોડના 5.1 કિલોમીટરના માર્ગનું વિસ્તૃતિકરણ અને સુધારણા કરવામાં આવશે. આ ઉપરાંત, ટ્રાફિકની સમસ્યા હલ કરવા માટે મુન્દ્રા, ઝરપરા, કાંડગરા, ધ્રબ અને ઝરપરા ગામના 5.5 કિલોમીટરના બાયપાસ રોડ તથા નાવીનલ ગામના 3.3 કિલોમીટરના બાયપાસ રોડને મંજૂરી અપાઈ છે. મોટા કાંડગરા ગામના 4.5 કિલોમીટર અને મુન્દ્રા-ઝરપરા-કાંડગરા રોડના 20 કિલોમીટરના લાંબા પટ્ટાને પણ ફોરલેન બનાવવામાં આવશે.
ભારે વાહનોની અવરજવર સરળ બનશે અને માલસામાનનું પરિવહન ઝડપી થશે
નવા બાયપાસ રોડ બનવાના કારણે મુન્દ્રા પોર્ટ અને તેની આસપાસના નાના-મોટા ઇન્ડસ્ટ્રીયલ તેમજ કોમર્શિયલ વિસ્તારોમાં અવરજવર કરતા ભારે વાહનોને સિટીના ટ્રાફિકમાં ફસાયા વગર સીધો રસ્તો મળશે. આનાથી સમય અને ઇંધણ બંનેની બચત થશે. વાહનોના આ સુરક્ષિત અને ઝડપી માલ પરિવહનને કારણે સ્થાનિક ઉદ્યોગોના વિકાસને નવી ગતિ મળશે અને માર્ગ અકસ્માતોની સંભાવના પણ ઘણી ઓછી થઈ જશે.
પ્રવાસન ક્ષેત્રે નવી ક્રાંતિ આવશે અને સ્થાનિક લોકોનું ઈઝ ઓફ લિવિંગ વધશે
આ માર્ગોના સર્વાંગી વિકાસના કારણે માત્ર ઉદ્યોગોને જ નહીં, પરંતુ કચ્છના વૈશ્વિક પ્રવાસન ક્ષેત્રને પણ મોટો ફાયદો થશે. રસ્તાઓ સારા થવાથી સફેદ રણ અને મુન્દ્રાના દરિયાકાંઠાના પ્રવાસીઓ માટે મુસાફરી વધુ સુવિધાજનક અને સમય બચાવનારી બનશે. ગ્રામીણ વસ્તીને જિલ્લા મથકો અને હાઈવે સાથે જોડતા આ ફોરલેન માર્ગો સ્થાનિક લોકોના રોજિંદા જીવનધોરણ અને રોજગારની તકોમાં મોટો સુધારો લાવશે, જે રાજ્ય સરકારના ઈઝ ઓફ લિવિંગના સંકલ્પને સાકાર કરશે.
આ પણ વાંચો : Kutch : મુન્દ્રા બંદરે ગુજરાત ATS ની મોટી કાર્યવાહી, પાકિસ્તાનથી આવેલા જહાજની સઘન તપાસ શરૂ
