Mundra Port coal scam: મુન્દ્રા પોર્ટ પર 5 વર્ષથી ચાલતા કૌભાંડનો પર્દાફાશ, 17 કરોડથી વધુનો કોલસો ગાયબ!

ગુણવત્તા બદલીને આચરવામાં આવ્યું મોટું પાપ

આ સમગ્ર કૌભાંડમાં આયાત કરાયેલા કિંમતી અમેરિકન કોલસાને ટાર્ગેટ કરવામાં આવ્યો હતો. મળતી માહિતી મુજબ આરોપીઓ વિદેશથી આવતા ઉચ્ચ ગુણવત્તાના મોંઘા કોલસાને બારોબાર સગેવગે કરી નાખતા હતા. તેની જગ્યાએ ફેક્ટરીઓ અને કંપનીઓમાં અત્યંત નીચી ગુણવત્તાનો સસ્તો કોલસો સપ્લાય કરી દેવામાં આવતો હતો. આ ગેરકાયદે પ્રવૃત્તિ લાંબા સમય સુધી ચાલતી રહી હતી. અને કંપનીને અંધારામાં રાખીને મોટું નુકસાન પહોંચાડવામાં આવતું હતું.

5 વર્ષ સુધી સતત ચાલતી રહી લૂંટ

આ આખું કૌભાંડ વર્ષ 2020 થી વર્ષ 2025 દરમિયાન સતત આચરવામાં આવ્યું હતું. ભૌતિક ચકાસણી કરતા માલૂમ પડ્યું છે કે, કંપનીના ઓફિશિયલ રેકોર્ડ કરતાં કુલ 14,864 મેટ્રિક ટન કોલસો ઓછો મળ્યો છે. આ ગાયબ થયેલા કોલસાની કુલ બજાર કિંમત 17 કરોડ 83 લાખ 68 હજાર રૂપિયાથી વધુ આંકવામાં આવી છે.

દિલ્હી અને ગાંધીધામના વેપારીઓ સામે ફરિયાદ

આ મસમોટી આર્થિક છેતરપિંડીના તાર છેક દેશની રાજધાની સુધી જોડાયેલા છે. મુન્દ્રા પોલીસે આ મામલે તપાસ કરીને કુલ 4 મોટા કોલસા ડીલરો સામે ગુનો નોંધી લીધો છે. પકડાયેલા નામોમાં દિલ્હી અને ગાંધીધામના પ્રખ્યાત વેપારીઓ સામેલ છે. આ તમામ આરોપીઓ મિલીભગત કરીને આંતરરાષ્ટ્રીય ગુણવત્તાના માલની ચોરી કરતા હતા. મુન્દ્રા પોલીસની જુદી જુદી ટીમો અત્યારે આ આરોપીઓની ધરપકડ કરવા માટે ચક્રો ગતિમાન કરી રહી છે.

આ પણ વાંચો--- Bhavnagar News: સરકારી યોજનાના નામે મોટું કૌભાંડ! રમતગમતનું આખું મેદાન ખોદી નાખ્યું!