Kutch News: આડેસર પોલીસની મોટી કાર્યવાહી, એમ.ડી. ડ્રગ્સ સાથે 3 આરોપીને પકડ્યા, 2 ફરાર

કારની તલાશી લેતાં ડ્રગ્સ મળ્યું

મળતી માહિતી મુજબ, આડેસર પોલીસ ચેકપોસ્ટ (Police Checkpost) પર વાહન ચેકિંગની કામગીરી ચાલી રહી હતી. આ દરમિયાન શંકાસ્પદ વાહનોનું સઘન નિરીક્ષણ કરવામાં આવતું હતું. પોલીસને મળેલી બાતમી અને સતર્કતાના કારણે એક સ્વિફ્ટ કારને અટકાવી તેની તલાશી લેવામાં આવી હતી. તપાસ દરમિયાન પોલીસને ગાડીમાંથી કુલ 98.890 ગ્રામ એમ.ડી. ડ્રગ્સ મળી આવ્યું હતું. પકડાયેલા આ ડ્રગ્સની અંદાજિત બજાર કિંમત રૂપિયા 2.96 લાખ હોવાનું સામે આવ્યું છે.

રૂપિયા 6.11 લાખનો મુદ્દામાલ જપ્ત

પોલીસે ડ્રગ્સના જથ્થા ઉપરાંત ગુનામાં વપરાયેલી સ્વિફ્ટ કાર અને ત્રણ મોબાઈલ ફોન પણ જપ્ત કર્યા છે. મુદ્દામાલની કુલ કિંમત રૂપિયા 6.11 લાખ જેટલી થાય છે. પોલીસની પ્રાથમિક તપાસમાં બહાર આવ્યું છે કે, પકડાયેલા ત્રણેય આરોપીઓ રાજસ્થાન અને કચ્છના રહેવાસી છે. આ ગંભીર ગુનામાં અન્ય બે આરોપીઓ, જેમાં ભુજનો એક વ્યક્તિ પણ સામેલ છે, તે હાલ ફરાર (Absconding) છે.

પોલીસે વધુ કાર્યવાહી હાથ ધરી

પોલીસે તમામ આરોપીઓ વિરુદ્ધ એન.ડી.પી.એસ. એક્ટ (NDPS Act) હેઠળ ગુનો નોંધીને આગળની તપાસ શરૂ કરી છે. આ સમગ્ર કેસની તપાસની જવાબદારી રાપર પોલીસ ઇન્સ્પેક્ટરને સોંપવામાં આવી છે. પોલીસના આ કડક વલણથી નશાના વેપારીઓમાં ફફડાટ ફેલાઈ ગયો છે અને ફરાર આરોપીઓને ઝડપી લેવા માટે પોલીસ દ્વારા અલગ-અલગ ટીમો બનાવી શોધખોળ તેજ કરવામાં આવી છે.

આ પણ વાંચોઃ Chaitar Vasava News: MLA ચૈતર વસાવાને 7 વર્ષની સજા, હવે શું કરશે AAP નેતાઓ?