COVID-19 : કોરોના મહામારીની વર્તમાન સ્થિતિ સંદર્ભે કઈ-કઈ કાળજી લેશો ?
- ભારતમાં પણ કેરળ, મહારાષ્ટ્ર, ગુજરાત અને તમિલનાડુ જેવા રાજ્યોમાં COVID-19 ના કેસ નોંધાયા છે
- કોવિડ-19નો નવા વેરિઅન્ટ JN.1 અત્યાર સુધી ફક્ત હળવાથી મધ્યમ લક્ષણો જ પેદા કરે છે
- આરોગ્ય નિષ્ણાતોના મતે વૃદ્ધો, સગર્ભા સ્ત્રીઓ અને અન્ય બીમારીઓથી પીડાતા લોકોએ ખાસ સાવધ રહેવું
COVID-19 : હોંગકોંગ અને સિંગાપોર સહિત એશિયાના અનેક દેશોમાં કોરોનાએ માથુ ઉચક્યું છે. ભારતમાં પણ કેરળ, મહારાષ્ટ્ર, ગુજરાત અને તમિલનાડુ જેવા રાજ્યોમાં COVID-19 ના કેસ નોંધાયા છે. કર્ણાટકના આરોગ્ય પ્રધાન દિનેશ ગુંડુ રાવના જણાવ્યા અનુસાર રાજ્યમાં કોવિડ-19 ના 16 સક્રિય કેસ નોંધાયા છે. અન્ય રાજ્ય તમિલનાડુમાં કોવિડ-19 ના 12 નવા કેસ નોંધાયા છે. ગુજરાતના અમદાવાદમાં એક જ દિવસમાં 7 નવા કેસ નોંધાયા છે. અમદાવાદ સિવાય મુંબઈ અને ચેન્નાઈમાં પણ કોરોનાએ માથુ ઉંચક્યું છે. વિશ્વ આરોગ્ય સંસ્થા (WHO) એ મે 2023 માં રોગચાળાના અંતની જાહેરાત કરી હોવા છતાં COVID-19 નું સંક્રમણ ફેલાઈ રહ્યું છે. ભારતમાં મોટાભાગના કેસ હળવા છે તેમ છતાં આરોગ્ય નિષ્ણાતોના મતે લોકોએ સાવધાની રાખવી અનિવાર્ય છે. ખાસ કરીને વૃદ્ધો, સગર્ભા સ્ત્રીઓ અને અન્ય બીમારીઓથી પીડાતા લોકોએ તો ખાસ સાવધ રહેવું.
JN.1 વેરિઅન્ટ
કોવિડ-19નો નવા વેરિઅન્ટ JN.1 અત્યાર સુધી ફક્ત હળવાથી મધ્યમ લક્ષણો જ પેદા કરે છે અને ગંભીર રોગનું જોખમ ઓછું છે. નિષ્ણાતો હાલમાં ફરતા વેરિઅન્ટ્સને ઓળખવા માટે પરીક્ષણ અને જીનોમિક સર્વેલન્સ પર પણ ભાર મૂકી રહ્યા છે. ગભરાવાની કોઈ જરૂર નથી. કોવિડ-19 ક્યારેય સંપૂર્ણપણે ગાયબ થયો નહતો. તેના નવા વેરિઅન્ટ એક્ટિવ થતા જ રહે છે. ખાસ કરીને વૃદ્ધો અથવા અન્ય રોગ ધરાવતા લોકોમાં વાયરસ સંક્રમણની તક શોધે છે. દક્ષિણ પૂર્વ એશિયામાં કોવિડ-19ના કેસોમાં વધારો મુખ્યત્વે JN.1 વેરિઅન્ટને કારણે છે, જે ઓમિક્રોન BA.2.86 વેરિઅન્ટનો વંશજ છે. WHO મુજબ JN.1 વેરિઅન્ટમાં લગભગ 30 મ્યુટેશન છે અને તેમાંથી LF.7 અને NB.1.8 તાજેતરમાં નોંધાયેલા કેસોમાં 2 સૌથી સામાન્ય વેરિઅન્ટ છે.
આ પણ વાંચોઃ Corona Alert: Mumbai માં ફરી કોરોનાની દહેશત! 52 દર્દીઓ પોઝિટિવ, તંત્ર એલર્ટ પર
માનસિક સ્વસ્થતા બહુ જરુરી
કોવિડ-19 મહામારીએ શરીરને નબળું પાડવા ઉપરાંત લોકમાનસ પર બહુ ખરાબ પ્રભાવ પાડ્યો છે. જર્નલ ઓફ ફેમિલી મેડિસિન એન્ડ પ્રાઈમરી કેરમાં પ્રકાશિત થયેલા એક રિપોર્ટ અનુસાર મહામારી દરમિયાન સમગ્ર ભારતમાં માનસિક સ્વાસ્થ્ય સમસ્યાઓમાં તીવ્ર વધારો થયો છે, જેમાં શહેરી વસ્તી ખાસ કરીને પ્રભાવિત થઈ છે. વૈશ્વિક સ્તરે વિશ્વ આરોગ્ય સંગઠને કોરોના ફાટી નીકળ્યાના પ્રથમ વર્ષ દરમિયાન ચિંતા અને હતાશાના કેસોમાં 25 ટકાનો વધારો થવાનું જણાવ્યું હતું.
કેવી કાળજી લેવી જોઈએ ?
WHO, સરકાર અને આરોગ્ય નિષ્ણાતોના મતે જો કોરોના મહામારીનો ચેપ વધે તો માસ્ક પહેરવા, નિયમિતપણે હાથ ધોવા અને શારીરિક અંતર જાળવવા જેવી કાળજી લેવી જોઈએ. JN.1 જેવા નવા પ્રકારોને ખૂબ જ હળવા પ્રકાર માનવામાં આવે છે. હાલની રોગપ્રતિકારક શક્તિ, ભલે તે રસી દ્વારા પ્રાપ્ત કરવામાં આવી હોય પણ તે અસરકારક છે. હાલમાં એવા કોઈ સંકેત નથી કે વધારાના અથવા વેરિઅન્ટ-વિશિષ્ટ બૂસ્ટર ડોઝની જરૂર છે. ભીડવાળા વિસ્તારોમાં માસ્ક પહેરવા, હાથની સ્વચ્છતા જાળવવા જેવી મૂળભૂત સાવચેતીઓનું પાલન કરવાથી પરિસ્થિતિ નિયંત્રણમાં રહી શકે છે.
આ પણ વાંચોઃ Corona Virus : સાવચેત રહેજો! અમદાવાદમાં કાળમુખો કોરોના ફરી ત્રાટક્યો! 7 કેસ નોંધાયા