Diet and Fitness Confusion : શું ખાવું? ચાલો શરીરને જ પૂછીએ!
આજના સમયમાં હેલ્થ અને ડાયટની વધુ પડતી માહિતી આપણને સ્માર્ટ બનાવે છે કે ડમ્બ? જાણો શા માટે કોઈ ઍપ કે એક્સપર્ટ કરતાં તમારા શરીરનો અવાજ સાંભળવો સૌથી વધુ જરૂરી છે.
Advertisement
Diet and Fitness Confusion : આજના સમયમાં હેલ્થ અને ડાયટની વધુ પડતી માહિતી આપણને સ્માર્ટ બનાવે છે કે ડમ્બ? જાણો શા માટે કોઈ ઍપ કે એક્સપર્ટ કરતાં તમારા શરીરનો અવાજ સાંભળવો સૌથી વધુ જરૂરી છે.
Diet and Fitness Confusion : એક સમય હતો જ્યારે આપણા વડીલોને ક્યારે, શું અને કેટલું ખાવું તે માટે કોઈ ડાયટિશ્યન કે સ્માર્ટફોન ઍપની જરૂર પડતી નહોતી. તેમને પોતાનું શરીર જ બધું કહી દેતું અને તેઓ એ આંતરિક અવાજને બરાબર સમજતા. પરંતુ આજે પરિસ્થિતિ સાવ બદલાઈ ગઈ છે. ટેક્નોલૉજી અને ઇન્ટરનેટના જમાનામાં આપણી પાસે હેલ્થ(Health) અને ફિટનેસની માહિતીનો એટલો મોટો ભંડાર છે કે આપણે આપણા પોતાના શરીરનો અવાજ સાંભળવાનું જ ભૂલી ગયા છીએ. શું ખાવું, ક્યારે સૂવું અને કેટલી કસરત કરવી તે માટે આપણે નિષ્ણાતો કે ગૂગલ પર નિર્ભર બની ગયા છીએ. ત્યારે એક મોટો સવાલ એ ઊભો થાય છે કે, સ્વાસ્થ્ય વિશેની આટલી બધી માહિતી આપણને ખરેખર સ્માર્ટ બનાવી રહી છે કે પછી વધારે મૂંઝવણમાં મૂકીને ડમ્બ?
Diet and Fitness Confusion : સોશ્યલ લાઇફ પર હાવી થતો ‘વેઇટલૉસ’ ક્રેઝ
1-લોકો મળે ત્યારે સ્વાસ્થ્ય કે સુખ-દુઃખ પૂછવાને બદલે "તમે વજન ઉતાર્યું?" કે "થોડા જાડા થઈ ગયા" જેવી વાતો જ ચર્ચાના કેન્દ્રમાં રહે છે.
2-ફ્રેન્ડ્સ સાથે રેસ્ટોરાંમાં ગયા હોઈએ અને કોઈ એક વ્યક્તિ "સ્ટીમ ફૂડ" કે "સૅલડ"નો આગ્રહ રાખે, ત્યારે દિલથી સમોસા કે ચાટ ખાવા ગયેલી વ્યક્તિ કારણ વિનાના ગિલ્ટમાં મુકાઈ જાય છે.
3-વજનનો કાંટો જ જીવનનું એકમાત્ર લક્ષ્ય બની ગયો હોય તેવો માહોલ સર્જાયો છે.
માહિતીના અતિરેકથી ઊભું થતું કન્ફ્યુઝન
કોવિડ સમયથી ગિલોય-Giloy કે આમળા-Amla નો આંધળો અને વધુ પડતો ઉપયોગ શરૂ થઈ ગયો છે.
સવારના ઊઠીને જીરું, ધાણા કે વરિયાળીનું પાણી પીવું કે કયા વાસણમાં રાંધવું, એ બાબતે સોશ્યલ મીડિયાની રીલ્સ જોઈને લોકો રાતોરાત પોતાની વર્ષો જૂની જીવનશૈલી બદલી નાખે છે.
વધુ પડતી માહિતીને કારણે મગજ પ્રોસેસ નથી કરી શકતું, પરિણામે કન્ફ્યુઝન ઊભું થાય છે અને ડાયટ પ્રત્યેનો ડર વધે છે. આજકાલ તો લોકો બહાર જમવા જાય ત્યારે "મારે એક રોટલી ખાવી કે બે?" એવું પણ ડાયટિશ્યનને પૂછતા થઈ ગયા છે.
શરીરનો અવાજ સાંભળવો જ સૌથી શ્રેષ્ઠ ડાયટ
- ભૂખને સમજો: કેટલી કૅલરી લેવી એ કોઈ ઍપ નક્કી ન કરી શકે. કુદરતી ભૂખને ઓળખો અને શરીરને જરૂર હોય તેટલું જ પોષણ આપો.
- ક્ષમતા પારખો: કસરત કે ટ્રેડમિલ પર દોડતી વખતે જો શરીર સાથ ન આપે કે શ્વાસ ચડે, તો હાર્ટ-અટૅકની રાહ જોયા વિના ત્યાં જ અટકી જવાની સમજદારી કેળવો.
- લક્ષણોને અવગણશો નહીં: શરીર થાક, બેચેની કે દુખાવા દ્વારા સિગ્નલ આપે છે. શરીર આરામ માંગે ત્યારે તેને પરાણે પાર્ટીમાં ન ઢસડો અને બેઠાડુ જીવનમાં કળતર થાય તો ફિઝિકલ એક્ટિવિટી વધારો.
- ચેતવણી ચિહ્નો: સિગારેટ કે અન્ય ખરાબ આદતો વખતે શરીર ખાંસી, હોઠ કાળા પડવા કે શ્વાસની તકલીફ દ્વારા ચેતવે છે, તેને ગંભીરતાથી લો.
હેલ્થ પ્રત્યે જાગૃત રહેવું એ આજના સમયની માંગ ચોક્કસ છે, પણ એ જાગૃતિ આપણા પર બોજ ન બની જવી જોઈએ. ઇન્ટરનેટ પર મળતી દરેક સલાહ કે સોશ્યલ મીડિયાના ઇન્ફ્લુઅન્સરની દરેક ટિપ આપણા શરીર માટે યોગ્ય જ હોય તે જરૂરી નથી. કુદરતે માનવશરીરને એક અદ્ભુત અને સ્માર્ટ મશીન બનાવ્યું છે, જે પોતાની જરૂરિયાતો અને તકલીફો જાતે જ કમ્યુનિકેટ કરે છે. તેને શું સદે છે અને શું નહીં, તે કોઈ ઍપ કે ત્રીજી વ્યક્તિ કરતાં તમારું શરીર વધુ સારી રીતે જાણે છે. માહિતીનો ઉપયોગ જ્ઞાન વધારવા માટે કરો, પરંતુ અંતિમ નિર્ણય તો તમારા શરીરની પ્રતિક્રિયાઓ સાંભળીને જ લો. ચાલો, આ માહિતીના અતિરેકમાંથી થોડા બહાર આવીએ અને ફરી એકવાર આપણા શરીર સાથે સાચો સંવાદ સાધવાની શરૂઆત કરીએ. તમે તમારા શરીરનો અવાજ છેલ્લે ક્યારે સાંભળ્યો હતો?