પરંતુ ચંદનનો ઉપયોગ માત્ર ચહેરો ગોરો કરવા માટે જ થાય છે એવું માનવું યોગ્ય નથી. તેનો મુખ્ય ફાયદો ત્વચાને તાજગી આપવી, વધારાના ઓઈલને નિયંત્રિત કરવામાં મદદ કરવી અને ત્વચાને સ્વચ્છ તથા સ્મૂથ દેખાવ આપવાનો છે. ચાલો જાણીએ કે ઓઈલી અને ડલ સ્કિન માટે ચંદનના કયા 3 ફેસ પેક ઉપયોગી થઈ શકે છે અને તેનો યોગ્ય રીતે ઉપયોગ કેવી રીતે કરવો.

ચંદન ઓઈલી સ્કિન માટે કેમ લોકપ્રિય છે?

ઓઈલી સ્કિનમાં સેબમ એટલે કે ત્વચામાં બનતું કુદરતી તેલ સામાન્ય કરતાં વધુ પ્રમાણમાં બનતું હોય છે. સેબમ ત્વચા માટે જરૂરી છે, પરંતુ તેનું પ્રમાણ વધારે થઈ જાય તો ચહેરો ચીકણો દેખાઈ શકે છે અને પોર્સમાં તેલ તથા મૃત કોષો એકઠા થવાથી બ્રેકઆઉટની શક્યતા વધી શકે છે. ચંદન આધારિત પેક ત્વચામાંથી વધારાનું તેલ દૂર કરવામાં મદદ કરી શકે છે. સાથે જ તેની ઠંડક આપતી અસર ચહેરાને ફ્રેશ અનુભવ કરાવી શકે છે. જોકે, ચંદનને પિમ્પલ્સ અથવા કોઈપણ સ્કિન કન્ડિશનનો ચોક્કસ ઈલાજ માનવો યોગ્ય નથી. ઘરેલુ ફેસ પેકનો ઉપયોગ સ્કિન કેરની એક સહાયક રીત તરીકે કરવો વધુ યોગ્ય છે.

ઓઈલી ત્વચા માટે ચંદન અને ગુલાબજળનો અક્ષિર ફેસ પેક

જો તમારી ત્વચા વારંવાર ઓઈલી થઈ જતી હોય અને ચહેરા પર વધારાનું તેલ દેખાતું હોય, તો ચંદન અને ગુલાબજળથી બનતો આ ઘરેલુ ફેસ પેક તમારા માટે ઉત્તમ વિકલ્પ સાબિત થઈ શકે છે. આ પેક તૈયાર કરવા માટે 1 ટેબલસ્પૂન ચંદન પાઉડર અને 2 ટીસ્પૂન શુદ્ધ ગુલાબજળને એકસમાન રીતે મિક્સ કરીને મધ્યમસરની સ્મૂથ પેસ્ટ બનાવી લો, જે ન તો વધુ પાતળી હોય કે ન તો ખૂબ જાડી. હવે સ્વચ્છ કરેલા ચહેરા તથા ગળા પર આ પેકનું પાતળું સ્તર લગાવીને 15 થી 20 મિનિટ સુધી સૂકવવા દો અને ત્યારબાદ તાજા પાણીથી હળવા હાથે ધોઈ લો.

ચંદનની ઠંડક અને ગુલાબજળના ગુણો ત્વચાને તાજગી અને હળવાશનો અનુભવ કરાવે છે, જેનાથી ચહેરા પરનું વધારાનું ઓઈલ ઘટે છે અને ત્વચા લાંબા સમય સુધી ફ્રેશ તેમજ ખીલેલી દેખાય છે, જોકે જો તમારી ત્વચા અત્યંત સંવેદનશીલ હોય તો આખા ચહેરા પર પ્રયોગ કરતા પહેલા ત્વચાના નાના હિસ્સા પર પેચ ટેસ્ટ કરવાનું ભૂલશો નહીં.

ચંદન, હળદર અને બેસનનો ફેસ પેક

પ્રદૂષણ, ધૂળ અને સૂર્યના તાપને કારણે જ્યારે ત્વચા પોતાની ચમક ગુમાવીને નિસ્તેજ બની જાય છે, ત્યારે પરંપરાગત ઘરેલુ નુસ્ખા તરીકે ચંદન, બેસન અને હળદરનો પેક ખૂબ જ ગુણકારી સાબિત થાય છે. આ કમાલનો ફેસ પેક બનાવવા માટે એક ટીસ્પૂન ચંદન પાઉડર, અડધી ટીસ્પૂન બેસન અને એક ચપટી હળદર લઈને તેમાં જરૂરિયાત મુજબ પાણી અથવા થોડું કાચું દૂધ ઉમેરીને મધ્યમસરની સ્મૂથ પેસ્ટ તૈયાર કરો. સ્વચ્છ ચહેરા પર આ પેકને લગાવીને 10 થી 15 મિનિટ સુધી રહેવા દો અને યાદ રાખો કે તેને ત્વચા પર સંપૂર્ણપણે સૂકાઈ જવા દેવાની જરૂર નથી.

ત્યારબાદ તાજા પાણીથી હળવા હાથે ચહેરો સાફ કરી લો. આ પેકમાં રહેલું બેસન ત્વચાની અંદર રહેલી અશુદ્ધિઓ અને મૃત કોષોને દૂર કરે છે, ચંદન ત્વચાને શીતળતા અને તાજગી આપે છે, જ્યારે હળદર ત્વચાની સંભાળ માટે ઉત્તમ ગુણો પૂરા પાડે છે. જોકે ખાસ ધ્યાન રાખવું કે ચહેરા પર ખીલ કે પિમ્પલ્સની સમસ્યા હોય ત્યારે આ પેક લગાવતી કે કાઢતી વખતે ત્વચાને બિલકુલ ઘસવી નહીં, જેથી બળતરાથી બચી શકાય.

ચંદન અને મુલતાની માટીનો ફેસ પેક

ઓઈલી ત્વચા પર સતત જમા થતા વધારાના તેલથી પરેશાન લોકો માટે ચંદન અને મુલતાની માટીનું મિશ્રણ એક અત્યંત લોકપ્રિય અને અસરકારક ઘરેલુ ઉપાય છે. આ ફેસ પેક તૈયાર કરવા માટે એક ટીસ્પૂન ચંદન પાઉડર, એક ટીસ્પૂન મુલતાની માટી અને એક ટીસ્પૂન એલોવેરા જેલ લઈને તેમાં જરૂરિયાત મુજબ ગુલાબજળ ઉમેરીને સરખી પેસ્ટ બનાવી લો. હવે આ પેકને ચહેરા પર લગાવીને આશરે 15 થી 20 મિનિટ સુધી રહેવા દો અને ત્યારબાદ સાદા પાણીથી ચહેરો ધોઈ લો. આ પેકમાં રહેલી મુલતાની માટી ત્વચાનું વધારાનું તેલ શોષી લે છે, ચંદન ચહેરાને ઠંડક અને તાજગી બક્ષે છે, જ્યારે એલોવેરા જેલ ત્વચાને કુદરતી રીતે હાઇડ્રેટેડ અને નરમ રાખવામાં મદદ કરે છે; જોકે, જો તમારી ત્વચા ખૂબ જ સૂકી કે સંવેદનશીલ હોય તો મુલતાની માટીનો વારંવાર ઉપયોગ ત્વચાને વધુ શુષ્ક બનાવી શકે છે તેથી આ બાબતે ખાસ સાવધાની રાખવી.

ચંદનનો ફેસ પેક લગાવતી વખતે કઈ ભૂલો ન કરવી જોઈએ?

કુદરતી ઘટકોથી બનેલા ફેસ પેક ત્વચા માટે ગુણકારી હોવા છતાં તેનો ઉપયોગ કરતી વખતે કેટલીક મહત્વપૂર્ણ બાબતોની કાળજી રાખવી ખૂબ અનિવાર્ય છે, જેમાં સૌથી પહેલાં કોઈપણ નવી સામગ્રી કે ઘટકનો પહેલીવાર ઉપયોગ કરતા અગાઉ ત્વચા પર પેચ ટેસ્ટ અવશ્ય કરી લેવો જેથી લાલાશ કે બળતરા જેવી એલર્જીથી બચી શકાય. ઉપરાંત, ત્વચા ઓઈલી હોવા છતાં નિયમિત કે દરરોજ આવા ફેસ પેક લગાવવાનું ટાળવું જોઈએ કારણ કે વધુ પડતા ક્લે અથવા ડ્રાયિંગ માસ્ક ત્વચાને વધુ પડતી સૂકી અને નિર્જીવ બનાવી શકે છે, તેમજ ચહેરા પર સક્રિય પિમ્પલ્સ કે ખીલ હોય ત્યારે પેક સાફ કરતી વખતે ત્વચાને બિલકુલ ઘસવી નહીં જેથી સોજો કે બળતરા વધે નહીં.

ફેસ પેક ધોઈ લીધા બાદ ઓઈલી ત્વચાને પણ હાઇડ્રેશનની જરૂર હોય છે તેથી હંમેશા હળવું અને નોન-કોમેડોજેનિક મોઈશ્ચરાઈઝર લગાવવું જોઈએ, અને છેલ્લે, ત્વચાની યોગ્ય કાળજી માટે માત્ર ઘરેલુ નુસ્કા પૂરતા નથી પરંતુ દિવસના સમયે યોગ્ય એસ.પી.એફ. (SPF) યુક્ત બ્રોડ-સ્પેક્ટ્રમ સનસ્ક્રીનનો ઉપયોગ કરવો પણ એટલો જ આવશ્યક છે જેથી સૂર્યપ્રકાશ અને પિગમેન્ટેશનથી ત્વચાનું સુરક્ષિત રક્ષણ થઈ શકે.

શું ચંદનથી પિમ્પલ્સ કાયમ માટે દૂર થઈ શકે?

ચંદનને પિમ્પલ્સનો કાયમી ઈલાજ માનવો યોગ્ય નથી. પિમ્પલ્સ પાછળ હોર્મોનલ ફેરફાર, વધારાનું સેબમ, બંધ પોર્સ, બેક્ટેરિયા, તણાવ અને અન્ય ઘણા કારણો હોઈ શકે છે. ચંદન આધારિત ફેસ પેક ત્વચાને સાફ અને ફ્રેશ રાખવામાં મદદરૂપ થઈ શકે છે, પરંતુ વારંવાર થતા અથવા ગંભીર એક્ને માટે માત્ર ઘરેલુ ઉપચાર પર આધાર રાખવાને બદલે ડર્મેટોલોજિસ્ટની સલાહ લેવી વધુ યોગ્ય છે.

ડલ સ્કિન માટે માત્ર ફેસ પેક પૂરતો નથી

ચહેરાની નેચરલ હેલ્ધી ગ્લો માટે સ્કિન કેર રૂટિન પણ મહત્વપૂર્ણ છે. દિવસમાં 2 વખત હળવા ક્લેન્ઝરથી ચહેરો સાફ કરવો, ત્વચાને અનુકૂળ મોઈશ્ચરાઈઝર લગાવવો અને દિવસ દરમિયાન સનસ્ક્રીનનો ઉપયોગ કરવો જેવી મૂળભૂત બાબતો લાંબા ગાળે વધુ મહત્વ ધરાવે છે. આ ઉપરાંત પૂરતું પાણી પીવું, સંતુલિત આહાર લેવો અને પૂરતી ઊંઘ લેવી પણ સમગ્ર સ્વાસ્થ્ય તથા ત્વચાના દેખાવ માટે ઉપયોગી છે.

આ પણ વાંચો : Skin Care Tips : ચહેરા પર સાદો બરફ લગાવવાનું ભૂલી જશો, જ્યારે જાણશો આ 5 'સિક્રેટ' આઇસ ક્યુબ્સના જાદુઈ ફાયદા!