Gujarat Latest News: અમદાવાદથી ભાવનગર જતી બસ પલટી, ડ્રાઇવરે કાબુ ગુમાવતા અકસ્માત સર્જાયો
Share
ગુજરાત અને દેશભરના તમામ મહત્વના સમાચાર ગુજરાત ફર્સ્ટ ન્યૂઝ ડિજિટલ પર તમને વાંચવા મળશે સવારના 7 વાગ્યાથી રાત્રીના 12 વાગ્યા સુધી. અમે દિવસભર તમામ સમાચાર અપડેટ કરતા રહીશું અને આપના સુધી તમામ સમાચારો પહોંચાડીશું,અહીં તમને દેશ અને દુનિયાના દરેક બ્રેકિંગ ન્યૂઝ મળશે. દિવસના મોટા સમાચારો માટે એક ક્લિક કરીને જાણવા માટે, અમારા પેજ પર રહો અને રિફ્રેશ કરતા રહો.
કોળી સમાજના રાષ્ટ્રીય અધિવેશનમાં ગેનીબેન ઠાકોર અને હીરાભાઈ સોલંકી એક મંચ પર
June 21, 2026 11:32 pm
કોળી સમાજના રાષ્ટ્રીય અધિવેશનમાં બનાસકાંઠાના સાંસદ ગેનીબેન ઠાકોર ખાસ ઉપસ્થિત રહ્યા હતા. આ કાર્યક્રમ દરમિયાન ગેનીબેન ઠાકોર અને હીરાભાઈ સોલંકી એક જ મંચ પર સાથે જોવા મળ્યા હતા. મંચ પરથી સંબોધન કરતા ગેનીબેન ઠાકોરે કોળી સમાજના સંગઠનના વખાણ કર્યા હતા અને સમાજની એકતાની તાકાત પર વિશેષ ભાર મૂક્યો હતો. બે દિગ્ગજ નેતાઓની એક મંચ પરની હાજરી હાલ રાજકીય ચર્ચાનો વિષય બની છે.
સુરતમાં ઢોંગી ભુવા સામે બળાત્કારની ફરિયાદ
June 21, 2026 10:24 pm
સુરતમાં યુવતીને પ્રસાદીમાં નશીલો પદાર્થ ખવડાવી બળાત્કાર ગુજારનાર નરેશ ચૌહાણ નામના ઢોંગી ભુવા વિરુદ્ધ સિંગણપોર પોલીસ મથકમાં ગુનો નોંધાયો છે. વર્ષ ૨૦૨૪માં કુળદેવીની વિધિના બહાને યુવતીના સંપર્કમાં આવેલા આ ભુવાએ બાદમાં સોશિયલ મીડિયા દ્વારા મિત્રતા કેળવી હતી. આરોપીએ યુવતીને સિંગણપોરની એક ખાનગી હોટેલમાં બોલાવી 'માતાજીનો પ્રસાદ' કહી ઘેનયુક્ત પદાર્થ ખવડાવી બેભાન કરી હતી અને ત્યારબાદ તેની પર બળાત્કાર ગુજાર્યો હતો. એટલું જ નહીં, યુવતીને ન્યૂડ ફોટા અને વીડિયો વાયરલ કરવાની ધમકી પણ આપી હતી. પોલીસે યુવતીની ફરિયાદને આધારે આરોપી ભુવાની ધરપકડ કરી તપાસ હાથ ધરી છે. આ ભુવો સોશિયલ મીડિયા પર માતાજી આવવાનો ઢોંગ કરીને લોકોને ગેરમાર્ગે દોરતો હોવાનું પણ સામે આવ્યું છે.
ભાવનગરમાં યુવાન પર સિંહ હુમલો: વધુ એક નર સિંહ ઝડપાયો
June 21, 2026 10:19 pm
ભાવનગરના મહુવા તાલુકાના ગઢડા ગામ નજીક સિંહના હુમલામાં ૩૦ વર્ષીય યુવાન નાગજીભાઈ ગુજરીયાના મોત મામલે વન વિભાગે વધુ એક શંકાસ્પદ નર સિંહને પકડી પાડ્યો છે. યુવાન બાઈક પર પસાર થઈ રહ્યો હતો ત્યારે સિંહે હુમલો કરી તેને ફાડી ખાધો હતો, જેના કારણે યુવાનના અંગો વાડી વિસ્તારમાંથી મળી આવ્યા હતા. આ ઘટના બાદ વન વિભાગે અત્યાર સુધીમાં કુલ એક માદા અને બે નર સિંહને પાંજરે પૂર્યા છે. નવો પકડાયેલ સિંહ અમરેલીના રાજુલા તાલુકાના દાતરડી ગામના જંગલ વિસ્તારમાંથી ઝડપાયો છે. હાલ વન વિભાગ સિંહોના વર્તન અને હુમલાના કારણોની ઊંડાણપૂર્વક તપાસ કરી રહ્યું છે.
દાહોદમાં કરોડોનો દારૂ ઝડપાયો
June 21, 2026 9:45 pm
દાહોદ LCBની ટીમે ખંગેલા ચેકપોસ્ટ પરથી મધ્યપ્રદેશથી ગુજરાતમાં ઘૂસાડવામાં આવી રહેલો ૧.૨૯ કરોડ રૂપિયાનો વિદેશી દારૂ ઝડપી પાડ્યો છે. એક કન્ટેનરમાં ભરીને લાવવામાં આવેલ આ જથ્થા સાથે પોલીસે એક આરોપીની ધરપકડ કરી છે. પોલીસે કન્ટેનર સહિત કુલ ૧.૫૪ કરોડનો મુદ્દામાલ કબજે કર્યો છે. આ દારૂનો જથ્થો ક્યાં પહોંચાડવાનો હતો, તે દિશામાં પોલીસે તપાસ શરૂ કરી છે.
June 21, 2026 9:45 pm
અંબાજીમાં પોલીસ PCR વાન પર હુમલો
June 21, 2026 9:45 pm
અંબાજીના આઠ નંબર વિસ્તારમાં ડેરી પાસે પોલીસની PCR વાન પર ત્રણ અજાણ્યા શખ્સોએ હુમલો કર્યો છે. બાઈક પર આવેલા આ શખ્સોએ પોલીસની ગાડીના બોનેટ પર ફટકા મારી હેડલાઈટ ફોડી નાખી હતી. હુમલાખોરો નંબર પ્લેટ વગરની બાઈક પર આવ્યા હોવાની ચર્ચા છે. પોલીસ વાન પર થયેલા આ હુમલાનો વીડિયો સોશિયલ મીડિયામાં વાયરલ થતા સ્થાનિકોમાં ફફડાટ ફેલાયો છે અને લોકો આ ઘટનાને ગંભીર ગણાવી હુમલાખોરોને વહેલી તકે પકડવાની માંગ કરી રહ્યા છે.
સુરેન્દ્રનગરમાં લાખોનો દારૂ ઝડપાયો
June 21, 2026 9:45 pm
સુરેન્દ્રનગર LCB પોલીસે પાટડીના કચોલીયા ગામની સીમમાં બાતમીના આધારે દરોડો પાડી વિદેશી દારૂ ભરેલો એક ટ્રક ઝડપી પાડ્યો છે. ટ્રકમાં ઉપરના ભાગે લાકડાની આડમાં નીચે ખાસ બનાવેલા ચોરખાનામાંથી રૂ. ૩૫.૮૬ લાખની કિંમતની ૧૪,૪૭૨ દારૂની બોટલો મળી આવી હતી. પોલીસે ટ્રક સહિત કુલ રૂ. ૫૫.૮૬ લાખનો મુદ્દામાલ કબજે કરી ટ્રક ચાલક, માલિક, દારૂ મોકલનાર અને મંગાવનાર સહિત કુલ ૬ શખ્સો વિરુદ્ધ બજાણા પોલીસ મથકે ગુનો નોંધી વધુ તપાસ હાથ ધરી છે. ટ્રકમાં બનાવેલું અસામાન્ય ચોરખાનું જોઈ પોલીસ પણ ચોંકી ઉઠી હતી, સાથે જ આટલો મોટો જથ્થો પકડાતા સ્થાનિક પોલીસની કામગીરી સામે પણ સવાલો ઉઠ્યા છે.
રિલીફ રોડ પર યુવકની હત્યા
June 21, 2026 9:45 pm
અમદાવાદના રિલીફ રોડ પર પૈસાની લેતી-દેતી બાબતે એક યુવકની છરીના ઘા ઝીંકી હત્યા કરવામાં આવી છે. મૃતક જય શંકરને આરોપી શાકિબ સલીમ શેખે વાતચીતના બહાને પથ્થર કૂવા બોલાવ્યો હતો, જ્યાં બોલાચાલી દરમિયાન સલીમે છરીના ઉપરા-ઉપરી ઘા ઝીંકી તેની હત્યા કરી હતી. કારંજ પોલીસે તાત્કાલિક કાર્યવાહી કરી આરોપીની અટકાયત કરી છે અને મૃતદેહને પોસ્ટમોર્ટમ માટે ખસેડાયો છે.
અમદાવાદ-ભાવનગર હાઈવે પર ગંભીર અકસ્માત
June 21, 2026 9:21 pm
અમદાવાદથી ભાવનગર જઈ રહેલી એક 21 સીટર બસ પલટી જતાં અકસ્માત સર્જાયો છે. પ્રાથમિક અહેવાલો મુજબ, ડ્રાઇવરે સ્ટીયરિંગ પરથી કાબૂ ગુમાવતાં આ દુર્ઘટના ઘટી હતી. બસમાં સવાર અનેક મુસાફરો ઈજાગ્રસ્ત થયા છે, જેઓ એક જ પરિવારના સભ્યો હતા અને શ્રીમંતના પ્રસંગમાં જઈ રહ્યા હતા.ઘટનાની જાણ થતાં જ 6 જેટલી 108 એમ્બ્યુલન્સ તાત્કાલિક સ્થળ પર પહોંચી ગઈ હતી. તમામ ઈજાગ્રસ્તોને સારવાર માટે ધોળકાની સરકારી હોસ્પિટલમાં ખસેડવામાં આવ્યા છે. હાલમાં એક મહિલાની હાલત અત્યંત ગંભીર હોવાનું જાણવા મળી રહ્યું છે. ઘટનાસ્થળે ધોળકા DySP અને કોઠ પોલીસનો કાફલો પહોંચીને વધુ તપાસ હાથ ધરી છે.
સોમનાથ: મોરબી ભાજપ મહામંત્રી તપન દવે પર હુમલો, ગંભીર કલમો હેઠળ ગુનો દાખલ
June 21, 2026 8:36 pm
સોમનાથ દર્શનાર્થે આવેલા મોરબી ભાજપના મહામંત્રી તપન દવે પર પરત ફરતી વખતે ટોલ પ્લાઝા નજીક જીવલેણ હુમલો થયો છે. અજાણ્યા શખ્સોએ પાઇપ વડે હુમલો કરતા તપન દવેને ગંભીર ઈજાઓ પહોંચી હતી, જે બાદ તેમને સારવાર અર્થે વેરાવળ સિવિલ હોસ્પિટલ ખસેડવામાં આવ્યા છે. હુમલાખોરોએ લૂંટ ચલાવી હોવાનો પણ આક્ષેપ કરાયો છે. પ્રભાસ પાટણ પોલીસે કલમ 307 સહિતની ગંભીર કલમો હેઠળ ગુનો નોંધી તપાસ હાથ ધરી છે.
અમદાવાદ: વસ્ત્રાલમાંથી 3.48 કરોડનું મેફેડ્રોન ડ્રગ્સ ઝડપાયું, બે આરોપીઓની ધરપકડ
June 21, 2026 8:36 pm
અમદાવાદ ક્રાઈમ બ્રાન્ચે વસ્ત્રાલના સૂર્યમ એલિગન્સ નજીક દરોડો પાડીને તેજકુમાર ઠક્કર અને અજય જયસવાલ નામના બે શખ્સોને 150.080 ગ્રામ મેફેડ્રોન સાથે ઝડપી પાડ્યા છે. જપ્ત કરાયેલા ડ્રગ્સની આંતરરાષ્ટ્રીય બજાર કિંમત ₹3.48 કરોડ થતી હોવાનું કહેવાઈ છે. પોલીસે ડ્રગ્સ ઉપરાંત મોબાઈલ અને રોકડ સહિતનો મુદ્દામાલ કબજે કરી બંને આરોપીઓ સામે એનડીપીએસ એક્ટ હેઠળ ગુનો નોંધી સપ્લાય ચેઈન અંગે તપાસ હાથ ધરી છે.
સુરેન્દ્રનગર: અકસ્માતમાં ઇજાગ્રસ્ત પાટણના PSI એચ.કે.મલેકનું સારવાર દરમિયાન નિધન
June 21, 2026 7:51 pm
સુરેન્દ્રનગરના દસાડા-કઠાડા રોડ પર થયેલા ગમખ્વાર અકસ્માતમાં પાટણના સાંતલપુરમાં IBમાં ફરજ બજાવતા PSI એચ.કે.મલેકનું સારવાર દરમિયાન મોત થયું છે. 15 જૂને થયેલા આ અકસ્માતમાં આ અગાઉ નિવૃત્ત નાયબ મામલતદાર અને એક મહિલાનું પણ મૃત્યુ થયું હતું. ભારતીય સેનામાંથી નિવૃત્તિ બાદ પોલીસ સેવામાં જોડાયેલા PSIના નિધનથી પોલીસ બેડામાં શોકની લાગણી પ્રસરી છે. આ અકસ્માતમાં કુલ ૩ લોકોએ જીવ ગુમાવ્યા છે.
પાટણમાં નકલી નોટો છાપતું મોટું કૌભાંડ ઝડપાયું: 2.46 લાખની નકલી ચલણી નોટો સાથે બે ઝડપાયા
June 21, 2026 7:20 pm
પાટણ LCB અને ચાણસ્મા પોલીસે સંયુક્ત ઓપરેશનમાં દેલમાલ ગામ સ્થિત 'શિવમ ઇલેક્ટ્રોનિક્સ' ઝેરોક્ષની દુકાન પર દરોડો પાડી નકલી નોટોનું મોટું કૌભાંડ પર્દાફાશ કર્યું છે. પોલીસે રૂ. 500 ના દરની 492 નકલી નોટો (કિંમત રૂ. 2,46,000) જપ્ત કરી છે. ઘટનાસ્થળેથી મુખ્ય સૂત્રધાર નિકુલજી ઠાકોર અને એક સગીરને રંગેહાથ ઝડપી પાડ્યા છે. કલર પ્રિન્ટર, કોમ્પ્યુટર અને મોટરસાયકલ જપ્ત કરાયા છે. આ કૌભાંડના તાર દિલ્હી અને રાજસ્થાન સુધી જોડાયેલા હોવાનું ખૂલતા, ફરાર અન્ય ત્રણ આરોપીઓની શોધખોળ હાથ ધરાઈ છે.
ગાંધીનગરના ‘ચ’ રોડની કાયાપલટ થશે: 49 કરોડના ખર્ચે બનશે મોડલ સ્માર્ટ રોડ
June 21, 2026 7:17 pm
ગાંધીનગરના 'ચ' રોડને 49 કરોડના ખર્ચે મોડલ સ્માર્ટ રોડ તરીકે વિકસાવવા રાજ્ય સરકારે મંજૂરી આપી છે. ધારાસભ્ય રીટાબેન પટેલની માંગણી બાદ આ પ્રોજેક્ટને લીલીઝંડી મળી છે, જે હેઠળ રસ્તાનું આધુનિકીકરણ અને વિવિધ સુવિધાઓનું નિર્માણ કરવામાં આવશે. આ પ્રોજેક્ટથી શહેરના ટ્રાફિક અને સૌંદર્યમાં મોટો સુધારો જોવા મળશે.
છોટાઉદેપુરમાં તંત્રની બેદરકારીથી બાળકની મોત
June 21, 2026 6:44 pm
છોટાઉદેપુરના ઓડ ગામે એમજીવીસીએલના તૂટેલા વીજ વાયરના કરંટથી ૭ વર્ષના સાહિલ રાઠવાનું મોત થયું છે. વારંવાર રજૂઆત છતાં તંત્રએ સમારકામ ન કરતા ગ્રામજનોમાં ભારે રોષ છે. હાલ પોલીસ તપાસ કરી રહી છે, પરંતુ જવાબદાર અધિકારીઓ હજુ સુધી ઘટનાસ્થળે પહોંચ્યા નથી.
સુરત: સરથાણાના પેલેડિયમ મોલમાં ચાલતું કુટણખાનું ઝડપાયું
June 21, 2026 6:01 pm
સુરતના સરથાણા વિસ્તારમાં આવેલા યોગીચોકના પેલેડિયમ મોલમાં પોલીસે દરોડો પાડી દેહવ્યાપારનું રેકેટ પકડી પાડ્યું છે. મોલના ગ્રાઉન્ડ ફ્લોર પર ગુપ્ત રીતે ચાલતા આ કુટણખાનામાંથી પોલીસે પાંચ રૂપલલનાઓ, એક ગ્રાહક અને સંચાલકની ધરપકડ કરી છે. જોકે, મુખ્ય સંચાલક પોલીસ રેડ દરમિયાન ફરાર થવામાં સફળ રહ્યો હતો. પોલીસ દ્વારા આ સમગ્ર મામલે કાયદેસરની કાર્યવાહી હાથ ધરી વધુ તપાસ કરવામાં આવી રહી છે.
અંજારમાં ગેરકાયદેસર રહેતી બાંગ્લાદેશી મહિલા ઝડપાઈ: SOGની મોટી કાર્યવાહી
June 21, 2026 5:49 pm
કચ્છના અંજારમાંથી ગેરકાયદેસર રીતે રહેતી એક બાંગ્લાદેશી મહિલાને SOG ગાંધીધામની ટીમે ઝડપી પાડી છે. મેઘપર કુંભારડીના કપિલેશ્વરનગર વિસ્તારમાંથી ફરઝાના અબ્દુલ્લા શેખ નામની આ મહિલાને ડિટેઇન કરવામાં આવી છે. પ્રાથમિક તપાસમાં તે બાંગ્લાદેશના કોમીલા જિલ્લાની હોવાનું અને ગેરકાયદેસર રીતે ભારતમાં પ્રવેશ્યાનું ખુલ્યું છે. પૂર્વ કચ્છ SOG દ્વારા હાલ મહિલાની સઘન પૂછપરછ હાથ ધરીને વધુ તપાસ કરવામાં આવી રહી છે.
અમદાવાદ ક્રાઈમ બ્રાન્ચની મોટી કાર્યવાહી: 3.91 કરોડના MD ડ્રગ્સ સાથે શખ્સ ઝડપાયો
June 21, 2026 5:21 pm
અમદાવાદ ક્રાઈમ બ્રાન્ચે કુરિયર મારફતે મેફેડ્રોન ડ્રગ્સની હેરાફેરી કરતા રાજસ્થાનના આસુરામ ભાટને વસ્ત્રાલથી ઝડપી પાડ્યો છે. વસ્ત્રાલ અને બાપુનગરના શ્યામ શિખર કોમ્પ્લેક્સમાંથી કુલ 391.55 ગ્રામ MD ડ્રગ્સ મળી આવ્યું છે, જેની કિંમત ₹3.91 કરોડ આંકવામાં આવી છે. બેંગલુરુથી ડ્રગ્સ મંગાવતો આ શખ્સ ઝડપાતા પોલીસે વધુ તપાસ હાથ ધરી છે. ડ્રગ્સ નેટવર્ક તોડવા ક્રાઈમ બ્રાન્ચની આ કાર્યવાહી મહત્વની માનવામાં આવી રહી છે.
અમદાવાદમાં NEETની પરીક્ષા શાંતિપૂર્ણ સંપન્ન: વિવાદ વચ્ચે યોજાઈ પરીક્ષા
June 21, 2026 5:17 pm
અમદાવાદની આર.જે. ટીબ્રેવાલ કોલેજ સહિતના કેન્દ્રો પર આજે NEETની પરીક્ષા શાંતિપૂર્ણ રીતે પૂર્ણ થઈ હતી. બપોરે 2થી 5:15 દરમિયાન લેવાયેલી આ પરીક્ષામાં 15 મિનિટનો વધારાનો સમય અપાયો હતો. પરીક્ષા દરમિયાન હિજાબ અને ધાર્મિક વસ્તુઓ અંગે વિવાદ સર્જાયો હતો, તેમ છતાં પોલીસના કડક બંદોબસ્ત વચ્ચે સમગ્ર પ્રક્રિયા વ્યવસ્થિત પાર પડી હતી. ઉલ્લેખનીય છે કે, 12 મેના રોજ રદ થયેલી આ પરીક્ષા આજે ફરીથી યોજાઈ હતી.
તમિલનાડુ: સીફૂડ ફેક્ટરીમાં એમોનિયા ગેસ લીકેજ, 7ના મોત અને 67 બીમાર
June 21, 2026 5:15 pm
તમિલનાડુમાં એક ખાનગી સીફૂડ પ્રોસેસિંગ યુનિટમાં એમોનિયા ગેસ લીકેજની ગોઝારી ઘટના સામે આવી છે. આ દુર્ઘટનામાં 7 કામદારોના મોત નીપજ્યા છે, જ્યારે અન્ય 67 લોકો અસરગ્રસ્ત થતાં તેમને તાત્કાલિક હોસ્પિટલ ખસેડાયા છે. ગંભીર સ્થિતિને પગલે મુખ્યમંત્રી સી. જોસેફ વિજયે તપાસ સમિતિની રચના કરી છે અને અસરગ્રસ્તોને શ્રેષ્ઠ તબીબી સારવાર આપવા તંત્રને તાકીદના આદેશ આપ્યા છે.
કચ્છમાં દબાણ હટાવો ઝુંબેશ: 1.67 કરોડની સરકારી જમીન મુક્ત કરાઈ
June 21, 2026 4:45 pm
કચ્છ જિલ્લા વહીવટીતંત્ર અને પોલીસે સંયુક્ત રીતે દબાણ હટાવવાની ઝુંબેશ તેજ બનાવી છે. સમગ્ર જિલ્લાના 9 તાલુકાઓમાં હાથ ધરાયેલી કાર્યવાહીમાં 30 ગેરકાયદેસર દબાણો દૂર કરી 22,485 ચોરસ મીટર સરકારી જમીન ખુલ્લી કરવામાં આવી છે, જેની કિંમત અંદાજે 1.67 કરોડથી વધુ છે. આ ઝુંબેશમાં સૌથી વધુ 15 દબાણો ભુજમાં દૂર કરાયા છે. તંત્રએ આ અભિયાન આગામી સમયમાં પણ સતત ચાલુ રાખવાની ચીમકી ઉચ્ચારી છે.
રાજકોટ: કુવાડવાના PI વી.આર. વસાવા સસ્પેન્ડ, 1 કરોડનો વિદેશી દારૂ ઝડપાયો
June 21, 2026 4:44 pm
રાજકોટના કુવાડવા પોલીસ સ્ટેશન વિસ્તારમાં SMCના દરોડા બાદ મોટો ઘટસ્ફોટ થયો છે. RK9 ઇન્ડસ્ટ્રીયલ વિસ્તારમાંથી લિસ્ટેડ બુટલેગર ફિરોઝ સંધીનો 70.38 લાખનો વિદેશી દારૂ અને ટ્રક મળી કુલ 1 કરોડનો મુદ્દામાલ ઝડપાતા ખળભળાટ મચી ગયો છે. ગંભીર બેદરકારી બદલ પોલીસ કમિશનર બ્રિજેશકુમાર ઝાએ કુવાડવા PI વી.આર. વસાવાને તાત્કાલિક અસરથી સસ્પેન્ડ કરવાનો આદેશ આપતા પોલીસ બેડામાં ભારે ચર્ચા જાગી છે.
વિરમગામ: નર્મદા કેનાલમાંથી અજાણ્યા પુરુષનો મૃતદેહ મળી આવતા ચકચાર
June 21, 2026 4:02 pm
વિરમગામના હરીપુરા નજીક પસાર થતી સૌરાષ્ટ્ર નર્મદા કેનાલમાંથી એક અજાણ્યા પુરુષનો મૃતદેહ મળી આવ્યો છે. અંદાજે 35 થી 40 વર્ષની વયના આ યુવકની લાશ કેનાલમાં હોવાની જાણ થતા સ્થાનિકોમાં ચકચાર મચી ગઈ હતી. ઘટનાની જાણ થતા વિરમગામ ફાયરની ટીમ તાત્કાલિક સ્થળ પર પહોંચી હતી અને ભારે જહેમત બાદ મૃતદેહને બહાર કાઢ્યો હતો. વિરમગામ રૂરલ પોલીસે લાશનો કબજો મેળવી પીએમ અર્થે સામૂહિક આરોગ્ય કેન્દ્રમાં ખસેડી છે. હાલ પોલીસ દ્વારા મૃતકની ઓળખ મેળવવા માટે તપાસના ચક્રો ગતિમાન કરવામાં આવ્યા છે.
દસાડા: તળાવ ઊંડા કરવાના પ્રોજેક્ટ સામે ગ્રામજનોનો વિરોધ, કામગીરીમાં અનિયમિતતાના આક્ષેપ
June 21, 2026 3:59 pm
સુરેન્દ્રનગરના દસાડા તાલુકામાં તળાવ ઊંડા કરવાના પ્રોજેક્ટને લઈને વિવાદ વકર્યો છે. મીઠાઘોડા ગ્રામ પંચાયતના ઉપસરપંચ સહિતના ગ્રામજનોએ પ્રોજેક્ટની કામગીરી સામે વાંધો ઉઠાવ્યો છે. ગ્રામજનોનો દાવો છે કે આ કામગીરી કોઈ પણ પ્રકારના સર્વે વિના જ મંજૂર કરવામાં આવી છે. આ પ્રોજેક્ટનો હેતુ રણમાં જતું ઓવરફ્લો પાણી અટકાવવાનો છે, પરંતુ ગ્રામજનોએ આરોપ લગાવ્યો છે કે ખાનગી સંસ્થાના દબાણ હેઠળ આ કામ અપાયું છે. વધુમાં, નર્મદાના નીર રણમાં ભળવાથી મીઠાના વ્યવસાયને નુકસાન થવાની ભીતિ પણ વ્યક્ત કરવામાં આવી છે.
ભાવનગર: તરસામીયા રોડ પર ઉકરડા બાબતે થયેલી બબાલમાં આધેડનું મોત, હુમલાખોરો સામે આકરા પગલાંની માગ
June 21, 2026 3:53 pm
ભાવનગરના તરસામીયા રોડ વિસ્તારમાં ઘરની બાજુમાં ઉકરડો કરવા જેવી નજીવી બાબતે થયેલી બબાલ હત્યામાં પરિણમી છે. પાંચથી વધુ શખ્સોએ મનસુખભાઈ અને તેના પરિવાર સાથે મળીને અરજણભાઈ જાધવના પરિવાર પર પાવડા, ધોકા અને પાઈપ વડે હુમલો કર્યો હતો. આ હુમલામાં ગંભીર રીતે ઘાયલ થયેલા અરજણભાઈ જાધવનું સારવાર દરમિયાન આજે મોત નીપજ્યું છે, જ્યારે તેમના પત્ની અને પૌત્ર પણ ઈજાગ્રસ્ત થયા છે. પરિવારે હત્યારાઓ સામે કડક કાર્યવાહીની માગ કરી છે.
ભાવનગર: વ્યાજખોરોના ત્રાસથી કંટાળી રિક્ષાચાલકે ઝેરી દવા પી જીવન ટૂંકાવવાનો પ્રયાસ કર્યો
June 21, 2026 3:35 pm
ભાવનગરના ગાયત્રીનગર વિસ્તારમાં રહેતા અમિતલાલ શ્યામલાલ પીંજાણી નામના રિક્ષાચાલકે વ્યાજખોરોના ત્રાસથી કંટાળી ઝેરી દવા પી લેતા ચકચાર મચી ગઈ છે. આર્થિક સંકડામણના કારણે વ્યાજે પૈસા લીધા બાદ ધંધો મંદ પડતા તેઓ હપ્તા કે વ્યાજ ચૂકવી શક્યા ન હતા. પરિણામે, વ્યાજખોરો દ્વારા સતત શારીરિક-માનસિક ત્રાસ અને જાનથી મારી નાખવાની ધમકીઓ આપવામાં આવતી હતી. ગંભીર હાલતમાં તેમને સિવિલ હોસ્પિટલ ખસેડવામાં આવ્યા છે.
સુરેન્દ્રનગર: લીંબડીના સમલા ગામે LCB પોલીસની મોટી કાર્યવાહી, જુગાર રમતા 9 શખ્સો ઝડપાયા
June 21, 2026 3:35 pm
સુરેન્દ્રનગરના લીંબડી તાલુકાના સમલા ગામે LCB પોલીસે બાતમીના આધારે દરોડો પાડીને ચાલતા જુગારધામનો પર્દાફાશ કર્યો છે. રેડ દરમિયાન સ્થળ પર જુગાર રમી રહેલા 9 શખ્સોને પોલીસે રંગેહાથ ઝડપી પાડ્યા હતા. પોલીસ દ્વારા દાવ પર લાગેલી રોકડ રકમ અને જુગારનું સાહિત્ય કબજે કરી તમામ આરોપીઓ સામે કાયદેસરની અટકાયતી કાર્યવાહી હાથ ધરવામાં આવી છે.
ભાવનગર: ગારિયાધારમાં પત્નીની કુહાડીના ઘા ઝીંકી હત્યા કરનાર પતિની ગણતરીના કલાકોમાં ધરપકડ
June 21, 2026 3:35 pm
ભાવનગરના ગારિયાધારમાં મફતનગર ખાતે રહેતી પાયલબેન પરમારની તેના જ પતિ વિજય પરમારે ઘાતકી હત્યા કરતા ચકચાર મચી ગઈ છે. પત્ની છેલ્લા ત્રણ માસથી રિસામણે હોવાના ડખ્ખામાં ઉશ્કેરાયેલા પતિએ કુહાડીના ઘા ઝીંકી પત્નીનો જીવ લીધો હતો. મૃતકના પરિવારની ફરિયાદના આધારે ગારિયાધાર પોલીસે વિજય પરમાર સામે ગુનો નોંધીને ગણતરીના કલાકોમાં જ હત્યારા પતિને ઝડપી પાડી કાયદેસરની કાર્યવાહી હાથ ધરી છે.
રાજકોટ: રૈયા રોડ પર સગીર ચાલકની કારનો કાળમુખો આતંક, અકસ્માતમાં વાહનચાલક ગંભીર રીતે ઘાયલ
June 21, 2026 3:16 pm
રાજકોટના રૈયા રોડ પર પૂરપાટ ઝડપે દોડતી કારના ચાલકે અનેક વાહનોને અડફેટે લેતા અકસ્માત સર્જાયો હતો. એક વર્ના કારના સગીર ચાલકે બેથી ત્રણ વાહનોને ટક્કર મારી ભાગવાનો પ્રયાસ કર્યો હતો. આ અકસ્માતમાં સ્કૂટર સવારને ગંભીર ઈજાઓ થતા સારવાર માટે સિવિલ હોસ્પિટલ ખસેડવામાં આવ્યા છે. સ્પીડબ્રેકર પર ગાડી ઉછળ્યા બાદ સર્જાયેલા આ અકસ્માતને પગલે ઘટનાસ્થળે લોકોના ટોળા એકઠા થઈ ગયા હતા.
ખેડામાં અભિનેત્રી મમાતા સોની સાથે છેતરપીંડી, કઠલાલના નેતા સામે આક્ષેપ
June 21, 2026 2:56 pm
ગુજરાતી ફિલ્મ જગતની જાણીતી અભિનેત્રી મમતા સોની (Mamta Soni) સાથે છેતરપિંડીનો એક ચોંકાવનારો કિસ્સો સામે આવ્યો છે. ખેડા જિલ્લાના કઠલાલ (Kathlal) તાલુકાના એક યુવા નેતા સામે ગંભીર આક્ષેપો કરવામાં આવ્યા છે. કઠલાલના દીપક ડાભી (Deepak Dabhi) પર અભિનેત્રીએ એવો આરોપ લગાવ્યો છે કે, ફેબ્રુઆરી મહિનામાં યોજાયેલા વિવિધ કાર્યક્રમોમાં તેમની પાસે કામ કરાવ્યા બાદ નક્કી કરેલી રકમ હજુ સુધી ચૂકવવામાં આવી નથી.
અમદાવાદ: આર.જે. ટીબ્રેવાલ કોલેજમાં હિજાબ અને કંઠી વિવાદ વકર્યો, હિન્દુ સંગઠનના બે કાર્યકરોની અટકાયત
June 21, 2026 2:45 pm
અમદાવાદની આર.જે. ટીબ્રેવાલ કોલેજમાં NEET પરીક્ષા દરમિયાન હિજાબ અને કંઠીને લઈને સર્જાયેલો વિવાદ વધુ ઘેરાયો છે. પરીક્ષામાં હિજાબ સાથે પ્રવેશ અને અન્ય વિદ્યાર્થીઓની કંઠી કઢાવવાના મુદ્દે રોષે ભરાયેલા 15થી વધુ અગ્રણીઓ કોલેજ પહોંચ્યા હતા. આ મામલે વિરોધ પ્રદર્શન કરનાર હિન્દુ સંગઠનના બે કાર્યકરોની પોલીસ દ્વારા અટકાયત કરવામાં આવી છે.
અમદાવાદની આર.જે. ટીબ્રેવાલ કોલેજ વિવાદમાં: NEET પરીક્ષામાં હિજાબને મંજૂરી સામે વાલીઓનો વિરોધ
June 21, 2026 2:16 pm
અમદાવાદની વસ્ત્રાપુર સ્થિત આર.જે. ટીબ્રેવાલ કોલેજ NEET પરીક્ષાના આયોજનને લઈને વિવાદમાં સપડાઈ છે. કોલેજ પર આરોપ છે કે પરીક્ષા દરમિયાન હિજાબ પહેરેલી વિદ્યાર્થિનીઓને પ્રવેશ આપવામાં આવ્યો હતો, જ્યારે બીજી તરફ અન્ય પરીક્ષાર્થીઓના હાથમાંથી ધાર્મિક દોરા અને કંઠી કઢાવવામાં આવતા વાલીઓમાં ભારે રોષ જોવા મળ્યો હતો. પરીક્ષા કેન્દ્ર પર પક્ષપાતી વલણ અપનાવવામાં આવ્યું હોવાના આક્ષેપ સાથે વાલીઓએ ઉગ્ર વિરોધ નોંધાવ્યો છે.
દિલ્હીમાં કોળી સમાજનું ભવ્ય અધિવેશન: ધારાસભ્ય હીરા સોલંકીએ સમાજની એકતા પર ભાર મૂક્યો
June 21, 2026 2:11 pm
દિલ્હીમાં આયોજિત કોળી સમાજના અધિવેશનમાં ગુજરાતથી મોટી સંખ્યામાં લોકો જોડાયા હતા. ધારાસભ્ય હીરાભાઇ સોલંકીએ આ અધિવેશનને અત્યંત સફળ ગણાવતા જણાવ્યું કે, 22 રાજ્યોના પ્રતિનિધિઓ આ મંચ પર એકત્ર થયા છે. તેમણે સ્પષ્ટ કર્યું કે સંગઠન માટે કોઈની સાથે લડાઈ નથી, માત્ર સમાજની એકતા અને વિકાસ માટે કામ કરવું છે. ઉપરાંત, આગામી સમયમાં મહિલા વિંગ દ્વારા વિશેષ કાર્યક્રમનું આયોજન કરવામાં આવશે.
ભરૂચમાં કેમિકલ માફિયાઓ બેફામ, ભૂખી ખાડીમાં કેમિકલવાળું પાણી છોડતા માછલીઓના મોત
June 21, 2026 1:58 pm
ભરુચમાં કેમિકલ માફિયાઓ બેફામ બન્યા છે. વાગરામાં ભૂખી ખાડીમાં કેમિકલયુક્ત પાણીનો નિકાલ કર્યો છે. જેના લીધે પાણીમાં અસંખ્ય માછલીઓના મોત થયા છે. આસપાસના લોકોમાં કેમિકલ માફિયાઓ સહિત તંત્ર સામે રોષ વ્યાપ્યો છે.
ગુજરાતી અભિનેત્રી સાથે ઠગાઈ, મમતા સોનીએ ભાજપ નેતા દિપક ડાભી સામે કર્યા આરોપ
June 21, 2026 1:54 pm
અભિનેત્રી મમતા સોનીએ ખેડાના કઠલાલ તાલુકા ભાજપ યુવા મોરચાના પ્રમખ સામે ગંભીર આરોપ કર્યા છે. અભિનેત્રીએ વીડિયો જાહેર કરી કહ્યું કે, દિપક ડાભીએ 3 કાર્યક્રમો કરાવીને તેનું વળતર નથી આપ્યું. દિપક ડાભી મારી નાખવાની ધમકી આપતો હોવાનો પણ આક્ષેપ કર્યો છે. ગુજરાત ન્યૂઝ આ વાયરલ વીડિયોની પુષ્ટિ કરતું નથી.
અમદાવાદમાં Neet પરીક્ષામાં હિજાબ સાથે મંજૂરી અને હાથમાં દોરા કઢાવતા વિવાદ
June 21, 2026 1:44 pm
વસ્ત્રાપુર આર.જે ટીગ્રવાલ કોલેજમાં વાલીઓનો વિરોધ. કંઠી દોરા સહિત ધાર્મિક બાબતો ને લગતી ચીજ વસ્તુઓ કઢાવી હોવાનો આરોપ. જ્યારે હિજાબ સાથે વિદ્યાર્થીઓને પ્રવેશ આપવામાં આવ્યો.
અમરેલી- જાફરાબાદ તાલુકાના બાબરકોટ રોડ ઉપર સિંહ દ્વારા આતંક મચાવ્યો
June 21, 2026 1:04 pm
બાઈક ચાલકની પાછળ દોડી હુમલો કર્યાનો આક્ષેપ, બાઇક ચાલક વિશાલ બારૈયાને સિંહે નખ માર્યા, ઇજાગ્રસ્ત બાઇકચાલકને સારવાર માટે ખસેડાયો. એક રીક્ષા પાછળ દોડતા રીક્ષા પલ્ટી મારી. જાફરાબાદ રેન્જ વનવિભાગ કચેરી નજીક ઘટના બનતા વનવિભાગ દોડ્યુ હતુ.
રાજ્યના નાયબ મુખ્યમંત્રી હર્ષભાઈ સંઘવીના હસ્તે સિટી લિંક બસ સેવાના ફ્રી કાર્ડનું વિતરણ
June 21, 2026 12:29 pm
અલથાણ સ્થિત વિશ્વ ઉમિયા ફાઉન્ડેશન ખાતે યોજાયો કાર્યક્રમ. કુલ 500 કેટલા સિનિયર સિટીઝનો ને નિઃશુલ્ક ફ્રી બસ સેવાના કાર્ડ ઉપલબ્ધ કરાવાશે. એક વર્ષ સુધી સિનિયર સિટીઝનો બસ સેવાનો નિશુલ્ક લાભ મેળવી શકશે. પીએમ નરેન્દ્રભાઈ મોદીના સુશાસન ના 12 વર્ષ પૂર્ણ થવાના અવસરે લાભ. સુરત મહાનગરપાલિકાની સિનિયર સિટીઝન યોજના અંતર્ગત. 500 સિનિયર સિટીઝન લોકોને નિઃશુલ્ક ફ્રી સેવા કાર્ડ
પાલિકા સંચાલિત સિટી લિંક બસમાં નિશુલ્ક મુસાફરી કરી શકશે. દક્ષિણ ગુજરાતની એકમાત્ર વિશ્વ ઉમિયા ફાઉન્ડેશનની ઓફિસથી સેવાનો પ્રારંભ.નાયબ મુખ્યમંત્રી હર્ષભાઈ સંઘવીએ સેવાનો લાભ લેવા સિનિયર સિટીઝનોને કર્યો અનુરોધ.
ઝડપાયેલ આરોપી ઓઢવનો રહેવાસી છે
June 21, 2026 12:13 pm
પોલીસે આરોપી પાસેથી ઈનોવા કાર, વિદેશી દારૂની બોટલો અને મોબાઈલ મળીને કુલ 12,34,120 રૂપિયાનો મુદ્દામાલ કબજે કર્યો છે. એરપોર્ટ પોલીસ સ્ટેશનમાં આરોપી વિરુદ્ધ પ્રોહિબિશન એક્ટની વિવિધ કલમો હેઠળ ગુનો નોંધી વધુ તપાસ હાથ ધરવામાં આવી છે. આરોપીની પૂછપરછમાં અન્ય કોઈ મોટા નેટવર્કનો પર્દાફાશ થાય તેવી શક્યતાઓ પણ વ્યક્ત કરવામાં આવી રહી છે. પોલીસે જે દારૂનો જથ્થો ઝડપ્યો છે તે જથ્થો કોને આપવાનો હતો અને કયાંથી દારૂ લઈને આવ્યો હતો તે દિશામાં તપાસ શરૂ કરી છે.
Ahmedabad Airport Police નો સપાટો, 12.34 લાખના વિદેશી દારૂના જથ્થા સાથે રીઢો આરોપી ઝડપાયો
June 21, 2026 12:12 pm
અમદાવાદ શહેરને નશાના દૂષણથી મુક્ત રાખવા માટે શહેર પોલીસ દ્વારા હાથ ધરવામાં આવેલી ઝુંબેશ અંતર્ગત એરપોર્ટ પોલીસ સ્ટેશનને મોટી સફળતા મળી છે. એરપોર્ટ પોલીસ સ્ટેશનના સ્ટાફ દ્વારા ભાટ ટોલટેક્સ પાસે કરવામાં આવેલા પેટ્રોલિંગ દરમિયાન લાખો રૂપિયાની કિંમતનો વિદેશી દારૂનો જથ્થો ઝડપી પાડી કાયદેસરની કાર્યવાહી કરવામાં આવી છે.
વાંચો સવારના 7 થી બપોરના 12 વાગ્યા સુધીના મહત્વના સમાચાર એક કિલક પર
June 21, 2026 11:47 am
02 - Gujarat Latest News : યોગ શરીર માટે જ નહીં, માનસિક સ્વાસ્થ્ય માટે પણ જરૂરી : PM Narendra Modi
03 - Kutch : ભુજ મેકડોનાલ્ડ્સની ગંભીર બેદરકારી! વેજ બર્ગરના બદલે નોન-વેજ પીરસાતા ગ્રાહકમાં રોષ
08 - Weather News: 26 રાજ્યમાં વરસાદનું એલર્ટ, 70 કિમીથી ચાલશે પવન, જાણો ગુજરાતની સ્થિતિ
ધારાસભ્ય અને ચીફ ઓફિસર આમને-સામને
June 21, 2026 11:27 am
ચીફ ઓફિસર હિરલ ઠાકરના જણાવ્યા અનુસાર, ડેપો મેનેજરની રજૂઆતને પગલે માત્ર બસ સ્ટેશન વહેલું ચાલુ થાય એવા 'ગુડ ફેથ' એટલે કે શુદ્ધ આશયથી આ પરમિશન અપાઈ હતી. પરંતુ આ પ્રક્રિયામાં ઓનલાઈન સિસ્ટમમાં આર્કિટેક્ટે ગેરરીતિ આચરી હોવાનું સામે આવતા તેનું લાયસન્સ રદ કરાયું છે. ચોંકાવનારી વાત એ છે કે, આ કેસમાં પાલિકાના નિવૃત્ત સર્વેયરનો દીકરો જ આર્કિટેક્ટ હતો, એટલે કે અહીં 'ઘરના ભુવા અને ઘરના ડાકલા' જેવો ઘાટ સર્જાયો હતો. પાલિકાના જે કર્મચારી સર્વેયર છે, જે હવે રિટાયર્ડ થઈ ગયા, એનો જ દીકરો આર્કિટેક્ટ હતો. આ તો ઘરના ભુવા ને ઘરના ડાકલા જેવો ઘાટ હતો. અમારી પાસે આટલા કામો વચ્ચે અમે ગુડ ફેથમાં નિર્ણય લીધો હતો. પણ જ્યારે ખબર પડી કે ચાર માળનું ખોટું બીયુ માંગ્યું છે, ત્યારે મેં તાત્કાલિક એજન્સીની પરમિશન રદ કરી કાયદેસરની કાર્યવાહી કરી છે.
એક જ દિવસમાં સ્થળ તપાસ બતાવીને બીયું પરમિશન અપાઈ!
June 21, 2026 11:27 am
ધારાસભ્યએ આક્ષેપ કર્યો છે કે, જે ચીફ ઓફિસર પોતે સ્થળ નિરીક્ષણના લેટર પર સહી કરે છે, એ જ ચીફ ઓફિસર વિવાદ થતાં આર્કિટેક્ટ પર દોષનો ટોપલો ઢોળી રહ્યા છે. ધારાસભ્ય કિરીટ પટેલે ચીફ ઓફિસરની સરખામણી કાચંડા સાથે કરીને પાટણના રાજકારણમાં ગરમાવો લાવી દીધો છે. એક તરફ ચીફ ઓફિસર પોતે સ્થળ તપાસની સ્પષ્ટતા વાળા લેટર પર સહી કરે છે, અને વિવાદ થતાં જ કાચંડાની જેમ રંગ બદલીને આર્કિટેક્ટનું લાયસન્સ રદ કરી દે છે. આ BU પરમિશન આપવા પાછળ ગાંધીનગરમાં ધારાસભ્યનો આક્ષેપ મુદ્દે પૂછવામાં આવ્યું કે, બસ સ્ટેશનમાં નિયમોનું ઉલ્લંઘન કરીને, માત્ર એક જ દિવસમાં સ્થળ તપાસ બતાવીને BU પરમિશન આપી દેવાઈ.
Patan માં 'ઘરના ભુવા અને ઘરના ડાકલા', BU પરમિશનના વિવાદમાં ધારાસભ્ય અને ચીફ ઓફિસર વચ્ચે રાજકીય જંગ છેડાયો
June 21, 2026 11:27 am
Patan ના નવા બસ સ્ટેશનની વિવાદિત BU પરમિશનનો મુદ્દો હવે આરપારની લડાઈમાં ફેરવાઈ ગયો છે. જિલ્લા સંકલનની બેઠક પૂર્ણ થયા બાદ પાટણના ધારાસભ્ય કિરીટ પટેલે ચીફ ઓફિસર હિરલ ઠાકર પર ગંભીર આક્ષેપો કર્યા છે અને તેમની સરખામણી 'કાચંડા' સાથે કરી દીધી છે! તો બીજી તરફ, ચીફ ઓફિસરે પણ ધારાસભ્યને ખુલ્લી ચેતવણી આપતા કહ્યું છે કે, જો પુરાવા નહીં આપે, તો તેઓ ધારાસભ્ય સામે બદનક્ષીનો દાવો કરીશ.
World Yoga Day 2026 Jamnagar : શિક્ષણ મંત્રી રિવાબા જાડેજાએ પોલીસ હેડક્વાર્ટર ખાતે નાગરિકો સાથે કર્યો યોગાભ્યાસ
June 21, 2026 10:45 am
આજે 12 માં આંતરરાષ્ટ્રીય વિશ્વ યોગ દિવસ નિમિત્તે સમગ્ર દેશ સાથે જામનગરમાં પણ ઉત્સાહ અને ઉમંગનો માહોલ જોવા મળ્યો હતો. શહેરના પોલીસ હેડક્વાર્ટર ખાતે જિલ્લા કક્ષાના મુખ્ય કાર્યક્રમનું આયોજન કરવામાં આવ્યું હતું જેમાં ધારાસભ્યો અને નાગરિકો હાજર રહ્યાં હતા.
3 સ્વદેશી યુદ્ધજહાજ ભારતીય નૌસેનામાં સામેલ
June 21, 2026 10:12 am
PM મોદીએ 3 સ્વદેશી યુદ્ધજહાજને સામેલ કર્યા,INS દુનાગિરી, INS સંશોધક, INS અગ્રચ સામેલ, રક્ષા ક્ષેત્રે ભારત નિર્માતા બની રહ્યું છેઃ PM મોદી
સૈન્ય શક્તિ દુનિયા માટે બજાર નથીઃ PM મોદી.
રાજકોટમાં મંત્રી કુંવરજીભાઈ બાવળિયાએ યોગ કર્યા
June 21, 2026 9:35 am
ગુજરાતના કેબિનેટ મંત્રી કુંવરજીભાઈ બાવળિયા પણ ખાસ ઉપસ્થિત રહ્યા હતા. યોગ દિવસની ઉજવણીની સાથે તેમણે સૌરાષ્ટ્રવાસીઓ માટે રાહતના સમાચાર પણ આપ્યા હતા. મંત્રીએ જણાવ્યું હતું કે, રાજ્યના મુખ્યમંત્રી ભૂપેન્દ્રભાઈ પટેલના નેતૃત્વમાં સિંચાઈ વિભાગ દ્વારા નર્મદાનું પાણી છોડવાનો નિર્ણય લેવામાં આવ્યો છે. ગત કેબિનેટ બેઠકમાં લેવાયેલા આ મહત્વના નિર્ણયના પગલે હવે સૌની યોજના હેઠળ પાણી છોડવાનું શરૂ કરી દેવામાં આવ્યું છે. આગામી એક-બે દિવસમાં સૌરાષ્ટ્રના તમામ ડેમમાં આ પાણી પહોંચી જશે, જેનાથી પીવાના પાણી અને સિંચાઈની સમસ્યામાં મોટી રાહત મળશે. આમ, રાજકોટમાં એક તરફ તંદુરસ્ત જીવન માટે યોગનો સંદેશ ફેલાયો, તો બીજી તરફ પાણીની સમસ્યા નિવારવા સરકારના સક્રિય પ્રયાસોની જાહેરાત થતા નાગરિકોમાં આનંદની લાગણી જોવા મળી હતી.
World Yoga Day 2026 : રાજકોટમાં જળ અને યોગનો સંગમ, 107 મહિલાઓએ પાણીમાં યોગ કરી સૌને કર્યા આશ્ચર્યચકિત
June 21, 2026 9:35 am
રાજકોટમાં આજે 12 મા આંતરરાષ્ટ્રીય વિશ્વ યોગ દિવસની અત્યંત આકર્ષક અને અનોખી રીતે ઉજવણી કરવામાં આવી હતી. સામાન્ય રીતે ગ્રાઉન્ડ કે હોલની અંદર યોગાભ્યાસ થતો હોય છે, પરંતુ રાજકોટમાં મહિલાઓએ પાણીની અંદર 'એક્વા યોગા' કરીને એક નવી પહેલ કરી હતી.
ગુજરાતભરમાં આંતરરાષ્ટ્રીય યોગ દિવસની ઉત્સાહભેર ઉજવણી
June 21, 2026 9:11 am
અમદાવાદ મ્યુનિસિપલ કોર્પોરેશન દ્વારા પ્રહલાદનગર ગાર્ડન ખાતે વિશેષ કાર્યક્રમનું આયોજન કરવામાં આવ્યું હતું, જેમાં કેન્દ્રીય ગૃહ અને સહકારિતા મંત્રી અમિતભાઈ શાહે પોતાના ગાંધીનગર લોકસભા મતવિસ્તારના 100 જેટલા પ્રબુદ્ધ નાગરિકો સાથે વહેલી સવારે યોગ કર્યા હતા. રાજ્યભરમાં વિશ્વ યોગ દિવસની ઉજવણી થઈ રહી છે અને ગુજરાતના મુખ્યમંત્રી ભુપેન્દ્રભાઈ પટેલે માણસામાં યોગ કરીને યોગ દિવસની ઉજવણી કરી હતી. માણસામાં આવેલ સાયન્સ કોલેજમાં યોગ દિવસની ઉજવણી કરાઈ હતી જેમાં ધારાસભ્યો અને સ્થાનિકો પણ હાજર રહ્યાં હતા. સ્વસ્થ જીવન માટે યોગ થીમ પર યોગ દિવસની ઉજવણી કરાઈ હતી. ગુજરાત યોગ બોર્ડના ચેરમેન શિશપાલ રાજપૂત પણ હાજર રહ્યાં અને માણસા ધારાસભ્ય જે.એસ.પટેલ પણ હાજર રહ્યાં હતા.
અમદાવાદ જિલ્લા કક્ષાનો આંતરરાષ્ટ્રીય યોગ દિવસ દાસ્તાન ફાર્મ ખાતે યોજાયો
June 21, 2026 9:10 am
વડાપ્રધાન નરેન્દ્રભાઈ મોદી અને મુખ્યમંત્રી ભૂપેન્દ્રભાી પટેલનાં સંબોધનોનું લાઇવ પ્રસારણ કરવામાં આવ્યું હતું. ઉપસ્થિત સૌએ મહાનુભાવોના વર્ચ્યુઅલ સંબોધનોને સાંભળ્યાં હતાં. આ પ્રસંગે ગુજરાત રાજ્ય સંસ્કૃત બોર્ડના ચેરમેન હિમાંજય પાલીવાલે જણાવ્યું હતું કે સ્વસ્થ, સંસ્કારી અને સમૃદ્ધ ગુજરાતના સંકલ્પને યોગના માધ્યમથી સાકાર કરી શકીશું. સર્વાંગી વિકાસ માટે યોગ મહત્ત્વપૂર્ણ છે. સમાજમાં યોગ માટે જાગૃતિ જરૂરી છે, એવું તેમણે ઉમેર્યું હતું.
World Yoga Day 2026 : અમદાવાદના પ્રહલાદનગર ગાર્ડન ખાતે કેન્દ્રીય ગૃહમંત્રી અમિતભાઈ શાહ તેમજ નાયબ મુખ્યમંત્રી હર્ષભાઈ સંઘવીએ કર્યા યોગ
June 21, 2026 9:10 am
અમદાવાદ જિલ્લા કક્ષાના આંતરરાષ્ટ્રીય યોગ દિવસની ઉજવણી અમદાવાદના નરોડામાં આવેલા વિન્ટેજ વિલેજ કાર મ્યુઝિયમ, દાસ્તાન ફાર્મ ખાતે કરવામાં આવી હતી. આ પ્રસંગે ગુજરાત રાજ્ય સંસ્કૃત બોર્ડના ચેરમેન હિમાંજય પાલીવાલ, સાંસદ હસમુખભાઈ પટેલ અને કલેક્ટર ભવ્ય વર્માની પ્રોત્સાહક ઉપસ્થિતિમાં યોગાભ્યાસ કરવામાં આવ્યો હતો.
જર્મનીના મ્યુનિકમાં બે માલગાડી વચ્ચે ટક્કર
June 21, 2026 8:38 am
ટ્રેન અકસ્માતમાં એક વ્યક્તિનું મોત નીપજ્યું. બ્રિજ પર ટ્રેન વચ્ચે ટક્કર, બે ડબ્બા ખડી પડ્યા. દુર્ઘટનાથી રેલ સેવા, વાહનવ્યવહારને અસર.
આ વખતે યોગ દિવસની થીમ "Yoga for Healthy Ageing"
June 21, 2026 8:11 am
ખોટા સમયે અથવા ખોટી રીતથી કરાયેલ યોગાભ્યાસ લાભની જગ્યાએ નુકસાન પણ પહોંચાડી શકે છે. આયુર્વેદ અને યોગ વિજ્ઞાન અનુસાર યોગ માટે યોગ્ય સમય, ખોરાક અને શરીરની તૈયારીનું ખાસ મહત્વ છે. જો આ નિયમોનું પાલન કરવામાં આવે તો યોગના લાભો અનેકગણા વધી શકે છે.
યોગ દ્વારા સ્વસ્થ અને નિરોગી જીવનનો સંદેશ આપવામાં આવ્યો
June 21, 2026 8:10 am
ભાજપ પ્રદેશ પ્રમુખ જગદીશભાઈ વિશ્વકર્માએ કાર્યક્રમમાં હાજરી આપી હતી અને રાજ્યકક્ષાના મંત્રી દર્શનાબેન વાઘેલા પણ વિશેષ ઉપસ્થિત રહ્યા હતા. વિશ્વ યોગ દિવસને લઈ શહેરમાં ઉત્સાહનો માહોલ જોવા મળ્યો. છે અને વિવિધ સંસ્થાઓ અને યોગ ગ્રુપ દ્વારા યોગાસનોનું પ્રદર્શન કરવામાં આવ્યું હતુ. યોગના મહત્વ અંગે લોકોને જાગૃત કરવાનો પ્રયાસ કરવામાં આવ્યો હતો અને મહત્તમ રીતે લોકો યોગ કરે અને રોગ ભગાવી જીવનને સ્વસ્થય રાખે તેવો સંદેશો આપવામાં આવ્યો હતો.
World Yoga Day 2026 : અમદાવાદ રિવરફ્રન્ટ પર વિશ્વ યોગ દિવસની ભવ્ય ઉજવણી, ગુજરાત ભાજપ પ્રદેશ પ્રમુખ જગદીશભાઈ વિશ્વકર્મા રહ્યાં હાજર
June 21, 2026 8:10 am
અમદાવાદ રિવરફ્રન્ટ ખાતે આજે વિશ્વ યોગ દિવસની ઉજવણી કરવામાં આવી હતી, તો અમદાવાદ શહેરના ધારાસભ્યો, ગુજરાત ભાજપ પ્રદેશ પ્રમુખ જગદીશભાઈ વિશ્વકર્મા,મંત્રી દર્શનાબેન વાઘેલા અને સ્થાનિકો હાજર રહ્યાં હતા.
યોગ દિવસ પૂર્વે વડોદરામાં અનોખો નજારો સર્જાયો હતો
June 21, 2026 7:30 am
આંતરરાષ્ટ્રીય યોગ દિવસ પૂર્વે વડોદરામાં 50થી વધુ મહિલાઓએ સમા સ્પોર્ટ્સ કોમ્પલેક્ષના સ્વિમિંગ પૂલમાં અનોખો 'જળ યોગ' કર્યો. આ સત્ર યોગગુરુ રાજેશ બારોટ અને સુપ્રિયા ભાવસારના માર્ગદર્શન હેઠળ યોજાયું, જેણે ફિટનેસનો સંદેશ આપ્યો હતો. પાણીની સપાટી પર રહીને શરીરનું સંતુલન જાળવવું એ એક મોટી કળા છે. આ પડકારને ઝીલી લેતા મહિલાઓએ ખૂબ જ સચોટતા અને એકાગ્રતા સાથે યોગાસનો કર્યા હતા.
તંદુરસ્ત અને આત્મનિર્ભર જીવન માટે વડોદરામાં યોગની જ્યોત
June 21, 2026 7:30 am
યોગ દ્વારા તંદુરસ્ત, સક્રિય અને આત્મનિર્ભર જીવન જીવવાનો સંદેશ આપવામાં આવ્યો હતો. વડોદરામાં યોગ દિવસની ઉજવણીમાં લોકોએ યોગ કર્યા હતા. મંત્રી જીતુભાઈ વાઘાણી અને ધારાસભ્યો આ યોગ કાર્યક્રમમાં હાજર રહ્યાં હતા અને સ્વસ્થ રહો અને યોગ કરી રોગ ભગાવોનો સંદેશો આપવામાં આવ્યો હતો. આંતરરાષ્ટ્રીય યોગ દિવસની ઉજવણીને લઈને સમગ્ર દેશમાં ઉત્સાહનો માહોલ છે.
World Yoga Day 2026 : વડોદરામાં 12 માં આંતરરાષ્ટ્રીય યોગ દિવસની ભવ્ય ઉજવણી, મંત્રી જીતુભાઈ વાઘાણી રહ્યાં હાજર
June 21, 2026 7:30 am
વડોદરામાં 12 માં આંતરરાષ્ટ્રીય યોગ દિવસની ભવ્ય ઉજવણી કરાઈ હતી અને "Yoga for Healthy Ageing" થીમ સાથે યોગ દિવસની ઉજવણી કરવામાં આવી હતી. ગુજરાત સરકારના મંત્રી જીતુભાઈ વાઘાણી મુખ્ય અતિથિ તરીકે રહ્યા ઉપસ્થિત.
બાળક અને યુવાનોએ લીધો ભાગ
June 21, 2026 7:19 am
કોલકાતાના મેદાનમાં વહેલી સવારથી જ ઉત્સાહી યોગાભ્યાસીઓનો જમાવડો જોવા મળ્યો હતો. સૂર્યોદયની સાથે જ્યારે આખું વાતાવરણ યોગમય બન્યું, ત્યારે વડાપ્રધાન મોદીએ સહભાગીઓ સાથે મળીને યોગના વિવિધ આસનો અને પ્રાણાયામ કર્યા હતા. આ કાર્યક્રમ માત્ર શારીરિક કસરત પૂરતો સીમિત ન રહેતા, તે માનસિક શાંતિ અને આધ્યાત્મિક જાગૃતિનું કેન્દ્ર બન્યો હતો. યોગ નિષ્ણાતોના માર્ગદર્શન હેઠળ કરવામાં આવેલા આ સામૂહિક પ્રદર્શનમાં બાળકો, યુવાનો અને વરિષ્ઠ નાગરિકોએ સમાન ઉત્સાહ સાથે ભાગ લીધો હતો.
કોલકાતામાં 10 લાખ લોકોએ PM મોદી સાથે યોગ કરી રચ્યો ઇતિહાસ!
June 21, 2026 7:17 am
આંતરરાષ્ટ્રીય યોગ દિવસ નિમિત્તે પશ્ચિમ બંગાળની રાજધાની કોલકાતામાં એક ઐતિહાસિક અને અદભુત દ્રશ્ય જોવા મળ્યું હતું. વડાપ્રધાન નરેન્દ્રભાઈ મોદીની ઉપસ્થિતિમાં આયોજિત આ વિશાળ કાર્યક્રમમાં અંદાજે 10 લાખથી વધુ લોકોએ એકસાથે યોગાસન કરીને વિશ્વને સ્વાસ્થ્ય અને એકતાનો સંદેશ આપ્યો છે.
આ વર્ષે યોગ ફોર હેલ્થી થીમ છે : CM ભુપેન્દ્રભાઈ પટેલ
June 21, 2026 7:03 am
CM ભુપેન્દ્રભાઈ પટેલે આ પ્રસંગે સ્પીચ દરમિયાન કહ્યું કે, આજ સમગ્ર રાજ્યમાં 330 થી વધુ જગ્યા પર 1.15 કરોડ લોકો જોડાયા છે. આજ અનેક લોકો ગંભીર રોગોથી પીડાઈ રહ્યાં છે. યોગ એ આરોગ્ય માટે સર્વગ્રાહી અભિગમ છે. યોગ આયુષ્ય સુધીનું કવચ છે. દરેક સંકલ્પ પાર પાડવા લીડ લેતું રાજ્ય ગુજરાત છે. 1.50 લાખ યોગ ટ્રેનર તૈયાર કરવામાં આવ્યા છે અને દેશમાં સૌથી વધુ યોગ ટ્રેનર ગુજરાતમાં છે. 5000થી વધુ નિશુલ્ક યોગ ક્લાસ થી 8 લાખ લોકો યોગ સાથે જોડાયા છે.
યોગ એક દિવસ માટે નહીં રોજિંદા જીવશૈલી બને તે જરૂરી છે : CM ભુપેન્દ્રભાઈ પટેલ
June 21, 2026 7:02 am
CM ભુપેન્દ્રભાઈ પટેલે આ પ્રસંગે સ્પીચ દરમિયાન કહ્યું કે, 12માં વિશ્વ યોગ દિવસની ઉજવણી દુનિયામાં થઈ રહી છે અને દરેક લોકો યોગમય બન્યા છે. વિશ્વ નેતા મોદી શાસનના 12 વર્ષ પૂર્ણ થયા છે અને યોગનો મુખ્ય આધાર પ્રાણ વાયુ છે. શુધ્ધ હવા માટે એક પેડ માં કે નામ વાત કરી અને ઓક્સિજન વન તૈયાર કરવાનું આહવાન કર્યું હતું ભુપેન્દ્રભાઈ પટેલે. સોલર એનર્જીથી ગ્રીન એનર્જી આપી મિશન લાઈફની અભીગમ અપનાવીની વાત કરી હતી અને પીએમ નરેન્દ્રભાઈ મોદી જનહિત કામો આજ ખૂબ ઉપયોગી થયા.
World Yoga Day 2026 : માણસામાં રાજય કક્ષાના યોગ દિવસની ઉજવણી, મુખ્યમંત્રી ભુપેન્દ્રભાઈ પટેલની વિશેષ ઉપસ્થિતિ
June 21, 2026 7:02 am
21 જૂનના રોજ વિશ્વભરમાં યોગ દિવસની ઉજવણી કરવામાં આવે છે. આજે રાજય કક્ષાના યોગ દિવસની ઉજવણી મહેસાણાના માણસામાં થઈ હતી જેમાં ગુજરાત રાજયના મુખ્યમંત્રી ભુપેન્દ્રભાઈ પટેલ અને ધારાસભ્યો હાજર રહ્યાં હતા.
ગ્રાહકો ફૂડ વિભાગને કરી શકે છે ફરિયાદ
June 21, 2026 6:26 am
જયારે પણ આવી ઘટના બને તે સમયે ગ્રાહક ફૂડ વિભાગને પણ આ મામલે જાણ કરી ફરિયાદ નોંધાવી શકે છે. જો વાતમાં તથ્ય હોય તો તંત્ર પણ રેસ્ટોરન્ટને સીલ મારવા સુધીની કામગીરી કરતું હોય છે. તો આવા કિસ્સા ગુજરાતમાં ઘણા બન્યા છે જેમાં ગ્રાહકે વેજ ફૂડ મંગાવ્યું હોય અને નોનવેજ ફૂડ આવ્યું હોય ત્યારે તંત્રએ દંડ ફટકારવા સુધીની પણ કામગીરી કરી છે.
ભુજની મેક ડોનાલ્ડ્સ રેસ્ટોરન્ટમાં વિવાદ
June 21, 2026 6:25 am
ભુજના ત્રિમંદિર નજીક આવેલ મેક ડોનાલ્ડ્સ રેસ્ટોરન્ટમાં વિવાદ થયો છે જેમાં વેજ ઓર્ડરની જગ્યાએ નોનવેજ આપવામાં આવ્યો હોવાનો ગ્રાહકનો આક્ષેપ છે, ગ્રાહકના જણાવ્યા મુજબ તેમણે વેજનો ઓર્ડર આપ્યો હતો પરંતુ તેમને નોનવેજ આપવામાં આવ્યું અને આ ઘટનાને પગલે ગ્રાહકમાં ભારે રોષ ભભુકયો છે. ગ્રાહકે રેસ્ટોરન્ટના સંચાલકો સામે નારાજગી વ્યક્ત કરી છે. ગ્રાહકે સમગ્ર મામલે બેદરકારી બદલ જવાબદારો સામે કાર્યવાહી કરવાની માગ કરી છે.
Kutch : ભુજ મેકડોનાલ્ડ્સની ગંભીર બેદરકારી! , વેજ બર્ગરના બદલે નોન-વેજ પીરસાતા ગ્રાહકમાં રોષ
June 21, 2026 6:25 am
ભુજના ત્રિમંદિર નજીક આવેલા મેક ડોનાલ્ડ્સ રેસ્ટોરન્ટ વિવાદમાં આવી છે. જેમાં ગ્રાહકે વેજ વસ્તુનો ઓર્ડર કરતા તેને નોનવેજ પીરસાયું હોવાનો આક્ષેપ કરવામાં આવ્યો છે, તો ગ્રાહકે રેસ્ટોરન્ટના મેનેજરને આ બાબતે જાણ કરી હતી પરંતુ કોઈ સરખો જવાબ ના આપતા વિવાદ વકર્યો હતો.
જિલ્લા કલેક્ટર ભવ્ય વર્માના અધ્યક્ષસ્થાને જિલ્લા સંકલન સમિતિની બેઠક યોજાઈ
June 21, 2026 6:15 am
નાગરિકોના હિતમાં સંકલનના તમામ પ્રશ્નોનો સત્વરે હકારત્મક ઉકેલ લાવવા અનુરોધ કરતાં કલેક્ટર અને જિલ્લા મેજિસ્ટ્રેટ. અમદાવાદ કલેક્ટર અને જિલ્લા મેજિસ્ટ્રેટ ભવ્ય વર્માના અધ્યક્ષસ્થાને જિલ્લા સંકલન સમિતિની બેઠક યોજાઈ હતી. આ બેઠકમાં પુછાયેલા પ્રશ્નોને પ્રાધાન્ય આપી, નાગરિકોના હિતમાં તેનો સત્વરે હકારાત્મક ઉકેલ લાવવા સંબંધિત અધિકારીઓને અનુરોધ કરાયો હતો.
અમદાવાદ એસ.જી.હાઈવે પર વહેલી સવારે અકસ્માત સર્જાયો
June 21, 2026 5:35 am
પકવાન બ્રિજ પર અકસ્માત સર્જાતા બાઈક ચાલકનું ઘટના સ્થળે થયું મોત. અકસ્માત જાણ થતા પોલીસ ઘટના સ્થળે પહોંચી. મૃતદેહને પોસ્ટમોર્ટમ માટે સોલા સિવિલ ખાતે ખસેડવામાં આવ્યો. કોઈ અજાણ્યા વાહન દ્વારા ટક્કર મારી ફરાર થયો હોવાની પ્રાથમિક તારણ.
દેશભરમાં આંતરરાષ્ટ્રીય યોગ દિવસની ભવ્ય ઉજવણી
June 21, 2026 5:12 am
રાજકોટ મહાનગરપાલિકા દ્વારા રેસકોર્સ ગ્રાઉન્ડમાં આયોજન. રાજકોટમાં સવારે 6 વાગ્યે યોગ દિવસ ઉજવાશે. ભવ્ય ઉજવણીમાં મોટી સંખ્યામાં શહેરીજનો જોડાશે. કાર્યક્રમમાં સાંસદ પરશોત્તમ રૂપાલા ખાસ ઉપસ્થિત રહેશે. સ્થાનિક ધારાસભ્યો અને રાજકીય અગ્રણીઓ પણ હાજર રહેશે.
દિલ્હીના તાલકટોરા સ્ટેડિયમમાં કોળી સમાજનું રાષ્ટ્રીય સંમેલન
June 21, 2026 5:12 am
અખિલ ભારતીય કોળી સમાજ દ્વારા સંમેલનનું આયોજન. કાર્યક્રમમાં દેશભરમાંથી સમાજના અગ્રણીઓ ભાગ લેશે. સંમેલનમાં શૈક્ષણિક અને સામાજિક ઉત્થાન અંગે ચર્ચા થશે. સંગઠનાત્મક વિસ્તાર અને વિવિધ મુદ્દાઓ પર વિચારવિમર્શ કરાશે.
સુરત રેતી ચોરી મામલે હાઈકોર્ટનું આકરું વલણ
June 21, 2026 5:11 am
ગુજરાત હાઈકોર્ટમાં અરજદાર દ્વારા કરાઈ અરજી. અધિકારીઓ આંખ આડા કાન કરતા હોવાની ટિપ્પણી. આવા બેદરકાર અધિકારીઓને ઘરભેગા કરવા જોઈએ: HC. બારડોલીના તાજપુર બુજરંગ ગામે બેફામ ખનન. સરકારી જમીન પર મોટાપાયે ખનન થતો આક્ષેપ. સરકારી વકીલ મુજબ 37 હજાર ટન ચોરી. અરજદારના વકીલ મુજબ 1 લાખ ટન ચોરી. 2 વર્ષથી રજૂઆત છતાં અધિકારીઓ નિષ્ફળ રહ્યા. અધિકારીઓ ફરજ નિભાવવામાં નિષ્ફળ રહ્યાનો આક્ષેપ.
ગોધરાના ઝુડિયો શોરૂમ પાસે કારમાં ભીષણ આગ
June 21, 2026 5:10 am
પાર્ક કરેલી સ્વિફ્ટ કારમાં આગથી ભારે અફરાતફરી. ગોધરાના વાવડી વિસ્તારમાં શોરૂમ બહાર ઘટના. જોતજોતામાં કાર સંપૂર્ણપણે બળીને ખાખ થઇ ગઇ. ફાયર બ્રિગેડની ટીમે તાત્કાલિક પહોંચી આગ પર કાબૂ મેળવ્યો. સદનસીબે ભયાનક દુર્ઘટનામાં કોઇ જાનહાનિ થઇ નથી. હાલ આગ લાગવાનું ચોક્કસ કારણ જાણી શકાયું નથી.
પાટણ બસ પોર્ટની પરમિશન મુદ્દે રાજકારણ ગરમાયું
June 21, 2026 5:10 am
ધારાસભ્ય કિરીટ પટેલ અને ચીફ ઓફિસર સામસામે. ધારાસભ્યે ચીફ ઓફિસર પર ગંભીર આક્ષેપો કર્યા. કિરીટ પટેલે ચીફ ઓફિસરની સરખામણી કાચંડા સાથે કરી. ગાંધીનગરમાં કરોડોના આર્થિક વ્યવહારો થયાનો આક્ષેપ. ચીફ ઓફિસર હિરલ ઠાકરે આક્ષેપોને વાણીવિલાસ ગણાવ્યા. પુરાવા આપો નહીંતર બદનક્ષીનો દાવો કરવાની ચેતવણી. આર્કિટેક્ટ પુત્રએ ગેરરીતિ આચરતા લાયસન્સ રદ કરાયું.