Amravati Car Accident: હાઈવે પર સ્પીડનો કહેર
અમરાવતી જિલ્લાના ધામણગાંવ રેલવે તહસીલ વિસ્તારમાંથી પસાર થતા સમૃદ્ધિ મહામાર્ગ પર આ કાળજું કંપાવી દેનારો અકસ્માત થયો હતો. નાગપુરથી મુંબઈ તરફ જઈ રહેલી એક તેજ રફતાર કાર આગળ ચાલતા ટ્રકની પાછળ ધડાકાભેર અથડાઈ હતી. આ ટક્કર એટલી જોરદાર હતી કે કારનો આગળનો ભાગ સંપૂર્ણપણે કચડાઈ ગયો હતો. કારની સ્પીડ ખૂબ જ વધારે હોવાના કારણે ચાલકે નિયંત્રણ ગુમાવ્યું હોવાની આશંકા છે.
Amravati Car Accident: કાળના પંજાનો ભોગ બન્યો આખો પરિવાર
આ ગમખ્વાર અકસ્માતમાં કારમાં સવાર તમામ 5 લોકોએ ઘટનાસ્થળે જ દમ તોડી દીધો હતો. મૃતકોમાં 2 પુરુષ, 2 મહિલાઓ અને 1 નાની બાળકીનો સમાવેશ થાય છે. પોલીસની પ્રાથમિક તપાસ મુજબ તમામ મૃતકો ચંદ્રપુર જિલ્લાના રહેવાસી હતા. તેઓ એક જ પરિવારના સભ્યો હતા. આ પરિવાર કોઈ અંગત કામ માટે મુંબઈ જઈ રહ્યો હતો. ત્યારે અધવચ્ચે જ કાળે તેમનો કોળિયો કરી લીધો.
ઘટનાસ્થળે રાહત અને બચાવ કામગીરી
અકસ્માતની ગંભીરતા જોઈને હાઈવે પરથી પસાર થતા અન્ય વાહનચાલકોએ પોલીસને જાણ કરી હતી. માહિતી મળતા જ સ્થાનિક પોલીસ અને સમૃદ્ધિ મહામાર્ગની ઈમરજન્સી રેસ્ક્યુ ટીમ ક્રેન તેમજ કટર સાથે ઘટનાસ્થળે દોડી આવી હતી. બચાવ ટીમે કારના પતરા કાપીને મૃતદેહો બહાર કાઢ્યા હતા. પોલીસે તમામ મૃતદેહોને પોસ્ટમોર્ટમ માટે જિલ્લા હોસ્પિટલ મોકલી આપ્યા હતા. આ સાથે ચંદ્રપુરમાં રહેતા તેમના સગા-સંબંધીઓને પણ ઘટનાની જાણ કરવામાં આવી છે.
હાઈવેની સુરક્ષા સામે ઉઠ્યા ગંભીર સવાલો
આ ભીષણ અકસ્માત બાદ સમૃદ્ધિ મહામાર્ગ પર વાહનોની અનિયંત્રિત ગતિ અને સુરક્ષા વ્યવસ્થાને લઈને ફરી એકવાર ગંભીર સવાલો ઉભા થયા છે. સ્થાનિક નાગરિકોના જણાવ્યા અનુસાર હાઈવે પર સીસીટીવી કેમેરા અને સ્પીડ ગન હોવા છતાં વાહનોની ગતિ પર કોઈ અસરકારક નિયંત્રણ નથી. વારંવાર થતા અકસ્માતોને રોકવા માટે હવે પોલીસ પેટ્રોલિંગ વધારવાની અને ગતિ મર્યાદાનું કડક પાલન કરાવવાની માંગ ઉગ્ર બની છે.
આ પણ વાંચો--- Mumbai Poisoning Plot Foil: ઓનલાઈન મંગાવ્યું 50 કિલો ઝેર અને 14,000 કેપ્સ્યુલ, મુંબઈમાં હજારો લોકોને મારી નાખવાના કાવતરાનો પર્દાફાશ
