Maharashtra: હુમલા બાદ PM મોદીએ સુખબીર બાદલની તબિયત પૂછી, પત્ની હરસિમરત કૌરને કર્યો ફોન

તેમના પર કૃપાણથી હુમલો કરી દીધો હતો

પ્રાપ્ત માહિતી અનુસાર, સુખબિરી સિંહ બાદલ નાંદેડના ગુરુદ્વારા માતા સાહિબ દેવાન જી મુગત ખાતે હાજર હતા તે દરમિયાન એક નિહંગ હુમલાખોરે ગુરુદ્વારાની અંદર જ તેમના પર કૃપાણથી હુમલો કરી દીધો હતો. આ અચાનક થયેલા હુમલામાં સુખબિરી સિંહ બાદલ ઘાયલ થયા હતા અને તેમના હાથમાં ત્રણ ટાંકા આવ્યા છે. ઘટનાસ્થળે હાજર સુરક્ષાકર્મીઓ અને લોકોએ તાત્કાલિક કાર્યવાહી કરીને હુમલાખોરને ઝડપી લીધો હતો અને પોલીસને હવાલે કર્યો હતો. નાંદેડના પોલીસ અધિક્ષક (SP - Superintendent of Police) નીલાભ રોહને આ મામલાની પુષ્ટિ કરતા જણાવ્યું છે કે હુમલાખોરને કસ્ટડીમાં લેવામાં આવ્યો છે અને કાયદેસરની કાર્યવાહી હાથ ધરી છે.

PM મોદીએ સિંહ બાદલના પત્ની સાથે કરી વાત

આ ઘટના બાદ વડાપ્રધાન નરેન્દ્રભાઈ મોદીએ સુખબિરી સિંહ બાદલના પત્ની અને સાંસદ હરસિમરત કૌર બાદલ (Harsimrat Kaur Badal) સાથે ટેલિફોન પર વાતચીત કરી હતી. સૂત્રોના જણાવ્યા અનુસાર, પીએમ મોદીએ સમગ્ર ઘટના અંગે માહિતી મેળવી હતી અને સુખબિરી સિંહ બાદલના સ્વાસ્થ્ય અંગે ચિંતા વ્યક્ત કરી હતી. આ ઉપરાંત મહારાષ્ટ્રના મુખ્યમંત્રી દેવેન્દ્ર ફડણવીસ (Devendra Fadnavis) અને નાયબ મુખ્યમંત્રી એકનાથ શિંદે (Eknath Shinde) એ પણ હરસિમરત કૌર બાદલ સાથે ફોન પર વાત કરી હતી. મુખ્યમંત્રી દેવેન્દ્ર ફડણવીસે આ મામલાની ઉચ્ચસ્તરીય તપાસના આદેશ આપ્યા છે અને સ્પષ્ટ કર્યું છે કે દોષિતોને કોઈપણ સંજોગોમાં છોડવામાં આવશે નહીં.

પોલીસ દ્વારા ઊંડાણપૂર્વક તપાસ

આ હુમલા પાછળના કારણો અને સુરક્ષામાં થયેલી ચૂક અંગે પોલીસ દ્વારા ઊંડાણપૂર્વક તપાસ ચાલી રહી છે. બીજી તરફ, છેલ્લા કેટલાક સમયથી ભાજપ (BJP) અને અકાલી દળ વચ્ચે વધતી નિકટતા અને રાજકીય સમીકરણોની ચર્ચા વચ્ચે આ ઘટના ઘટી છે, જેને લઈને રાજકીય વર્તુળોમાં અનેક પ્રકારની અટકળો લગાવાઈ રહી છે.

આ પણ વાંચો: બનાસકાંઠાના ડીસામાં કરૂણ દુર્ઘટના: કપડાં સૂકવતી વખતે લોખંડના તારમાં કરંટ ઉતરતા પિતા-પુત્રીનું કમકમાટીભર્યું મોત