પુણે-મુંબઈ એક્સપ્રેસવેના 'મિસિંગ લિંક' વિભાગમાં પુણેથી મુંબઈ તરફની લેન પર આવેલી બીજી ટનલ (ટનલ-2)ના બહાર નીકળવાના માર્ગ નજીક ભારે વરસાદ દરમિયાન ભૂસ્ખલન થયું હતું. સદભાગ્યે, તે સમયે ત્યાંથી કોઈ વાહન પસાર થઈ રહ્યું ન હતું, જેના કારણે મોટી દુર્ઘટના ટળી હતી..

ટ્રાફિક અન્ય માર્ગે વાળવામાં આવ્યો

સુરક્ષાના પગલાં રૂપે, પુણેથી મુંબઈ તરફ જતો ટ્રાફિક સવારે ૪:૦૦ વાગ્યાથી સંપૂર્ણપણે અટકાવી દેવામાં આવ્યો છે. સાવચેતીના ભાગરૂપે મુંબઈથી પુણે તરફની લેન પણ કામચલાઉ ધોરણે બંધ કરવામાં આવી છે. આ ઉપરાંત, બોરઘાટ વિસ્તારમાં પાણી ભરાઈ જવાને કારણે એક્સપ્રેસવે પરના ટ્રાફિકને અસર થઈ છે. મહારાષ્ટ્ર રાજ્ય માર્ગ વિકાસ નિગમ (MSRDC) એ જણાવ્યું હતું કે હાઇવે ટ્રાફિક પોલીસ સાથે સંકલન કરીને પરિસ્થિતિ પર સતત નજર રાખવામાં આવી રહી છે, અને સલામતીને પ્રાથમિકતા આપીને ટ્રાફિકને ડાયવર્ટ કરવામાં આવ્યો છે..

વરસાદથી રેલ સેવાઓ પર પણ અસર પડી 

સતત વરસાદને કારણે રેલ્વે કામગીરી પર પણ અસર પડી છે. કર્જત અને લોનાવલા વચ્ચે સ્થિત દક્ષિણ-પૂર્વ ઘાટ વિભાગમાં ઠાકુરવાડી અને મંકી હિલ લૂપ કેબિન વચ્ચે ભૂસ્ખલન થવાથી મુંબઈ ડિવિઝનની 'અપ' મુખ્ય લાઇન ખોરવાઈ ગઈ છે. પરિણામે, ઘણી ટ્રેનો રદ કરવામાં આવી છે અથવા ડાયવર્ટ કરવામાં આવી છે. રોડ અને રેલ બંને રૂટ પ્રભાવિત થવાથી, મુંબઈ અને પુણે વચ્ચેની કનેક્ટિવિટી ભારે ખોરવાઈ ગઈ છે..

થાણેમાં રેડ એલર્ટ જાહેર કરવામાં આવ્યું

રાતભર પડેલા ભારે વરસાદને કારણે થાણે શહેરના અનેક વિસ્તારોમાં પાણી ભરાઈ ગયા છે. તળાવનું પાણી રસ્તા પર આવી જવાથી તલાવપાલી વિસ્તારમાં વાહનવ્યવહાર ખોરવાઈ ગયો છે. હવામાન વિભાગે થાણે જિલ્લા માટે રેડ એલર્ટ જાહેર કર્યું છે. દરમિયાન, વરસાદને કારણે થાણેમાં લગભગ 100 વૃક્ષ ધરાશાય થયા છે..

BMC દ્વારા ચેતવણી જાહેર

BMCએ મુંબઈ, થાણે, પાલઘર અને રાયગઢ જિલ્લાઓ માટે સવારે ૪ વાગ્યાથી અમલમાં આવે તેવી ત્રણ કલાકનું 'રેડ' નાઉકાસ્ટ  ચેતવણી જાહેર કરી છે. આ વિસ્તારોમાં 50 થી 60 કિમી પ્રતિ કલાકની ઝડપે ફૂંકાતા જોરદાર પવનો સાથે ભારે વરસાદની શક્યતા છે. લોકોને સતર્ક રહેવા અને બિનજરૂરી રીતે ઘરની બહાર નીકળવાનું ટાળવા માટે અનુરોધ કરવામાં આવ્યો છે..