આરોપી સામે ગંભીર આરોપ, હજારો કેપ્સૂલ જપ્ત

પોલીસના જણાવ્યા મુજબ આરોપીનું નામ ફૈયાજ પ્રેમજી (Faiyaz Premji) છે, જે પુણે (Pune)નો રહેવાસી છે અને પેઇન્ટ (Paint Business)નો વ્યવસાય કરે છે. પૂછપરછ દરમિયાન આરોપીએ કથિત રીતે સ્વીકાર્યું કે તેણે મુહર્રમના જુલૂસને નિશાન બનાવવા માટે મોટી સંખ્યામાં ઝેરી કેપ્સૂલ તૈયાર કરાવવાનો પ્લાન બનાવ્યો હતો. પોલીસે તેની પાસેથી કુલ 14,900 કેપ્સૂલ જપ્ત કરી છે, જ્યારે આશરે 30,000 કેપ્સૂલ તૈયાર કરવાનો તેનો ઇરાદો હોવાનું પણ સામે આવ્યું છે.

દરેક કેપ્સૂલમાં ઝેર ભેળવવાનો આરોપ

પોલીસના જણાવ્યા અનુસાર આરોપીએ લગભગ 50 કિલોગ્રામ ઝિંક ફોસ્ફાઇડ (Zinc Phosphide) મંગાવ્યું હતું. આ રસાયણ સામાન્ય રીતે ઉંદર મારવાની દવા (Rat Poison) તરીકે ઉપયોગમાં લેવાય છે. તપાસમાં એવો દાવો કરવામાં આવ્યો છે કે દરેક કેપ્સૂલમાં અંદાજે એક ગ્રામ ઝિંક ફોસ્ફાઇડ ભેળવવામાં આવ્યું હતું. પોલીસનું કહેવું છે કે આરોપી છેલ્લા કેટલાક દિવસોથી પોતાના રહેઠાણ પર આ કેપ્સૂલ તૈયાર કરી રહ્યો હતો.

DCP જયંત મીનાનું નિવેદન

ડેપ્યુટી કમિશનર ઓફ પોલીસ (DCP) જયંત મીના (Jayant Meena)એ જણાવ્યું કે જુલૂસ દરમિયાન એક શંકાસ્પદ વ્યક્તિ મોટી સંખ્યામાં કેપ્સૂલ વહેંચતો જોવા મળ્યો હતો. પૂછપરછમાં જાણવા મળ્યું કે તેની પાસે આ પ્રકારની દવાઓ વહેંચવાની કોઈ પરવાનગી (Permission) નહોતી. વહેલી સવારે લગભગ 4 વાગ્યે એક વ્યક્તિને ઉલ્ટી અને પેટમાં દુખાવાની ફરિયાદ મળ્યા બાદ પોલીસની ટીમે તરત કાર્યવાહી કરી અને શંકાસ્પદને કસ્ટડીમાં લીધો.

ઈરાન અને ઈરાકની મુલાકાત પણ તપાસના દાયરામાં

પોલીસ તપાસ દરમિયાન એ પણ સામે આવ્યું છે કે વર્ષ 2025માં આરોપી ઈરાન (Iran) અને ઈરાક (Iraq)ની મુલાકાતે ગયો હતો. જોકે તે પ્રવાસનો હેતુ શું હતો તે અંગે હજુ સુધી કોઈ સ્પષ્ટ માહિતી મળી નથી. તપાસ એજન્સીઓ હવે તેના તમામ સંપર્કો, મુસાફરી અને અન્ય સંભવિત કડીઓની પણ તપાસ કરી રહી છે.

મોટી દુર્ઘટના ટળી, તપાસ ચાલુ

DCP જયંત મીનાએ જણાવ્યું કે સમયસરની કાર્યવાહીથી એક સંભવિત મોટી દુર્ઘટના અટકાવી શકાયી છે. હાલ સમગ્ર મામલે વિવિધ પાસાઓથી તપાસ ચાલી રહી છે. પોલીસ આરોપીના હેતુ (Motive), સંભવિત સાગરીતો અને આ કાવતરાની પાછળ કોઈ મોટું નેટવર્ક તો નથી ને તેની પણ તપાસ કરી રહી છે. અધિકારીઓના જણાવ્યા અનુસાર જો આ કેપ્સૂલ લોકો સુધી પહોંચી ગઇ હોત તો ગંભીર જાનહાનિ થઈ શકતી હતી. તેથી આ કેસને અત્યંત ગંભીરતાથી લઈ આગળની કાર્યવાહી કરવામાં આવી રહી છે.

આ પણ વાંચો : Ujjain Muharram Incident: ઉજ્જૈનમાં મોહરમ જુલૂસમાં દહેશતનું તાંડવ, 40 ફૂટ ઊંચે હવામાં ગાડીમાં કરાયું બ્લાસ્ટ