Mehsana News: નકલી સરકારી ઈમેલ આઈડી બનાવી બેંકને છેતરવાનું કાવતરું, એક આરોપી વિરુદ્ધ ફરિયાદ નોંધાઈ

શું છે સમગ્ર મામલો?

પ્રાપ્ત વિગતો અનુસાર, આરોપી ઋષભ પટવાએ કોઈ ચોક્કસ બેંકમાંથી રિફંડ મેળવવાના ઈરાદાથી આ કાવતરું રચ્યું હતું. આરોપીએ સ્થાનિક પોલીસ સ્ટેશનની ખોટી ઓળખ આપીને એક ફેક ગવર્મેન્ટ ઈમેલ આઈડી બનાવ્યું હતું. આ નકલી આઈડીનો ઉપયોગ કરીને બેંકોને સત્તાવાર પત્રો મોકલવામાં આવ્યા હતા જેથી બેંકના અધિકારીઓને ગેરમાર્ગે દોરીને નાણાકીય લાભ મેળવી શકાય. જોકે, બેંક અને તપાસ દરમિયાન આ ઈમેલ આઈડીની સત્યતા પર શંકા જતા સમગ્ર ભાંડો ફૂટ્યો હતો.

પોલીસ કાર્યવાહી અને કાયદાકીય ગાળિયો

આ બનાવ અંગે મહેસાણા તાલુકા પોલીસ સ્ટેશનના એએસઆઈ (ASI) પ્રિયંકાબેન ચૌધરીએ પોતે ફરિયાદી બનીને આરોપી ઋષભ પટવા વિરુદ્ધ ફરિયાદ નોંધાવી છે. પોલીસ તપાસમાં સામે આવ્યું છે કે આરોપીએ પોતાની ઓળખ છુપાવીને અને ખોટા દસ્તાવેજોના આધારે સરકારી સિસ્ટમનો દુરુપયોગ કર્યો હતો.

આ ગંભીર ગુનાને ધ્યાનમાં રાખીને મહેસાણા તાલુકા પોલીસે આરોપી વિરુદ્ધ ભારતીય ન્યાય સંહિતાની કલમ 204, 319 તેમજ આઈટી એક્ટ (IT Act) ની કલમ 66 (સી) અને (બી) હેઠળ ગુનો દાખલ કર્યો છે. હાલ પોલીસ દ્વારા આરોપીની ધરપકડ કરીને આ આખા નેટવર્ક પાછળ અન્ય કોઈ વ્યક્તિઓ જોડાયેલા છે કે નહીં, તે દિશામાં વધુ તપાસ હાથ ધરવામાં આવી છે. આ કિસ્સો લોકોને સાયબર સુરક્ષા અંગે વધુ સતર્ક રહેવા માટે ચેતવણીરૂપ છે.

આ પણ વાંચોઃ Mehsana: વિસનગરમાં બિનહરીફ ચૂંટાયેલા નગરસેવક દીપક મોદીએ ટ્રેન નીચે પડતું મૂકી કર્યો આપઘાત