Mehsana ના ડાવોલ ગામે ગ્રામ પંચાયતનો મોટો નિર્ણય, 5 અને 10 રૂપિયાના જંક ફૂડ પેકેટ વેચાણ પર પ્રતિબંધ

બાળકોના સ્વાસ્થ્યને ધ્યાનમાં રાખીને ગ્રામસભામાં લેવાયો ઐતિહાસિક નિર્ણય

આજના સમયમાં નાના બાળકોમાં ફાસ્ટ ફૂડ અને જંક ફૂડનું ચલણ ખૂબ જ ઝડપથી વધી રહ્યું છે, જે તેમની નાની વયે જ શારીરિક તબિયત પર વિપરીત અને ગંભીર અસરો પેદા કરે છે. આ સમસ્યાને ગંભીરતાથી ધ્યાને લઈને મહેસાણાના ખેરાલુ તાલુકાના ડાવોલ ગામના મોભીઓ અને ગ્રામજનોએ ગ્રામસભામાં એકજુટ થઈને મહત્ત્વનો નિર્ણય કર્યો છે.

ગામની હદ વિસ્તારમાં આવતી તમામ નાની-મોટી કરિયાણાની કે પાનની દુકાનો પર હવેથી 5 રૂપિયા અને 10 રૂપિયાના પેકેટમાં મળતી ચીજવસ્તુઓ (જેવી કે વેફર્સ, ચિપ્સ, કોલ્ડ ડ્રિંક્સ કે અન્ય હાનિકારક જંક ફૂડ) વેચી શકાશે નહીં. આ આદેશ ગામની હદમાં આવતા તમામ દુકાનદારો માટે ફરજિયાતપણે લાગુ કરવામાં આવ્યો છે.

નિયમ તોડનાર સામે દંડ અને સામાજિક બહિષ્કારની ચેતવણી

ગ્રામ પંચાયતના આ આદેશને કડકાઈથી પાલન કરાવવા માટે અનોખી અને સખત દંડકીય વ્યવસ્થા ગોઠવવામાં આવી છે:

જો કોઈ દુકાનદાર કે વેપારી આ નિયમનું ઉલ્લંઘન કરીને 5 કે 10 રૂપિયાના પેકેટનું વેચાણ કરતા પકડાશે, તો તેને પંચાયત દ્વારા સીધો 1 હજાર રૂપિયાનો દંડ ફટકારવામાં આવશે.

જો કોઈ વેપારી આ નિયમ તોડવાનું ચાલુ રાખશે અને બીજી વખત પકડાશે, તો તે દુકાનદાર કે પરિવારનું સામુહિક બહિષ્કાર કરવામાં આવશે તેવી કડક ચેતવણી પણ આપવામાં આવી છે.

ડાવોલ ગામના આ સરાહનીય પગલાંથી અન્ય ગામોમાં પણ બાળકોના સ્વાસ્થ્ય સંરક્ષણ માટે પ્રેરણા મળશે તેવી આશા વ્યક્ત કરવામાં આવી રહી છે.

આ પણ વાંચો: Ambalal Patel Weather forecast: મઘા નક્ષત્રના પ્રભાવથી રાજ્યમાં ફરી ધમાકો કરશે મેઘરાજા! આ વિસ્તારોમાં ધોધમાર વરસાદ પડશે