Mehsana: માત્ર 5 જ મિનિટમાં સિસ્ટમ હેક કરી કારની ચોરી! મારુતિ સુઝુકીના પૂર્વ કર્મચારી સહિત 2 શખ્સો પકડાયા

• Mehsana  માં ટેબલેટથી કાર હેક કરતી હાઈટેક ગેંગ પકડાઈ
• મારુતિનો પૂર્વ કર્મચારી જ નિકળ્યો કાર ચોરીનો માસ્ટરમાઈન્ડ
• માત્ર 5 જ મિનિટમાં સિસ્ટમ હેક કરી કાર ચોરાતી હતી

Mehsana Car Theft Case: ઉત્તર ગુજરાતના મહેસાણામાં ફિલ્મી સ્ટાઈલે હાઈટેક પદ્ધતિથી કાર ચોરી કરતી એક ખતરનાક આંતરરાજ્ય ગેંગનો મહેસાણા એલસીબી (Mehsana LCB) અને બી-ડિવિઝન પોલીસે પર્દાફાશ કર્યો છે. આ ચોરો કોઈ માસ્ટર કી કે હથોડીથી નહીં, પરંતુ આધુનિક ડિજિટલ ટેબલેટ અને સોફ્ટવેરની મદદથી કારની સિક્યુરિટી સિસ્ટમ હેક કરીને ગણતરીની મિનિટોમાં વાહન ચોરી કરી લેતા હતા.

Mehsana: નાઈટ પેટ્રોલિંગ દરમિયાન ફૂટ્યો ભાંડો

મહેસાણા પોલીસ દ્વારા રાત્રિના સમયે સઘન ચેકિંગ હાથ ધરવામાં આવ્યું હતું. આ દરમિયાન નાગલપુર કોલેજ ત્રણ રસ્તા (Nagalpur College Crossroads) પાસે પોલીસને એક શંકાસ્પદ સફેદ રંગની સ્વિફ્ટ ડીઝાયર (Swift Dzire) કાર જોવા મળી હતી, જેના પર નંબર પ્લેટ નહોતી. પોલીસે ગાડી રોકીને તપાસ કરતા અંદર બેઠેલા શખ્સો સંતોષકારક જવાબ આપી શક્યા નહોતા. કડક પૂછપરછમાં સામે આવ્યું કે આ કાર ચોરીની હતી અને તેની પાછળ એક મોટું આંતરરાજ્ય નેટવર્ક કાર્યરત છે.

Mehsana: મારુતિ સુઝુકીનો પૂર્વ કર્મી નીકળ્યો માસ્ટરમાઇન્ડ

પોલીસે આ મામલે બે શખ્સોની ધરપકડ કરી છે, જેમાં સલીમ નાનુ યામીન પઠાણ (Saleem Nanu Yamin Pathan) જે ઉત્તરાખંડ (Uttarakhand) નો રહેવાસી છે અને સૈયદ ઇફાજુલ હસન (Syed Ifajul Hasan) જે મુંબઈ (Mumbai) નો વતની છે. તપાસમાં બહાર આવ્યું કે સલીમ અગાઉ દિલ્હીમાં મારુતિ સુઝુકી (Maruti Suzuki) કંપનીમાં કામ કરી ચૂક્યો હતો. કંપનીમાં કામ કરવાને કારણે તે કારની ઇલેક્ટ્રિકલ અને ટેકનિકલ સિસ્ટમનો નિષ્ણાત બની ગયો હતો. તેણે પોતાની આ આવડતનો ઉપયોગ ગુનાખોરીની દુનિયામાં કર્યો હતો.

Mehsana: ટેબલેટ અને સોફ્ટવેરથી કાર ચોરતી હાઈટેક ગેંગ ઝડપાઈ! | Gujarat First

હાઈટેક રીતે કારની ચોરી આંતરરાજ્ય ગેંગનો પર્દાફાશ
મહેસાણા LCB અને બી-ડિવિઝન પોલીસની સફળ કાર્યવાહી
બે આરોપીઓ, સલીમ પઠાણ અને સૈયદ ઇફાજુલ હસનની ધરપકડ
આરોપીઓ પાસેથી ૩ લક્ઝરી કાર સહિત કુલ 15.43 લાખનો… pic.twitter.com/d9407w6Gob

— Gujarat First (@GujaratFirst) February 26, 2026

ચોરીની હાઈટેક મોડસ ઓપરેન્ડી

આ ગેંગની કામ કરવાની પદ્ધતિ સાંભળીને પોલીસ પણ ચોંકી ઉઠી હતી. મળતી માહિતી મુજબ તેઓ કબાડીવાળાઓ પાસેથી ઓર્ડર લેતા હતા કે તેમને કયા મોડેલ અને કયા કલરની કાર જોઈએ છે. ઓર્ડર મળ્યા બાદ તેઓ રાત્રિના સમયે રેકી કરતા અને પાર્ક કરેલી કારનો કાચ તોડી કે પછી અન્ય સાધન વડે કારનો લોક ખોલી કાઢી અંદર પ્રવેશતા. ત્યારબાદ, તેઓ ઓટેલ (Autel) કંપનીના મેક્સી (Maxi) મોડલના હાઈટેક ટેબલેટનો ઉપયોગ કરતા. આ ટેબલેટને કારના પોર્ટ સાથે જોડીને સોફ્ટવેર હેક કરવામાં આવતું હતું. તેઓ જૂની ચાવીનો ડેટા ડિલીટ કરી નાખતા અને પોતાની પાસે રહેલી નવી કોરી ચાવીને કાર સાથે પ્રોગ્રામ કરી દેતા હતા. આ આખી પ્રક્રિયામાં માત્ર 5 મિનિટનો સમય લાગતો હતો. જે ગાડી લાખોની કિંમતની હોય, તેને આ ગેંગ માત્ર 50 થી 60 હજાર રૂપિયામાં વેચી મારતી હતી.

મુદ્દામાલ અને વોન્ટેડ આરોપી

મહેસાણા પોલીસે આ ઓપરેશનમાં કુલ 15,43,000 રૂપિયાનો મુદ્દામાલ જપ્ત કર્યો છે, જેમાં 3 લક્ઝરી કાર (1 સ્વિફ્ટ ડીઝાયર અને 2 બલેનો), 4 મોબાઈલ ફોન, 10 અલગ-અલગ કારની ચાવીઓ, વાઈફાઈ રાઉટર (Wi-Fi Router), કાર હેક કરવા માટેનું સ્પેશિયલ ટેબલેટનો સમાવેશ થાય છે. પોલીસ તપાસમાં ખુલ્યું છે કે આ ગેંગ અત્યાર સુધીમાં દિલ્હી (Delhi) અને ગાઝિયાબાદ (Ghaziabad) માંથી 10થી વધુ કાર ચોરી કરી ચૂકી છે. આ ગેંગનો મુખ્ય સૂત્રધાર દિલ્હીનો સરફરાજ (Sarfaraz) છે, જે હાલ પોલીસ પકડથી દૂર છે અને તેને વોન્ટેડ જાહેર કરવામાં આવ્યો છે.

ટેકનોલોજીનો સદુપયોગ કે દુરુપયોગ?

આ કિસ્સો સાબિત કરે છે કે ટેકનોલોજી જેટલી આશીર્વાદરૂપ છે, તેટલી જ જોખમી પણ બની શકે છે જો તે ખોટા હાથોમાં જાય. મહેસાણા એલસીબી (Mehsana LCB) ની સતર્કતાને કારણે આ હાઈટેક ગેંગનો અંત આવ્યો છે. હાલમાં પોલીસ ફરાર આરોપી સરફરાજને પકડવા માટે ચક્રો ગતિમાન કર્યા છે અને આ ગેંગના તાર અન્ય કેટલા રાજ્યો સાથે જોડાયેલા છે તેની તપાસ ચાલી રહી છે.

આ પણ વાંચોઃ 'યુવાનો ગેંગસ્ટર બનવાના રવાડે ચઢી રહ્યા છે' પાટીદાર યુવાનોને Lalji Patel ની ટકોર

આ પણ વાંચોઃ Chhotaudepur: માનસિક અસ્વસ્થ યુવતી પર દુષ્કર્મ! ડુંગરાળ વિસ્તારમાંથી આવી હાલતમાં મળી!