Mehsana ના લાડોલ પાસે ટ્રકની ટક્કરે બે ખેડૂતના કરૂણ મોત, એક ગંભીર, ગામમાં શોકનો માહોલ

તમાકુના સેમ્પલ બતાવવા જઈ રહ્યા હતા ખેડૂતો

મળતી માહિતી મુજબ વડાલીના પહાડી પોલ ગામના ત્રણ શ્રમિક ખેડૂતો એક જ મોટરસાઇકલ પર સવાર થઈને તમાકુના સેમ્પલ (Tobacco samples) બતાવવા માટે જઈ રહ્યા હતા. ખેતીકામ સાથે જોડાયેલા આ આશાસ્પદ વ્યક્તિઓ જ્યારે શોભાસણ-ટેચાવા હાઇવે પરથી પસાર થઈ રહ્યા હતા, ત્યારે કાળ બનીને આવેલી ટ્રકે (Truck) તેમને અડફેટે લીધા હતા. આ ટક્કર એટલી ભયાનક હતી કે બાઇક સવાર બે વ્યક્તિઓએ જીવ ગુમાવ્યા હતા.

બે ખેડૂતના મોત, એક ગંભીર ઈજાગ્રસ્ત

આ અકસ્માતમાં મૃત્યુ પામનાર વ્યક્તિઓમાં અમૃતજી પુંજાજી વાઘેલા અને ભાલાભાઈ મણાભાઈ વાઘેલાનો સમાવેશ થાય છે. બંને પહાડી પોલ ગામના રહેવાસી હતા અને ખેતીકામ કરી પરિવારનું ગુજરાન ચલાવતા હતા. અકસ્માતમાં અન્ય એક યુવક રણજીતજી વાઘેલા ગંભીર રીતે ઇજાગ્રસ્ત (Injured) થયો હતો. તેને તાત્કાલિક પ્રાથમિક સારવાર આપ્યા બાદ વધુ ગંભીર હાલત જણાતા અમદાવાદ (Ahmedabad) સિવિલ હોસ્પિટલ ખાતે ખસેડવામાં આવ્યો છે.

ટ્રક ચાલક ફરાર

અકસ્માત સર્જનાર ટ્રકનો નંબર GJ-12-BY-1391 હોવાનું જાણવા મળ્યું છે. પૂરપાટ ઝડપે વાહન ચલાવી બે નિર્દોષ ખેડૂતોનો ભોગ લેનાર ટ્રક ચાલક અકસ્માત બાદ પોતાનું વાહન ઘટનાસ્થળે જ મૂકીને નાસી છૂટવામાં સફળ રહ્યો હતો. સ્થાનિક લોકોએ અકસ્માત જોતા જ બચાવ કામગીરી શરૂ કરી હતી અને પોલીસને જાણ કરી હતી.

ગામમાં શોકનો માહોલ

ઘટનાની જાણ થતા જ લાડોલ પોલીસ કાફલો ઘટનાસ્થળે પહોંચી ગયો હતો. પોલીસે મૃતદેહોને પોસ્ટમોર્ટમ (Post-mortem) માટે ખસેડી આગળની કાર્યવાહી હાથ ધરી હતી. અજયકુમાર વાઘેલાની ફરિયાદના આધારે લાડોલ પોલીસે ટ્રક ચાલક વિરુદ્ધ ગુનો નોંધી તેને પકડવા માટે તપાસના ચક્રો ગતિમાન કર્યા છે. એક જ ગામના બે ખેડૂતોના અકાળે અવસાનથી પહાડી પોલ પંથકમાં અને તેમના પરિવારમાં ભારે શોકની લાગણી  ફેલાઈ ગઈ છે.

આ પણ વાંચોઃ રસમલાઈ અને પોપટ છાપ ગોળ ખાનારા ચેતી જજો, Mehsana માં દેશીના નામે ભેળસેળનો ખેલ