Mehsana: સીણજ ગામના ખેડૂતે 8 હજાર કેસર કેરીના આંબા વાવ્યા, ઓર્ગેનિક ખેતીથી કરી રહ્યા છે લાખોની કમાણી

સાહસ વિના સિદ્ધિ નહીં: બંજર જમીન બની સોનાની ખાણ જેવી!

વર્ષ 2002માં જ્યારે અનિલભાઈએ 300 વીઘા બંજર જમીનમાં ખેતીના શ્રીગણેશ કર્યા ત્યારે આસપાસના લોકો તેમને ગાંડા ગણતા હતા. પરંતુ, હિંમત હાર્યા વિના તેમણે ખેત તલાવડી (Farm Pond) બનાવી જળ સંચય કર્યો અને જમીનમાં છાણીયું ખાતર ઉમેરી તેને ફળદ્રુપ બનાવી. આજે અહીં 8000 કેસર કેરીના આંબા (Kesar Mango Trees) સહિત વિવિધ ફળોના હજારો છોડ લહેરાઈ રહ્યા છે.

કેમિકલ મુક્ત ખેતી અને મબલક આવક

આ ફાર્મમાં સંપૂર્ણપણે ઓર્ગેનિક પદ્ધતિનો ઉપયોગ થાય છે. આંબા પર પાકેલી દવાની અસર વગરની મધમીઠી કેસર કેરીની માંગ અમદાવાદ, ગાંધીનગર અને મહેસાણા સુધી રહેલી છે. ફાર્મના મેનેજર આશિષભાઈ જણાવે છે કે, કેરીને સોર્ટિંગ (Sorting) અને ગ્રેડીંગ (Grading) કરી અલગ-અલગ પેકિંગમાં વેચવામાં આવે છે. કેસર કેરી ઉપરાંત જામફળ, લીંબુ, ચીકુ અને આમળાની ખેતી થકી આ સાહસિક ખેડૂતો વર્ષે 50 થી 60 લાખ રૂપિયા સુધીની મબલક આવક મેળવી રહ્યા છે.

આધુનિક પદ્ધતિનો સંગમ

વધતી જતી જળ સમસ્યાને ધ્યાનમાં રાખીને, આ તમામ છોડને ડ્રિપ ઈરીગેશન (Drip Irrigation) દ્વારા પાણી આપવામાં આવે છે. માત્ર કેસર કેરી જ નહીં, પરંતુ અહીં વિવિધ 16 પ્રકારના આંબાની જાતો ઉછેરવામાં આવી છે. આ પ્રોજેક્ટ સાબિત કરે છે કે જો દ્રઢ નિશ્ચય હોય, તો સૂકા વિસ્તારમાં પણ રોકડિયા પાક (Cash Crops) દ્વારા સમૃદ્ધિ લાવી શકાય છે. આજે આ ફાર્મ અનેક લોકો માટે પ્રેરણાનું કેન્દ્ર બન્યું છે.

આ પણ વાંચોઃ Kapadvanj Factory Blast: ફટાકડા ફેક્ટરી બ્લાસ્ટની 10 કિમી સુધી અસર, મકાનોને તિરાડો પડી, અસરગ્રસ્તો શું કહી રહ્યા છે?