Visnagar Ambulance Accident News : અકસ્માતમાં ઘાયલ યુવકને હોસ્પિટલ લઈ જતી એમ્બ્યુલન્સને નડ્યો અકસ્માત, દર્દીનું મોત

રોંગ સાઇડથી આવતી વેગનઆર કારે એમ્બ્યુલન્સને ઉડાવી, ચાલક ફરાર

"એક વેગનઆર કાર ચાલક હાઇવે પર પૂરપાટ ઝડપે રોંગ સાઇડમાં આવી રહ્યો હતો. તેણે એમ્બ્યુલન્સને બચાવવાની તક પણ ન આપી અને સીધી સામેથી ટક્કર મારી દીધી હતી. અકસ્માત બાદ કાર ચાલક ગાડી મૂકીને નાસી છૂટ્યો છે." - સ્થાનિક પ્રત્યક્ષદર્શી

15 દિવસ અગાઉ જ થયો હતો અકસ્માત

આ ભયાનક અકસ્માત એટલો જોરદાર હતો કે એમ્બ્યુલન્સમાં સવાર દર્દી વિજય ઠાકોરનું ગંભીર ઇજાઓ થવાના કારણે સ્થળ પર જ મોત નીપજ્યું હતું. 15 દિવસના ટૂંકા ગાળામાં જ એક જ યુવક સાથે બીજી વખત અકસ્માત થવો અને તેમાં તેનો જીવ જવો, તે બાબત ખરેખર હૃદય કંપાવી દેનારી છે.

મૃતકના પિતા અને ભાઈ સહિત એમ્બ્યુલન્સ ચાલક લોહીલુહાણ

આ ગમખ્વાર અકસ્માતમાં માત્ર દર્દીનું જ મોત નથી થયું, પરંતુ એમ્બ્યુલન્સમાં તેમની સાથે સવાર મૃતક વિજય ઠાકોરના પિતા અને તેમનો ભાઈ પણ ગંભીર રીતે ઘાયલ થયા છે. આ ઉપરાંત એમ્બ્યુલન્સના ચાલકને પણ આ અકસ્માતમાં નાની-મોટી ઇજાઓ પહોંચી છે.

સમગ્ર મામલે પોલીસે તપાસ શરૂ કરી

ઘટનાની જાણ થતાં જ વિસનગર પોલીસનો કાફલો તાત્કાલિક પાલડી ચોકડી પર દોડી આવ્યો હતો. પોલીસે તમામ ઇજાગ્રસ્તોને સારવાર માટે નજીકની હોસ્પિટલમાં ખસેડ્યા છે અને અકસ્માત સર્જીને ફરાર થઈ ગયેલા કાર ચાલક વિરુદ્ધ ગુનો નોંધી તેને ઝડપી પાડવા ચક્રો ગતિમાન કર્યા છે.

આ પણ વાંચો : વિસનગરમાં કાળજું કંપાવતી ઘટના: કારમાં યુવતી અને તેની સગીર બહેન પર ત્રણ વર્ષ સુધી દુષ્કર્મ