મહેશ પટેલની ફેક્ટરીમાં સર્ચ ઓપરેશન

મળતી માહિતી મુજબ, ફૂડ વિભાગની ટીમે ચોક્કસ બાતમીના આધારે સિહી (Sihi) ગામમાં આવેલી મહેશ ત્રિભોવનભાઈ પટેલ (Mahesh Tribhovanbhai Patel) ની માલિકીની ફેક્ટરીમાં રેડ પાડી હતી. તપાસ દરમિયાન અધિકારીઓને ફેક્ટરી પરિસરમાંથી શંકાસ્પદ હાલતમાં જીરાનો વિશાળ જથ્થો મળી આવ્યો હતો. પ્રાથમિક તપાસમાં જીરાના દેખાવ અને ગુણવત્તામાં ગરબડ જણાતા તંત્રએ ઊંડાણપૂર્વક તપાસ શરૂ કરી હતી.

લાખોની કિંમતનો મુદ્દામાલ જપ્ત

આ દરોડા દરમિયાન ફૂડ વિભાગને અંદાજે 24,248 કિલોગ્રામ (kg) જીરું લુઝ હાલતમાં મળી આવ્યું હતું, જેની અંદાજિત બજાર કિંમત 43,64,640/- રૂપિયા થાય છે, જ્યારે અંદાજે 2,628 કિલોગ્રામ (kg) તૈયાર પેકિંગમાં જીરું મળી આવ્યું હતું, જેની કિંમત 4,85,640/- રૂપિયા આંકવામાં આવી છે. આશ્ચર્યજનક રીતે સ્થળ પરથી 498 કિલોગ્રામ (kg) સફેદ પાવડર (White Powder) મળી આવ્યો હતો.

સફેદ પાવડરની ભેળસેળનું કૌભાંડ

પ્રાથમિક તપાસમાં એવી વિગતો બહાર આવી છે કે, જીરાનો વજન વધારવા અને તેને ચમકદાર બનાવવા માટે આ સફેદ પાવડર (White Powder) મિક્સ કરવામાં આવતો હતો. હલકી ગુણવત્તાના જીરાને પ્રીમિયમ દેખાડવા માટે કેમિકલયુક્ત પાવડરનો ઉપયોગ કરીને લોકોના સ્વાસ્થ્ય સાથે ગંભીર ચેડાં કરવામાં આવતા હોવાની આશંકા સેવાઈ રહી છે. નજીવા નફાની લાલચમાં વહેપારીઓ લોકોના જીવ જોખમમાં મૂકી રહ્યા છે.

સેમ્પલ પૃથક્કરણ માટે લેબોરેટરીમાં મોકલાયા

ફૂડ વિભાગના અધિકારીઓએ તાત્કાલિક અસરથી જીરા અને સફેદ પાવડરના નમૂના (Samples) લીધા છે. આ નમૂનાઓને લેબોરેટરીમાં પૃથક્કરણ (Analysis) માટે મોકલી આપવામાં આવ્યા છે. રિપોર્ટ આવ્યા બાદ આ ભેળસેળમાં કયા પદાર્થોનો ઉપયોગ થયો છે તેની ચોક્કસ માહિતી મળશે. હાલમાં ફેક્ટરીના માલિક સામે કાયદેસરની કાર્યવાહી કરવાની પ્રક્રિયા ગતિમાન છે. આ ઘટનાને પગલે સમગ્ર પંથકમાં ભેળસેળિયા વહેપારીઓમાં ફફડાટ વ્યાપી ગયો છે.

આ પણ વાંચો: સાવધાન: તમે જે Paneer ખાઓ છો તે અસલી છે કે નકલી? આ રીતે કરો ઘરે બેઠા કરો ચેક