Morbi: મનપા કચેરીમાં મહિલાઓએ ઠાલવ્યો આક્રોશ, રોડ ક્યારે બનશે?

લાંબા ગાળાની ઉપેક્ષા અને તૂટેલા રસ્તા

સ્થાનિક રહીશોના જણાવ્યા અનુસાર, તેમના વિસ્તારમાં છેલ્લા 10 વર્ષથી રોડની હાલત અત્યંત બિસ્માર છે. આટલા લાંબા ગાળા દરમિયાન અનેક રજૂઆતો કરવા છતાં તંત્ર દ્વારા માત્ર રોડ બનાવવાની ખાતરીઓ આપવામાં આવી છે. મહિલાઓએ રોષ વ્યક્ત કરતા જણાવ્યું  કે, "અમે 10 વર્ષથી માત્ર આશ્વાસનો સાંભળી રહ્યા છીએ, પરંતુ રસ્તાઓ પર પડેલા ઊંડા ખાડાઓ તેમ જ છે."

સામાન્ય વરસાદમાં કાદવ-કીચડનું સામ્રાજ્ય

આ સમસ્યા માત્ર ખાડા પૂરતી મર્યાદિત નથી. સામાન્ય વરસાદ પડતા જ પટેલનગર અને ખોડિયાર પાર્ક વિસ્તારના માર્ગો પર પાણી ભરાઈ જાય છે, જેના કારણે રસ્તાઓ પર કાદવ અને કીચડનું સામ્રાજ્ય સર્જાય છે. આ પરિસ્થિતિને કારણે વાહનચાલકો માટે અહીંથી પસાર થવું જીવનું જોખમ બની ગયું છે. વળી, વૃદ્ધો અને સ્કૂલે જતા નાના બાળકો માટે આ રસ્તાઓ અત્યંત જોખમી સાબિત થઈ રહ્યા છે. અનેકવાર વાહનો ફસાઈ જવા કે અકસ્માત થવાની ઘટનાઓ સામાન્ય બની ગઈ છે.

વારંવાર  રજૂઆતો કરવા છતાં કામો અટવાયેલા

મહિલાઓએ આક્ષેપ કર્યો છે કે મનપા કચેરીમાં બેઠેલા જવાબદાર અધિકારીઓ સ્થિતિની ગંભીરતા સમજવા તૈયાર નથી. વારંવાર રજૂઆતો કરવા છતાં રસ્તાના કામો કેમ અટવાયેલા છે, તેનો કોઈ સંતોષકારક જવાબ આપવામાં આવતો નથી.

હવે શું? તંત્ર સામે લોકોની મીટ

સ્થાનિકોના ઉગ્ર વિરોધ બાદ મનપા તંત્ર હરકતમાં આવ્યું છે અને કામગીરી શરૂ કરવાની ફરી એકવાર ખાતરી આપી છે.  હવે જોવાનું એ રહેશે કે આ ગંભીર સમસ્યાનો ઉકેલ તંત્ર કયા સમયમર્યાદામાં લાવે છે. સમગ્ર વિસ્તારની જનતા હવે એક ટકાઉ અને મજબૂત રસ્તાની રાહ જોઈ રહી છે.

આ પણ વાંચોઃ Morbi Massive Fire: મગફળીના ગોડાઉનમાં આગ મામલે નાફેડ ચેરમેન જેઠાભાઈ ભરવાડની પ્રતિક્રિયા