Patan News: વિધવા સહાયના દાખલા માટે માંગી રૂ. 800 ની લાંચ, ચાણસ્મામાં ACBના છટકામાં આઉટસોર્સ કર્મચારી

શું છે સમગ્ર મામલો?

મળતી માહિતી મુજબ, ચાણસ્મા મામલતદાર કચેરીમાં આઉટસોર્સ કર્મચારી તરીકે ફરજ બજાવતા પ્રકાશકુમાર ભરતસિંહ પરમાર સામે લાંચ માંગવાની ફરિયાદો ઉઠી હતી. આરોપી વિધવા સહાયના દાખલા કાઢી આપવા બદલ અરજદારો પાસે નિયમિતપણે લાંચની માંગણી કરતો હોવાની ચોક્કસ બાતમી એસીબીને મળી હતી.

આ ફરિયાદોને ગંભીરતાથી લઈને એસીબીની ટીમે એક ડીકોય (છટકું) ગોઠવ્યું હતું. આયોજન મુજબ, જ્યારે અરજદારે વિધવા સહાયના દાખલા માટેનો રૂ. 800 નો લાંચનો મુદ્દામાલ આરોપીને આપ્યો, ત્યારે એસીબીએ તુરંત જ દરોડો પાડીને પ્રકાશકુમાર પરમારને લાંચ લેતા રંગેહાથ ઝડપી લીધો હતો.

કચેરીમાં ફફડાટ

ચાણસ્મા મામલતદાર કચેરીના કંપાઉન્ડમાં જ એસીબીની આ કાર્યવાહી થતા અન્ય કર્મચારીઓમાં પણ ફફડાટ વ્યાપી ગયો હતો. સરકારી કચેરીઓમાં વિનામૂલ્યે મળતી સેવાઓ માટે લાંચ માંગનારાઓ સામે એસીબીની આ કાર્યવાહીથી ભ્રષ્ટાચારીઓમાં ફફડાટ જોવા મળી રહ્યો છે. હાલ એસીબી દ્વારા આરોપીની અટકાયત કરી આગળની કાયદેસરની કાર્યવાહી હાથ ધરવામાં આવી છે.

આ પણ વાંચો: Bhavnagar News: ભાવનગરના રાજપરામાં અંતિમવિધિના મુદ્દે વિવાદ, વાલ્મિકી સમાજની દફનવિધિ અટકાવતા સર્જાયો તણાવ