Narmada Rain : હવામાન વિભાગની આગાહી વચ્ચે દક્ષિણ ગુજરાતના અનેક વિસ્તારોમાં વરસાદ વરસ્યો છે. નર્મદા જિલ્લાના 6 તાલુકામાં ધોધમાર વરસાદ ખાબકતા ચારેકોર પાણી જ પાણી થઈ ગયા હતા. મોડી રાત્રે અચાનક વાતાવરણમાં પલટો આવી અનરાધાર વરસાદ વરસતા લોકોનું જનજીવન પણ વેરવિખેર થઈ ગયું હતુ. અચાનક ધોધમાર વરસાદ ખાબકતા સ્થાનિકોની મુશ્કેલીમાં વધારો થયો હતો.
Narmada Rain : સેલંબા પાસે એક મહિના જૂનું નાળું ધોવાયું
ઉલ્લેખનીય છે કે ભારે વરસાદ વરસતા નદી-નાળા છલકાયા હતા. એટલું જ નહીં સમગ્ર વિસ્તારમાં પુરની સ્થિતિ જોવા મળી હતી. જો કે પહેલા જ વરસાદે તંત્રની પોલ ખોલી હતી. સેલંબા પાસે એક મહિના પહેલા જ બનાવવામાં આવેલું નાળુ ધોવાયું છે. હજી ચોમાસાની શરુઆતમાં જ આ પ્રકારના દ્રશ્યો સામે આવતા ચિંતાનો વિષય બની ગયો છે.
ભારે વરસાદથી સેલંબાથી મહારાષ્ટ્ર તરફ જતો મુખ્ય રસ્તો બંધ
નર્મદા જિલ્લા માત્ર 6 તાલુકામાં વીજળીના કડાકાભડાકા સાથે વરસાદ વરસ્યો હતો. જેના કારણે સેલંબથી નવાપાડા મહારાષ્ટ્ર તરફ જતો રસ્તો બંધ થયો છે. તો બીજી તરફ નર્મદા જિલ્લાના 5 તાલુકામાં વરસાદનો છાંટો પણ પડ્યો નથી. સમગ્ર જિલ્લામાં વાદળછાયું વાતાવરણ રહેવાથી ગરમીમાંથી રાહત તો મળી છે. પરંતુ કેટલાક વિસ્તારમા ઉકળાટનો માહોલ પણ સર્જાયો હતો.
દક્ષિણ ગુજરાત અને સૌરાષ્ટ્રના વિસ્તારોમાં વરસાદની આગાહી
હવામાન વિભાગની આગાહી પ્રમાણે આજે અમરેલી, ભાવનગર, સુરત, નવસારી, ડાંગ, વલસાડ, દમણ, દાદરા અને નગર હવેલીમાં ભારે વરસાદની આગાહી સાથે યલો એલર્ટ આપવામાં આવ્યુ છે. બીજી તરફ મધ્ય અને ઉત્તર ગુજરાતમાં છૂટાછવાયા વરસાદી ઝાપટાં પડવાની શક્યતા છે. કેટલાક વિસ્તારોમાં ગાજવીજ અને 40 થી 50 કિલોમીટર પ્રતિ કલાકની ઝડપે તેજ પવન સાથે વરસાદ થઈ શકે છે. હાલ રાજ્યમાં તાપમાન 38થી 40 ડિગ્રી સેલ્સિયસની આસપાસ રહેવાની શક્યતા છે.
આ પણ વાંચો : Dahod News : એક જ પરિવારના બે દીકરા તળાવમાં ડૂબી જવાથી મોત, પરિવારમાં શોકનો માહોલ
