• પંજાબમાં AAPની મુશ્કેલી વધશે! કોંગ્રેસને આશા
• 32 ધારાસભ્યો કોંગ્રેસના સંપર્કમાં?
• દિલ્હીની હાર બાદ પંજાબમાં AAP પર સંકટ
• ભગવંત માનની જગ્યાએ નવો CM?
• AAPના વચનો પૂરા નહીં, ધારાસભ્યો નારાજ
• કેજરીવાલ પંજાબના મુખ્યમંત્રી બનશે?
• પંજાબમાં AAPમાં ભાગલાના સંકેત
• કોંગ્રેસને પંજાબમાં નવી તક

AAP trouble in Punjab : દિલ્હીમાં સરકાર ગુમાવ્યા બાદ આમ આદમી પાર્ટી (AAP) હવે પંજાબમાં પણ મુશ્કેલીઓનો સામનો કરી રહી છે. રાજ્યની મુખ્ય વિપક્ષી પાર્ટી કોંગ્રેસ આ સ્થિતિને પોતાના માટે એક સોનેરી તક તરીકે જોઈ રહી છે. આ દરમિયાન, કોંગ્રેસના નેતા અને વિધાનસભામાં વિપક્ષના નેતા પ્રતાપ સિંહ બાજવાએ એક મોટો દાવો કર્યો છે. તેમણે જણાવ્યું કે, AAP ના 32 ધારાસભ્યો તેમના સંપર્કમાં છે અને આ ધારાસભ્યો કોંગ્રેસમાં જોડાવવા ઈચ્છુક છે. આ નિવેદન વિધાનસભા સત્રની શરૂઆત પહેલા આવ્યું છે, જેનાથી રાજકીય હલચલ વધી ગઈ છે.

AAP સરકાર પર બાજવાનો હુમલો

પ્રતાપ સિંહ બાજવાએ આમ આદમી પાર્ટી (AAP) ની ભગવંત માન સરકાર પર આકરા પ્રહારો કર્યા છે. તેમણે કહ્યું કે, આ સરકારે પંજાબમાં કોઈ નોંધપાત્ર કામ કર્યું નથી, જેના કારણે તેના પોતાના ધારાસભ્યોમાં પણ નારાજગી જોવા મળી રહી છે. તેમણે ઉમેર્યું કે, ચૂંટણી દરમિયાન આપેલા વચનો, જેમ કે મહિલાઓને દર મહિને 1000 રૂપિયા આપવાના, તે પણ પૂરા થયા નથી. આવા વચનોની અવગણનાને કારણે ધારાસભ્યો પક્ષ બદલવા માટે મજબૂર થયા હોવાનું સામે આવ્યું છે. બાજવાએ એવો પણ આરોપ લગાવ્યો કે સરકાર વિધાનસભા સત્રને લંબાવવા માંગતી નથી, જે તેની નિષ્ફળતાને છુપાવવાનો પ્રયાસ હોઈ શકે છે.

AAP માં નેતૃત્વ પરિવર્તનની અટકળો

બાજવાએ વધુ એક ચોંકાવનારો દાવો કર્યો કે, AAP ડરના માર્યા મુખ્યમંત્રી બદલવાની તૈયારી કરી રહી છે. તેમણે કહ્યું કે, ભગવંત માનની જગ્યાએ કોઈ બીજાને જવાબદારી સોંપવામાં આવી શકે છે. આ દાવો એવા સમયે આવ્યો છે જ્યારે દિલ્હીમાં હાર બાદ AAP ના સંયોજક અરવિંદ કેજરીવાલે એક મહત્વની બેઠક બોલાવી હતી. આ બેઠકમાં પંજાબના તમામ ધારાસભ્યોને હાજર રહેવા આદેશ આપવામાં આવ્યો હતો. AAP એ આ બેઠકને નિયમિત ગણાવી હોવા છતાં, રાજકીય વર્તુળોમાં ચર્ચા છે કે પાર્ટીમાં આંતરિક ભાગલા અને અસંતોષને કારણે આ પગલું ભરવામાં આવ્યું હતું.

દિલ્હીની હાર અને તેની અસર

દિલ્હી વિધાનસભા ચૂંટણીમાં AAPને મોટો ફટકો પડ્યો છે. લગભગ 12 વર્ષના તેમના શાસનનો અંત આવ્યો અને ભાજપે 48 બેઠકો જીતીને શાનદાર પ્રદર્શન કર્યું, જ્યારે AAP માત્ર 22 બેઠકો સુધી સીમિત રહી. કોંગ્રેસને દિલ્હીમાં એક પણ બેઠક ન મળી, પરંતુ AAP ની આ હારથી પંજાબમાં તેમને નવી આશા જાગી છે. પંજાબમાં મુખ્ય વિપક્ષ તરીકે રહેલી કોંગ્રેસ માને છે કે દિલ્હીની હારનો પડઘો પંજાબમાં પણ પડશે, જેનાથી તેમને પોતાની સ્થિતિ મજબૂત કરવાની તક મળશે.

કેજરીવાલની મુખ્યમંત્રીપદની અટકળો

તાજેતરમાં ભાજપ અને કોંગ્રેસ બંનેએ દાવો કર્યો હતો કે અરવિંદ કેજરીવાલ પંજાબમાં મુખ્યમંત્રી બનવા ઈચ્છે છે. તેઓ પેટાચૂંટણી લડીને આ પદ સંભાળી શકે છે એવી અટકળો ચાલી રહી છે. જોકે, ભગવંત માન સહિત AAPના નેતાઓએ આવા દાવાઓને સખત રીતે નકારી કાઢ્યા છે અને તેને રાજકીય અફવા ગણાવી છે.

આ પણ વાંચો :  દિલ્હી MCDના 12000 હંગામી કર્મચારીઓ થશે કાયમી, આતિશીએ મેયર સાથે કરી જાહેરાત