સંશોધન, ટેક્નોલોજી, ઈનોવેશન, સ્ટાર્ટઅપ અને યુવા સશક્તિકરણ પર ચર્ચા
અરુણાચલ પ્રદેશના મુખ્યમંત્રી પેમા ખાંડુની (Pema Khandu) ઉપસ્થિતિમાં યોજાયેલી આ બેઠકમાં ઉચ્ચ શિક્ષણને વધુ ગુણવત્તાયુક્ત અને ભવિષ્યલક્ષી બનાવવા સાથે સંશોધન, ટેક્નોલોજી, ઈનોવેશન, સ્ટાર્ટઅપ અને યુવા સશક્તિકરણ જેવા મહત્વના મુદ્દાઓ પર સઘન ચર્ચા કરવામાં આવી હતી. મુખ્યમંત્રી પેમા ખાંડુએ ઉચ્ચ શિક્ષણ સંસ્થાઓની ભૂમિકા માત્ર ડિગ્રી આપવા પૂરતી સીમિત ન રહેવી જોઈએ, પરંતુ જવાબદાર, સક્ષમ અને સામાજિક રીતે જાગૃત યુવાનો તૈયાર કરવામાં યુનિવર્સિટીઓએ મહત્વની ભૂમિકા ભજવવી જોઈએ તેવો મત વ્યક્ત કર્યો હતો.
યુવાનો માટે રોજગાર-શિક્ષણ-ઉદ્યોગ જોડાણ મજબૂત બનાવવા પર ભાર : ડો. અમરેન્દ્ર પાની
ડો. અમરેન્દ્ર પાની (Dr.Amarendra Pani), જોઈન્ટ ડાયરેક્ટર અને હેડ, AIU એ જણાવ્યું હતું કે, રાઉન્ડ ટેબલમાં ગુજરાત સહિત દેશના અન્ય રાજ્યોની યુનિવર્સિટીઓ સાથે અરુણાચલ પ્રદેશની શૈક્ષણિક સંસ્થાઓ વચ્ચે સંશોધન, નવીનતા અને વિદ્યાર્થી વિનિમયને પ્રોત્સાહન આપવા અંગે પણ ચર્ચા થઈ હતી. અરુણાચલ પ્રદેશના (Arunachal Pradesh) યુવાનો માટે રોજગાર અને સ્ટાર્ટઅપની નવી તકો ઊભી કરવા તેમ જ શિક્ષણ અને ઉદ્યોગ વચ્ચેનું જોડાણ મજબૂત બનાવવા માટે સહયોગ વધારવાની જરૂરિયાત પર ભાર મૂકાયો હતો.
![]()
નોર્થ-ઈસ્ટ વિસ્તારની વ્યૂહાત્મક અને ભૌગોલિક મહત્વને ધ્યાનમાં રાખીને સરહદી વિસ્તારોમાં સંશોધનને વધુ વેગ આપવાનો મુદ્દો પણ બેઠકમાં મહત્વનો રહ્યો હતો. સ્થાનિક જરૂરિયાતો સાથે જોડાયેલા સંશોધન, કનેક્ટિવિટી, ટકાઉ વિકાસ, ટેક્નોલોજી અને સરહદી વિસ્તારોના સામાજિક-આર્થિક વિકાસ જેવા મુદ્દાઓ પર નિષ્ણાતોએ પોતાના વિચારો રજૂ કર્યા હતા. રાષ્ટ્રીય રક્ષા યુનિવર્સિટી દ્વારા સરહદી વિસ્તારોમાં સુરક્ષા, પોલીસિંગ અને સૈનિક તાલીમ સાથે જોડાયેલી શૈક્ષણિક પહેલોને પણ વધુ મજબૂત બનાવવાની દિશામાં પ્રયાસો અંગે ચર્ચા કરવામાં આવી હતી.
અરુણાચલ પ્રદેશની સંસ્કૃતિ-પરંપરાની ઝાંખી કરાવતો સાંસ્કૃતિક કાર્યક્રમ યોજાયો
બે દિવસ દરમિયાન આર્ટિફિશિયલ ઈન્ટેલિજન્સ અને ડિજિટલ ટ્રાન્સફોર્મેશન, AI-રેડી યુનિવર્સિટીઓ, ગ્લોબલાઈઝેશન અને ઈન્ટરનેશનલાઈઝેશન, AIના યુગમાં યુનિવર્સિટી ગવર્નન્સ, ઈન્ડિયન નોલેજ સિસ્ટમ, ઉચ્ચ શિક્ષણનું નિયમનકારી માળખું તેમજ ઈનોવેશન અને સ્ટાર્ટઅપ ઈકોસિસ્ટમ સહિતના વિવિધ વિષયો પર સઘન ચર્ચા થઈ હતી. આ સાથે અરુણાચલ પ્રદેશની સમૃદ્ધ સંસ્કૃતિ અને પરંપરાની ઝાંખી કરાવતો સાંસ્કૃતિક કાર્યક્રમ પણ યોજાયો હતો.
સંયુક્ત સંશોધન, શૈક્ષણિક ભાગીદારી માટે નવું નેટવર્ક ઊભું થવા અપેક્ષા : ડો. અવિનાશ ખરેલ
રાષ્ટ્રીય રક્ષા યુનિવર્સિટીના કેમ્પસિસ ડીન ડો. અવિનાશ ખરેલ (Dr. Avinash Kharel) એ જણાવ્યું હતું કે, આ રાઉન્ડ ટેબલ મીટ દ્વારા નોર્થ-ઈસ્ટની યુનિવર્સિટીઓ વચ્ચે સંયુક્ત સંશોધન, શૈક્ષણિક ભાગીદારી અને જ્ઞાનની આપ-લે માટે નવું નેટવર્ક ઊભું થવાની અપેક્ષા છે. શિક્ષણને નોર્થ-ઈસ્ટના વિકાસ, સરહદી વિસ્તારોના સંશોધન, યુવાનો માટેની રોજગાર અને સ્ટાર્ટઅપ તકો તથા વિકસિત ભારતના વિઝન સાથે જોડવાના આ પ્રયાસને ઉચ્ચ શિક્ષણ ક્ષેત્રે મહત્વપૂર્ણ પહેલ તરીકે જોવામાં આવી રહ્યો છે. હવે રાઉન્ડ ટેબલ દરમિયાન થયેલી ચર્ચા અને વિચારોને સંયુક્ત સંશોધન તથા નક્કર શૈક્ષણિક પહેલોમાં કેવી રીતે પરિવર્તિત કરવામાં આવે છે, તેના પર સૌની નજર રહેશે.
![]()
નોર્થ ઈસ્ટમાં વાઈસ ચાન્સેલરની રાઉન્ડ ટેબલ મીટનું પ્રથમ વખત આયોજન : ડો. સંજીવ સિંઘે
રાષ્ટ્રીય રક્ષા યુનિવર્સિટીના અરૂણાચલ પ્રદેશ કેમ્પસના ડાયરેક્ટર ડો. સંજીવ સિંઘે (Dr. Sanjeev Singh) જણાવ્યું હતું કે, નોર્થ ઈસ્ટમાં વાઈસ ચાન્સેલરની રાઉન્ડ ટેબલ મીટનું પ્રથમ વખત આયોજન કરવામાં આવ્યું છે, જેમાં વિવિધ પાસાઓ પર ચર્ચા કરવામાં આવી હતી અને સમગ્ર મીટમાં જે પ્રકારના મંતવ્યો અને અનુભવો આવ્યા છે તેના આધારે નોર્થ ઈસ્ટના રાજ્યોમાં ઉચ્ચ શિક્ષણની દિશામાં કઈ રીતે આગળ વધી શકાય તે માટેના પ્રયાસો કરાશે.
![]()
આ પણ વાંચો - Gandhinagar News: શિષ્યવૃત્તિ વિતરણ સમારોહ, CM ભૂપેન્દ્રભાઈ પટેલના હસ્તે 541 કરોડથી વધુની સહાયનું સીધું વિતરણ
