Bhagalpur Railway Accident : બિહારના ભાગલપુરમાં સર્જાયેલી એક અત્યંત હૃદયદ્રાવક દુર્ઘટનાએ સૌની આંખો ભીની કરી દીધી છે. અકબરનગર રેલ્વે સ્ટેશન પર ચાર વર્ષની બીમાર પુત્રીની સારવાર કરવા જઈ રહેલા માતા-પિતા અને માસૂમ બાળકી ટ્રેનની અડફેટે આવી ગયા હતા. માલગાડીના ભારે અવાજ વચ્ચે ડાઉન ટ્રેક ક્રોસ કરતી વખતે સર્જાયેલા આ ભયાનક અકસ્માતમાં એક જ પરિવારના ત્રણ સભ્યોના કરૂણ મોત નીપજતા સમગ્ર વિસ્તારમાં શોકનું મોજું ફરી વળ્યું છે.
Bhagalpur Railway Accident : બિહારના ભાગલપુર જિલ્લામાં આવેલા અકબરનગર રેલ્વે સ્ટેશન પર એક અત્યંત હૃદયદ્રાવક અકસ્માત સર્જાયો છે, જેમાં એક જ પરિવારના ત્રણ સભ્યોના કરૂણ મોત નીપજ્યા છે. બાંકા જિલ્લાના ભીટ્ટી ગામના રહેવાસી સુબોધ મંડલ, તેમની પત્ની પૂનમ દેવી અને તેમની ચાર વર્ષની બીમાર પુત્રી રાધિકા સારવાર માટે ભાગલપુર જઈ રહ્યા હતા.
ટ્રેનની અડફેટે 3 લોકોના મોત
મળતી માહિતી અનુસાર પ્લેટફોર્મ નંબર 1 તરફ જવાના રસ્તે ઉપરની લાઇન પરથી પસાર થઈ રહેલી માલગાડીના ભારે અવાજ વચ્ચે પરિવાર ડાઉન ટ્રેક ક્રોસ કરી રહ્યો હતો. તે જ ક્ષણે અચાનક ડાઉન લાઇન પર બર્દવાન પેસેન્જર ટ્રેન આવી જવાથી આખો પરિવાર તેની અડફેટે આવી ગયો હતો. આ ભયાનક અકસ્માતમાં દંપતીનું ઘટનાસ્થળે જ કમકમાટીભર્યું મૃત્યુ થયું હતું, જ્યારે ગંભીર રીતે ઘવાયેલી માસૂમ પુત્રી રાધિકાનું માયાગંજ હોસ્પિટલમાં સારવાર દરમિયાન મોત નીપજ્યું હતું.
2 કલાક અને 22 મિનિટ સુધી રેલ વ્યવહાર ખોરવાયો
ઉલ્લેખનીય છે કે એક જ પરિવારના ત્રણ સભ્યોના અચાનક અવસાનથી સમગ્ર ભીટ્ટી ગામમાં ભારે શોકનું મોજું ફરી વળ્યું છે. આ દુર્ઘટનાને કારણે રેલ વ્યવહાર પણ લગભગ 2 કલાક અને 22 મિનિટ સુધી સંપૂર્ણપણે ઠપ રહ્યો હતો, જેના કારણે ગરીબ રથ એક્સપ્રેસ અને ઇન્ટરસિટી એક્સપ્રેસ સહિતની અનેક ટ્રેનો અટવાઈ હતી અને મુસાફરોને હાલાકી વેઠવી પડી હતી. હાલ રેલવે અને સુરક્ષા એજન્સીઓ દ્વારા આ સમગ્ર મામલાની ઊંડાણપૂર્વક તપાસ હાથ ધરવામાં આવી છે, જેણે ફરી એકવાર રેલવે ટ્રેક ક્રોસ કરતી વખતે લેવાતી સાવચેતી પર ગંભીર સવાલો ખડા કર્યા છે.
આ પણ વાંચો : મધ્યપ્રદેશમાં વહીવટી તંત્ર સ્તબ્ધ: 45 વર્ષીય IAS અધિકારી અનિલ ડામોરનું હાર્ટ એટેકથી આકસ્મિક નિધન
