ભાજપના વરિષ્ઠ ધારાસભ્ય અને પૂર્વ મંત્રી અનિલ શર્માનું નિધન: દિલ્હીની હોસ્પિટલમાં કેન્સર સામે લડતાં લીધા અંતિમ શ્વાસ

યોગી સરકારમાં વન અને પર્યાવરણ રાજ્યમંત્રી રહ્યા હતા

અનિલ શર્મા ઉત્તર પ્રદેશના એક વરિષ્ઠ અને જમીની સ્તરના નેતા તરીકેની આગવી ઓળખ ધરાવતા હતા. મુખ્યમંત્રી યોગી આદિત્યનાથ (CM Yogi Adityanath)ના પ્રથમ કાર્યકાળ દરમિયાન તેમને મંત્રીમંડળમાં સ્થાન આપવામાં આવ્યું હતું. તેમણે વન, પર્યાવરણ અને પ્રાણી ઉદ્યાન રાજ્યમંત્રી તરીકેનો મહત્વનો કાર્યભાર અત્યંત નિષ્ઠાપૂર્વક સંભાળ્યો હતો. તેમના નિધન પર મુખ્યમંત્રી યોગી આદિત્યનાથે ઊંડો શોક વ્યક્ત કર્યો છે અને દિવંગત નેતાના પુત્ર કુશ શર્મા સાથે ટેલિફોનિક વાતચીત કરીને પરિવારને સાંત્વના પાઠવી છે.

ગ્રામ પ્રધાનથી શરૂ કરી 4 વખત ધારાસભ્ય બન્યા

અનિલ શર્માનો જન્મ શિકારપુરના સુરજાવલી ગામમાં થયો હતો. તેમણે પોતાના જાહેર જીવનની શરૂઆત વર્ષ 1989માં સુરજાવલી ગામના નિર્વિરોધ ગ્રામ પ્રધાન તરીકે કરી હતી અને તેઓ સતત બે વખત સરપંચ રહ્યા હતા. ત્યારબાદ રાજ્યના સક્રિય રાજકારણમાં પ્રવેશ કરીને તેઓ કુલ 4 વખત વિધાનસભાના સભ્ય તરીકે ચૂંટાયા હતા.

વર્ષ 2002 અને 2007માં તેઓ ખુર્જા વિધાનસભા બેઠક પરથી ધારાસભ્ય બન્યા હતા. ત્યારબાદ તેઓ ભાજપમાં જોડાયા અને વર્ષ 2017 તેમજ વર્ષ 2022ની સામાન્ય ચૂંટણીમાં શિકારપુર બેઠક પરથી ભવ્ય વિજય મેળવી ભાજપના ધારાસભ્ય તરીકે સેવા આપી રહ્યા હતા.

જિલ્લામાં શોકનો માહોલ, પૈતૃક ગામમાં થશે અંતિમ સંસ્કાર

પોતાના સરળ સ્વભાવ અને પ્રજાકીય કાર્યોના લીધે સ્થાનિક જનતામાં અત્યંત લોકપ્રિય રહેલા અનિલ શર્માના પાર્થિવ દેહને દિલ્હીથી તેમના પૈતૃક ગામ સુરજાવલી ખાતે લાવવામાં આવી રહ્યો છે. જ્યાં તેમના અંતિમ દર્શન માટે રાજકીય આગેવાનો, કાર્યકરો અને મોટી સંખ્યામાં સ્થાનિક નાગરિકો ઉમટી રહ્યા છે. ગુરુવારે તેમના પૈતૃક ગામમાં રાજકીય સન્માન સાથે તેમના અંતિમ સંસ્કાર કરવામાં આવશે.