Zomato-Swiggy સહિતના ડિલિવરી બોય્સ માટે સરકારી યોજના જાહેર, જાણો શું મળશે લાભ?
- ગિગ વર્કર્સ માટે સામાજિક સુરક્ષાના નવા નિયમો જાહેર (Rule For Gig Workers)
- કેન્દ્ર સરકાર ઝોમેટો-સ્વિગી વર્કર્સને આપશે પેન્શન અને વીમો
- લાભ મેળવવા વર્ષમાં 90 થી 120 દિવસનું કામ અનિવાર્ય
- એક દિવસમાં મલ્ટિપલ એપ પર કામ કરનારાઓને ખાસ ફાયદો
- ઈ-શ્રમ પોર્ટલ પર નોંધણી બાદ મળશે ડિજિટલ ઓળખ પત્ર
Rule For Gig Workers : ભારત સરકારે ઝોમેટો, સ્વિગી અને ઓલા જેવી પ્લેટફોર્મ કંપનીઓ સાથે જોડાયેલા લાખો ગિગ વર્કર્સ (Gig Workers) માટે સામાજિક સુરક્ષા સુનિશ્ચિત કરવાના હેતુથી નવા નિયમોનો મુસદ્દો તૈયાર કર્યો છે. શ્રમ મંત્રાલય દ્વારા રજૂ કરવામાં આવેલા આ પ્રસ્તાવિત નિયમોનો મુખ્ય ઉદ્દેશ્ય અસંગઠિત ક્ષેત્રના આ કામદારોને પેન્શન, આરોગ્ય વીમો અને સુરક્ષિત કામકાજી વાતાવરણ જેવી પાયાની સુવિધાઓ પૂરી પાડવાનો છે. આ પગલાથી ડિલિવરી પાર્ટનર્સ અને ડ્રાઈવરોનું ભવિષ્ય વધુ સુરક્ષિત બનશે.
Rule For Gig Workers : લાભ મેળવવા માટે કાર્યકાળની મર્યાદા
નવા નિયમો મુજબ, સરકારી યોજનાઓનો લાભ લેવા માટે ગિગ વર્કર્સ માટે ચોક્કસ કાર્યકાળ નક્કી કરવામાં આવ્યો છે. જો કોઈ કામદાર કોઈ એક એગ્રીગેટર કંપની સાથે જોડાયેલ હોય, તો તેણે એક નાણાકીય વર્ષમાં ઓછામાં ઓછા 90 દિવસ કામ કરવું અનિવાર્ય રહેશે. જો કોઈ વર્કર એક કરતા વધુ એપ અથવા કંપનીઓ સાથે કામ કરે છે, તો તેના માટે કુલ 120 દિવસની કાર્ય અવધિ નક્કી કરવામાં આવી છે.
Rule For Gig Workers: કામના દિવસોની ગણતરીની સરળ પદ્ધતિ
સરકારે આ નિયમોમાં વર્કર્સ માટે મોટી છૂટછાટ આપી છે. જો કોઈ વર્કર એક દિવસમાં કોઈ પણ કંપની માટે થોડું પણ કામ કરીને કમાણી કરે છે, તો તેને આખો દિવસ ગણવામાં આવશે. વધુમાં, જો કોઈ ડિલિવરી પાર્ટનર એક જ દિવસે ત્રણ અલગ-અલગ કંપનીઓના ઓર્ડર ડિલિવર કરે છે, તો તેના અનુભવમાં ત્રણ દિવસ ઉમેરવામાં આવશે. આ સુવિધાને કારણે વર્કર્સ માટે વર્ષના 120 દિવસનો ક્વોટા પૂરો કરવો અત્યંત સરળ બની જશે.
ઈ-શ્રમ પોર્ટલ પર રજીસ્ટ્રેશન અને ડિજિટલ
આ તમામ સુવિધાઓનો લાભ મેળવવા માટે દરેક ગિગ વર્કરે કેન્દ્ર સરકારના 'ઈ-શ્રમ' (e-Shram) પોર્ટલ પર ફરજિયાત નોંધણી કરાવવી પડશે. રજીસ્ટ્રેશન પૂર્ણ થયા બાદ, સરકાર દરેક વર્કરને એક યુનિક 'ડિજિટલ ઓળખ પત્ર' (Digital ID) ઇસ્યુ કરશે. આ કાર્ડમાં વર્કરનો ફોટો અને તમામ જરૂરી વિગતો હશે, જે દેશભરમાં તેમની પાત્રતાના પુરાવા તરીકે કામ કરશે.
માહિતી અપડેટ રાખવી અનિવાર્ય
સરકારે સ્પષ્ટ કર્યું છે કે માત્ર રજીસ્ટ્રેશન પૂરતું નથી. વર્કર્સે સમયાંતરે પોતાનું વર્તમાન સરનામું, મોબાઈલ નંબર અને હુનર (Skills) પોર્ટલ પર અપડેટ કરતા રહેવું પડશે. જો માહિતી અધૂરી હશે તો વર્કર્સ સામાજિક સુરક્ષાના લાભોથી વંચિત રહી શકે છે. આ ડેટાબેઝ દ્વારા સરકાર સચોટ માહિતી મેળવીને યોગ્ય લાભાર્થી સુધી સીધી મદદ પહોંચાડવાનું લક્ષ્ય ધરાવે છે.